Հայտնի հաղորդավարները բարեգործական հիմնադրամ են ստեղծել` 100 դրամով կյանք փրկելու համար

Կարծում եք 100 դրամն ընդամենը 100 դրամ է, որն իրենից արժեք գրեթե չի՞ ներկայացնում: Հաղորդավարներ Լուսինե Բադալյանը, Գոռ Գլումովը, Հակոբ Պապիկյանը (Ժակ), Արամ Կարախանյանը (Մաքս), ինչպես նաեւ «Ստատուս հոլդինգ» ընկերության հիմնադիր տնօրեն Տիգրան Բալոյանը այսօր ասուլիս էին հրավիրել հակառակն ապացուցելու եւ հիշեցնելու, որ հազարավոր հարյուր դրամները միասին միլիոնավոր դրամներ են կազմում եւ դրանցով կարելի է կյանքեր փրկել:

Նրանք հայտարարեցին, որ ստեղծել են «Ֆոնդ 100» կոչվող բարեգործական հիմնադրամ, որը նպատակ ունի միավորել բարեսիրտ ու հոգատար մարդկանց` օգնելու քաղցկեղով տառապող երեխաներին ու երիտասարդներին:

Բանախոսները հաշվարկել են, որ եթե յուրաքանչյուր ամիս 500 հազար մարդ այդ նպատակի համար նվիրաբերի ընդամենը 100 դրամ, ապա հնարավոր կլինի նոր կյանք պարգեւել 2-5 մարդու:

Նախաձեռնության հեղինակները քաջ գիտակցում են, որ մեծսիրտ մարդիկ հաճախ իսկապես ու անկեղծորեն ցանկանում են արձագանքել սոցիալական կայքերում տարածվող հայտարարություններին, որոնց հեղինակները խնդրում են օգնել այս կամ այն  ծանր հիվանդությունն ունեցողին: Բայց միշտ չէ, որ ունենում են այդ հնարավորությունը. երբեմն  ժամանակ չեն գտնում բանկ հասնելու եւ փոխանցում կատարելու համար, երբեմն էլ ընդամենը փոքր գումարով օգնելու հնարավորության պատճառով ամաչում են դա անել:

Եվ ահա «Ֆոնդ 100» հիմնադրամը հեշտացրել է նրանց գործը` մշակելով հանգանակության դյուրին մեխանիզմ: Փոխանցումներ կարելի է կատարել www.f100.am կայքի միոցով: Տարբերակները երկուսն են` դրամական փոխանցում քարտի միջոցով եւ միանվագ փոխանցում հիմնադրամի հաշվեհամարին:

Հնարավորություն է ստեղծված, որպեսզի վճարում կատարելուց հետո հանգանակություն կատարողի անունն անմիջապես արտացոլվի կայքում: Նա կկարողանա տեսնել նաեւ այն մարդկանց անունները, որոնք նույնպես ներդրում են ունեցել եւ չեն ցանկացել գաղտնի մնալ: Կայքը հնարավորություն է տալիս, որպեսզի նվիրատուն չհրապարակի իր անունը:

Աշխատանքներ են տարվում, որ առաջիկայում հնարավոր լինի նաեւ գումար փոխանցել SMS հաղորդագրությունների միջոցով:

 «Ֆոնդ 100» հիմնադրամի հոգաբարձուների խորհրդի անդամները, որոնք հենց ասուլիսի բանախոսներն էին, խոստանում են գործել առավելագույնս թափանցիկ` այդ նպատակին ծառայելցնելով նույն կայքը: Բայց նրանք հայտարարում են, որ ցանկացած մարդ, անկախ այն բանից` մասնակցել է հանգանակությանը. թե ոչ, կարող է հետաքրքրվել եւ սպառիչ պատասխան ստանալ հիմնադրամի հաշվապահության վերաբերյալ:

Հիմանդրամ ստեղծելու գաղափարի հեղինակը Լուսինե Բադալյանն է, որն էլ աջակցություն է գտել իր ընկերների կողմից:

«Այս ամենը սկսվեց իմ շուրջը ծավալվող իրադարձությունների պատճառով: Բարեգործական այս նախաձեռնությունը սկսելը ինձ համար, այսպես ասած, ուխտ էր, որովհետեւ որքան էլ մենք խորաթափանց ու բարի լինենք, որքան էլ հասկանանք, թե ինչերի միջով են անցնում այն մարդիկ, որոնց ընտանիքի վրա այս արհավիրքը թափվել է, միեւնույն է, շատ լավ հասկանում են նրանք, որոնք դրա միջով անցել են: Եվ ես էլ, երբ գտնվում էի Գերմանիայում, ամուսնուս բուժման նպատակով, հենց այնտեղ հասկանում էին, որ մարդը միայնակ ի վիճակի չէ անցնել այս ամենի միջով: Բավական չէ այդ դժբախտությունը կատարվում է քո ընտանիքի հետ, դրան ավելանում են ծախսերը, որոնք աննկարագրելի ծավալի են: ...եւ ես մտածեցի` եթե Աստված տա որեւիցե հրաշքով մենք կարողանանք հաղթահարել այդ ամեն ինչը, ես պիտի փորձեմ է ինչքան հնարավոր օգնել այն մարդկանց, որոնք բախվել են նման խնդիրների»,- ասաց Լուսինե Բադալյանը:   

Իսկ օրինակ Գոռ Գլումովը, որը առիթներ ունեցել է մասնակցելու տարբեր բարեգործական ծրագրերի, հասկացել է, որ հիմնական խնդիրը կապվում է գումար հավաքելու ձեւի ու վստահության պակասի հետ:

«Մեր հիմնադրամում փորձել ենք այդ երկու պարագաները միացնել իրար եւ ստանալ  մեր կարծիքով հրաշալի բանաձեւ, որի օգնությամբ մենք կարող ենք օգնել... Մեր երեխաները բուժվելու են եվրոպական լավագույն կլինիկաներում եւ բուժումը կատարվելու է սկզբից մինչեւ վերջ»,- արձանագրեց նա եւ դառնալով վստահության գործոնին` շարունակեց. «Փորձեցինք ներգրավել այնպիսի մարդկանց, որոնք որեւէ կուսակցության անդամ չեն, չունեն բիզնես: Այն մարդկանց, որոնց բերանից համենայնդեպս ոչ մի արտառոց սուտ չեք լսել:  Մենք կարծում ենք, որ մեր անունը, մեր դեմքերը, մեր հոգիները մարդկանց կստիպեն հավատալ մեզ»:

Հանգանակությանը մասնակցել հնարավոր կլինի արդեն առաջիկա երկուշաբթից սկսած: Իսկ ինչ վերաբերում է այն երեխաների կամ երիտասարդների ընտրությանը, որոնք բուժման ծախսերը պետք է հոգա հիմնադրամը, թողնված է բժիշկ-մասնագետներին: