Անուշ աղջիկ Անուշիկն ուզում է կռիվ գնալ. նա սկսել է ռազմական պատրաստություն սովորել

«Ողջ մնալու արվեստը» (ՈՄԱ) ակումբն այս օրերին հայտարարել էր ռազմական պատրաստության արագացված եւ անվճար դասընթացներ կազմակերպելու մասին, որին հրավիրվել էին բոլոր ցանկացողները՝ անկախ տարիքային ու սեռային պատկանելությունից: Ապրիլի 5-ին այդ դասընթացների առաջին օրն էր: Արձագանքած մարդիկ բազմաթիվ էին՝  մեծամասամբ երիտասարդ ու ամրակազմ: Աղջիկների թիվը նույնպես մեծ էր: Նրանց մեջ էր 19-ամյա Անուշիկ Հովհաննիսյանը: Նա եկել էր մարտական արվեստ սովորելու: Ասում էր՝ պատրաստ է գնալ ու կռվել՝ հանուն խաղաղության:

«Քանի որ մեր հայրենիքին վտանգ է սպառնում, չեմ ուզում, որ պատմությունը կրկնվի: Մի քանի անգամ եղել է, որ հայերը չեն համախմբվել: Դա մեծ սխալ է: Ինձ թվում է՝ հիմա բոլորս պետք է հասկանանք ու չկրկնենք այդ սխալը, բոլորով պատրաստվենք ու պաշտպանենք մեր հայրենիքը: Ամենամեծ ցանկությունս խաղաղությունն է»,- մեր զրույցում նշեց աղջիկը: Արցունքները զսպելով ու կոկորդը սեղմվելով՝ նա նկատեց, որ տարիներ շարունակ, թերեւս մեկշաբաթյա պարբերականությամբ, ստանում ենք որեւէ զինծառայողի զոհվելու մասին լուրը, որն իր տարեկիցն է լինում:

«Մյուս տարվանից ինձնից փոքր տարիքովներն են երկու կողմում էլ ծառայելու: Մարդիկ ամեն օր մեռնում են, ինչ տարբերություն՝ պատերազմ է, թե չէ: Էլի կարելի է համարել, որ պատերազմ է: Նամանավանդ այն ցավը, որ զգում ես, ավելի լավ է գնաս դու էլ զոհվես, քան թե անընդհատ լսես՝ ինչպես են քո տարիքի, արդեն քեզնից փոքր երիտասարդները զոհվում: Որ փոքր էի, մտածում էի` զինվորները մեծ են, իրենց պարտականությունն է եւ այլն, բայց հիմա արդեն ուզում եմ այս ամենը շուտ վերջանա ու խաղաղություն լինի: Հանուն դրա ես պատրաստ եմ կռվելու: Հաստատ»,- վճռական էր ԵՊՀ նախկին ուսանողուհին, որը թողել է համալսարանը՝ այլ բուհում կրթություն ստանալու նպատակով:

Նրա հետ մեր զրույցի պահին ղարաբաղա-ադրբեջանական հակամարտ զորքերի շփման գծում հանգիստ էր, հայտարարվել էր կրակը դադարեցնելու պայմանավորվածության մասին: Անուշիկը, սակայն, վստահ էր, որ դա երկար չի տեւի եւ ընդամենը կապված է ԵԱՀԿ Մինսկի խմբի համանախագահների՝ այդ օրը Վիեննայում նախատեսված հանդիպման հետ (ավելի ուշ պարզվեց, որ ադրբեջանցիները նորից սկսել են կրակել):

«Զինադադար է կնքվել, չի կնքվել, ինձ չի հետաքրքրում: Պիտի որ ձեզ էլ չհետաքրքրի: ... Մենք պիտի սովորենք լինել պիտանի՝ հակառակորդի հետ պայքարում եւ տուն վերադարձող, որպեսզի մեր ընտանիքներին չդժբախտացնենք»,- դիմելով կռվել սովորելու եկածներին՝ ասաց ռազմական պատրաստության դասընթացները կազմակերպող, հատուկ նշանակության խմբի հիմնադիր հրամանատար Վովա Վարդանովը: Մանրամասների շուրջ նրա հետ մեր զրույցը՝ ստորեւ:

- Պարոն Վարդանով, խնդրում  եմ ներկայացրեք՝ ինչ դասընթացներ են մեկնարկում եւ որն է դրանց նպատակը:

- Կամավորականության բարձր ալիք է բարձրացել, շատ երիտասարդներ կան, որոնք ռազմական գիտելիքների մեծ պակաս ունեն: Չեն ծառայել, որովհետեւ բարձր առաջադիմությամբ ուսանող են, բացի այդ, կան մարդիկ, որոնց առողջականը բանակի համար այնքան էլ համապատասխան չէ, բայց պատերազմի ժամանակ այդպիսի բաների վրա չես նայում: Մենք հիմա փորձում ենք հավաքագրել այն մարդկանց, որոնք ցանկանում են պիտանի լինել ազգին ու կարողանում են պիտանի լինել այս ձեւով:

- Այսինքն՝ անվճար սովորեցնելու եք՝ ինչպես օգտվել զենքից...

- Այո, նաեւ՝ ինչպես խրամատում պահել գլուխը եւ այլն: Փորձառու, պատերազմ անցած վետերանների հետ են շփվելու, բացի այն, որ պարապելու են: Այսօր, օրինակ, Գագիկ Գինոսյանն է գալու: Շատերը չեն իմանում, բայց նա պատերազմի մասնակից է եւ ֆագոտից է կրակել, նույնիսկ տանկ է խփել: Վաղը նկարիչ Արայիկ Խանդոյանն է լինելու, հայտնի սեւ բերետավորը: Այսօր կարելի է ասել ընդունելության քննության պես մի բան պետք է անցկացնենք՝ մասնակիցների ֆիզիկական պատրաստությունը պարզելու համար: Մարդիկ կան՝ շատ մեծ ցանկություն ունեն, բայց ոչինչ ի վիճակի չեն լինի անել կռվի դաշտում:

- Ո՞ր դեպքում կհանգեք նման եզրակացության:

- Մենք հիմա կիլոմետրանոց վազք ենք կազմակերպելու եւ ֆիզիկական վարժություններ: Պահանջելու ենք, որ մարդիկ, եթե շատ են ցանկանում, թեկուզ իրենց ուժերից վեր կարողանան այդ բանը կատարեն, որովհետեւ եթե ձգտում ունես, դու պիտի կարողանաս նաեւ քեզ հաղթահարել:

- Իսկ քանի՞ դասընթաց կպահանջվի, որ համարեք՝  արդեն պատրաստ են պատերազմի գնալ:

- Որ համարենք պատրաստ են պատերազմի գնալ, երկուսուկես-երեք տարի կպահանջվի, բայց անհրաժեշտության դեպքում, Աստված չանի, երրորդ, չորրորդ, հինգերորդ կամ տասներորդ դասից հետո կարող են մեկնել:

- Ամեն օ՞ր են լինելու դասընթացները:

- Ամեն օր դասընթացները լինելու են: Ընդհանուր առմամբ՝ 14 օր, որից հետո կանենք բաժանում՝ ռեզերվ եւ հիմնական խումբ: Հիմնական խումբը կպարապի եւս 15-20 օր: ... Հիմա երկրապահներն են գնացել Արցախ, կամավորական այլ գումարտակներ: Այսօր-վաղը նրանց փոխարինելու հարց է առաջանալու, աշխատում ենք, որ փոխարինող ուժ ունենանք, որ երիտասարդներով համալրված ստորաբաժանումներ կարողանանք ուղարկել կամ մեզ հետ տանել: Հիմա մեր կազմակերպությունից մի քանի հոգի այնտեղ են: Ես ուղղակի չկարողացա բոլորին պահել: Բոլորի մեջ գնալու եռանդը կար, բայց հիմա ավելի շատ ինձ պետք են թե՛ հատուկ նշանակության խմբի, թե՛ մեր ՈՄԱ ակումբի վետերանները, որ այս աշխատանքները կարողանանք նորմալ անել:

- Դասընթացներին մասնակցելու եկածների առջեւ պայմա՞ն է դրվելու, որ պատրաստվելուց հետո պետք է մեկնեն շփման գիծ:

- Ես այդ պայմանը դրեցի՝ բացատրելով, որ եթե չեք գնալու, հիմա մեր ժամանակը մի կորցրեք, մեկ-երկու ամիս հետո նմանատիպ բան չգնացողների համար ենք կազմակերպելու՝ ռեզերվի համար, որ երբ արդեն թուրքը գա Երեւան, այն պատճառով, որ ինքը չի գնում եւ ստիպված է լինելու Երեւանում դիմավորել նրան, գոնե այստեղ ինքը մարտունակ լինի:

Հ.Գ. Վովա Վարդանովի փոքրիկ ելույթից հետո ներկաների շրջանում հեռացողների չտեսանք, եւ կարծես բոլորը գնացին վազելու իրենց կարողությունները ցուցադրելու: