Սերժը Հրազդանում խնդիր է լուծել. Արամ Սարգսյան

- Պարոն Սարգսյան, ինչպե՞ս եք գնահատում Հրազդանի ընտրությունները: Հատկապես վերջին պատերազմական օրերից հետո ժողովրդի մեջ մեծ հույսեր կային, որ իշխանությունները չեն դիմի իրենց ավանդական ընտրական մեխանիզմներին:

- Հրազդանի ընտրությունների արդյունքներով Սասուն Միքայելյանը չդարձավ քաղաքապետ, բայց նաեւ չպարտվեց: Իմ խորին համոզմամբ պարտությունը իշխանություններինն էր: Եթե իրենք համարում են, որ  արդար ընտրապայքարում կարողացել են հաղթել Հրազդանում, ուրեմն մենք շատ ավելի լուրջ խնդիր ունենք մեր հասարակության հետ: Որովհետեւ տեսեք` 1988-1994 թվական. էս մարդը ժողովրդի կողքին է, առաջիններից մեկն է անդամագրվում պարտադրված պատերազմին եւ ես  Հրազդանի ամենամեծ ձեռքբերումը համարում եմ «Սասուն» ջոկատը ու նրա հրամանատարին, որոնց հերոսությունը Քարվաճառում ուղղակի անկրկնելի է: Դրանից հետո 2008 թվական. ժողովուրդը բաժանվում է 2 մասի. մի մասում հասարակությունն է, մի մասում՝ Ռոբերտ Քոչարյանի վարչակազմը, որը ուժ է գործադրում հասարակության վրա, 10 մարդ սպանում: Ու Սասուն Միքայելյանը կրկին ժողովրդի կողքին է, որի համար նաեւ դատապարտվում է, հայտնվում բանտում: 2016 թվական, նորից պատերազմ, Սասուն Միքայելյանը պապիկ է, թոռնիկի տեր, բայց նույնիսկ ընտրությունների ժամանակ գնում է դիրքեր: Ու դրանից հետո մեր երկրում, որտեղ խոսում են համախմբվածությունից, ազատամարտիկի պատվից, մարդու արած հերոսությունից, Սասուն Միքայելյանը պարտվում է չինովնիկ ինչ-որ մեկին, որը իր կենսագրությամբ որեւէ տեղ որեւէ բան չի կարող մատնացույց անել: Սա նշանակում է, որ մեր երկրի իշխանությունները թե իրենց քարոզչությամբ, թե իրենց պահվածքով ոչնչի չեն հասել ու շատ լուրջ խնդիր ունեն:

Ընտրությունները միայն տեղամասում չեն, ընտրությունները նաեւ տեղամասից դուրս գործընթացներն են: Հրազդանում իմ ներկայությամբ դիմել են ոստիկանությանը, որ փող են բաժանում, ու ոստիկանը փոխանակ փող բաժանողին բռնի, սկսել է հարցաքննել, թե ով ասաց, որտեղ տեսար եւ այլն: Ինձ համար նաեւ անհասկանալի էր, թե Գագիկ Ծառուկյանի ավտոբուսներով Արտաշատից բերած երիտասարդները, որոնք լրագրողից փախչում էին ինչպես գառները՝ գայլից, ինչ նպատակով էին բերվել Հրազդան: Եթե այդքան ծախս էին արել, որ քաղաքապետարանի լուսամուտների տակ գոռան Դանիելյան-քաղաքապետ, չեմ կարծում, որ դա դրա համար էր: Իմ կարծիքով իշխանությունները մինչեւ նախագահ հասնող մակարդակով խարդախությունների խնդիր են լուծել, ինչի արդյունքում էլ տեղի ունեցավ այն, ինչ տեղի ունեցավ: Բայց, նորից եմ ասում, Սասուն Միքայելյանը չի պարտվել: Սասուն Միքայելյանի խնդիրը քաղաքապետ դառնալը չէ, նրա խնդիրը ժողովրդի հետ լինելն է, եւ ինքը այդ խնդիրը լուծել է:

- Եվ այնուամենայնիվ հերթական անգամ ընտրական ճանապարհով նույնիսկ այս փոքր քաղաքում չհաջողվեց իշխանություն վերցնել: Այնինչ «Քաղաքացիական պայմանագիր» կուսակցությունում, որի վարչության անդամ է Սասուն Միքայելյանը, նորից պնդում են, որ ՀՀ-ում քաղաքական փոփոխություններ կարող են լինել միայն ընտրական ճանապարհով: Ի՞նչ եք մտածում այս մասին:

- Այն իրավիճակը, որում հայտնվել է Հայաստանը, այս ծորացող պատերազմի ու երկրի ներսի բացահայտ անարդարության պարագայում, այլ տեսակետ հայտնելը բարդ է, ու դա պետք է հասկանալ: Այստեղ հետեւություններ անելու կարիք ունի իշխանությունը, որովհետեւ, եթե պատերազմը կանգնեցնելու խնդիրը միայն իրենից չէ կախված, կախված է Ադրբեջանից, միջազգային հանրությունից եւ այլ շատ պարամետրերից, ապա ներքին արդարության խնդիրը միայն իրենից է կախված, ու եթե իրենք չեն ուզում, որ այս երկիրը գնալով վերջանա, ապա պիտի հետեւություններ անեն: Հրազդանի ընտրությունները առաջին հերթին ինձ ապացուցեցին, որ այս իշխանությունները ունակ չեն հետեւություններ անելու, որ իրենք իրենց ամենավերջին, նույնիսկ վարկաբեկված թեկնածուին պատրաստ են ատամներով պաշտպանել, միայն թե չպարտվեն: Հետեւաբար այս իշխանությունների դեմ պայքարը էլ ավելի պետք է խստացվի: Ինչ վերաբերում է տեղերում խնդիրները լուծելուն, քվեն պահպանելուն, այն, ինչ արեց «Քաղաքացիական պայմանագիր» կուսակցությունն իր վստահված անձերով, ամեն ինչ իսկապես դրական արվեց, ու դա միանշանակ պիտի արվի: Բայց նաեւ հասարակության հետ աշխատանքի խնդիր կա, իշխանության օղակների եւ իշխանության ենթակայության տակ եղած կառույցներին`դատախազություն, ոստիկանություն, որոնք իրենք են պարտավոր ապահովել եւ ամբողջ աշխարհին ապացուցել, որ ընտրությունները արդար են, դա պարտադրելու խնդիր կա:

- Պարոն Սարգսյան, ինչ է անելու «Հանրապետություն» կուսակցությունը 2017-ի խորհրդարանական ընտրություններում, արդեն որոշե՞լ եք, միայնա՞կ,  թե դաշինքով եք մասնակցելու:

- Քննարկումներ տեղի են ունեցել թե՛ կուսակցության ներսում, թե՛ կուսակցությունից դուրս ընդդիմադիր գրեթե բոլոր քաղաքական ուժերի հետ: Նրանց հետ, ում մենք իսկապես ընդդիմադիր ենք համարում: Մենք միշտ հակված ենք եղել համապետական ընտրություններին ուժերը համախմբել եւ համախմբված հանդես գալ: Նաեւ հասարակությունն է  նման պահանջ ներկայացրել, եւ դժվար է այդ պահանջին հակադրվել:  Բայց նաեւ փորձը ցույց է տվել, որ ժամանակի մեջ այդ դաշինքները քայքայվել են` հիմնականում այն խնդրի պատճառով, որ տարբեր մոտեցումներ են ունեցել գաղափարական առումով եւ դա վերջիվերջո բերել է բաժանման, հիասթափությունների: Այս առումով հակված ենք առաջիկա ընտրություններում հնարավորինս գաղափարական հենքի վրա եւ մեր կարծիքով իրական ընդդիմություն հանդիսացող ուժերի համագործակցության միջոցով, դաշինքային հարաբերություններով գնալ ընտրությունների: Եվ մինչեւ ապրիլյան պատերազմը բավականին դրական միտումներ կային զուտ գաղափարական հենքի վրա գործընթացներ տանելու առումով, բայց ապրիլյան փուլից հետո, նաեւ` Սասուն Միքայելյանի ընտրությունները բերեցին նրան, որ այսօր հենց քաղխորհրդի նիստում նաեւ այլ տեսակետներ էին ասվում: Այնպես որ, կարող ենք համարել, որ այժմ քննարկումները սկսելու փուլում ենք: