Ավարտական քննությունների թիվը հնարավոր է կրճատվի` 6-ի փոխարեն դառնալով 3-4-ը

ՀՀ կրթության եւ գիտության նախարարության կրթության պետական տեսչությունը այլեւս անակնկալ այցեր չի կազմակերպում ավագ դպրոցներ` բացակայությունները ստուգելու նպատակով: Այս մասին տեղեկացանք ԿԳՆ հանրակրթության վարչության պետ Նարինե Հովհաննիսյանից: Եվ սա սպասելի պատասխան էր, որովհետեւ նախարար Լեւոն Մկրտչյանը նշանակումից հետո առաջին ասուլիսում, խոսելով ավագ դպրոցների խնդիրների մասին, կարծիք էր հայտնել, որ ստուգումները որեւէ արդյունք չեն կարող տալ, եթե չհայտնաբերվեն ու չվերացվեն այն բացթողումները, որոնց պատճառով ավագ դպրոցը գրավիչ չէ աշակերտների համար եւ նրանք ուղղակի դասերին չեն հաճախում: Եվ հենց այդ համատեքստում էլ ավելի ուշ ավագ դպրոցների տնօրեններին հանձնարարվել էր մշակել դպրոցի զարգացման ծրագիր` նաեւ վեր հանելով այն խնդիրները, որոնց նրանք ներսից են ծանոթ:

Նարինե Հովհաննիսյանն ասաց, որ այդ ծրագիր-առաջարկները շարունակում են ստացվել: Բայց այս պահին ներկայացվածները թույլ են տալիս ձեւավորել որոշակի պատկեր: «Առաջարկների մեջ կարեւոր տեղ է գրավում ուսումնական պլանը, անհրաժեշտ է համարվում ծանրաբեռնվածությունների փոփոխությունը: Հիմա ուսումնական պլանի վրա ենք աշխատում: Առաջ է քաշվում նաեւ ավագ դպրոցների ֆինանսավորման բանաձեւում փոփոխություններ մտցնելու հարցը, քանի որ ավագ դպրոցում ցածր դասարանների թիվը աստիճանաբար կրճատվում է, եւ աշակերտների թվով ֆինանսավորումը արդեն խնդիրներ է առաջացնում: Դա նույնպես պետք է վերանայվի: Առաջարկվում է նաեւ ավարտական քննությունները որոշակիորեն կրճատել, շրջանավարտները ոչ թե վեց քննություն հանձնեն, այլ, օրինակ, երեք-չորսը»,- մանրամասնեց հանրակրթության վարչության պետը:

Նաեւ ասաց, որ դպրոցների տնօրեններն առաջարկում են իրենց մի քիչ ավելի ազատ թողնել՝ հոսքային ուսուցման աշխատանքների կազմակերպման առումով. «Փորձում ենք ուսումնական պլանը դարձնել ավելի ճկուն, որպեսզի տնօրենը եւ մեթոդմիավորումները երեխայի հոսքային առարկաների ընտրության գործում ավելի ազատ լինեն: Պետք է ֆինանսավորման բանաձեւը նաեւ այս պատճառով փոխվի, որ, ասենք, անհատական ուսուցումներ կազմակերպվեն: Օրինակ, եթե երկու աշակերտ որոշում են կենսաբանություն առարկան ընտրել, դպրոցը հաճախ չի կարողանում այդ երկու հոգու համար դասարան բացել, որովհետեւ գումար է պետք: Ստիպված երեխային ասում է՝ կենսաբանություն մի ընտրիր, դու եւս քիմիա ընտրիր»:

Առաջարկ կա նաեւ 12-րդ դասարանում դասաժամերն ամբողջությամբ տրամադրել ծրագրային նյութի կրկնողության: Նարինե Հովհաննիսյանի փոխանցմամբ, նման առաջարկով հանդես է եկել, օրինակ, Երեւանի թիվ 83 ավագ դպրոցը: Սեպտեմբերի 1-ից այս հաստատությունը այդ հնարավորությունը կստանա: «Տնօրենը եթե առաջարկ է արել ու համոզված է, որ դա կարող է արդյունավետ լինել, 12-րդ դասարանի հաճախումների խնդիրը դրանով կլուծվի, թույլատրվելու է փորձարկել՝ անկախ նրանից, դա ուսումնական պլանի խախտում կլինի, թե չէ»,- ասաց հանրակրթության վարչության պետը: Քննարկվում է նաեւ 120 դասաժամից ավելի անհարգելի բացակայությունների շեմը չեղյալ հայտարարելու տարբերակը: Այսինքն՝ եթե երեխան բացակայի առողջական խնդիրների պատճառով եւ ներկայացնի համապատասխան բժշկական տեղեկանք, ուրեմն նրա բացակայությունները կհամարվեն հարգելի, եթե չէ, այլեւս հենց այնպես մինչեւ 120 բացակայությունները հարգելի չեն լինի, եւ աշակերտը չի փոխադրվի կամ կմնա միեւնույն դասարանում:

Նարինե Հովհաննիսյանի խոսքով, քննարկվող առաջարկների մի մասը հնարավոր է կիրառվեն առաջիկա սեպտեմբերից, մյուսները նույն ուսումնական տարվա ավարտին կամ ավելի ուշ:

Թիվ 83 դպրոցի տնօրեն Մանվել Պապյանը մեր զրույցում մանրամասնելով ավագ դպրոցի զարգացման իր պատկերացումները, ասաց. «Ես այսպիսի բան եմ առաջարկել, չգիտեմ ինչքանով կընդունեն. 12-րդ դասարանի երկրորդ կիսամյակի ռազմավարությունը փոխել, կիրառել սեպտեմբերի 1-ից՝ ամբողջ ուսումնական տարվա ընթացքում: Այսինքն՝ եռամյա ծրագրային նյութը անցնել 10-11-րդ դասարաններում, իսկ 12-րդ դասարանում ամբողջ ծրագրային նյութը կրկնել սեպտեմբերի 1-ից մինչեւ ուսումնական տարվա վերջը: Առաջարկել եմ նաեւ քննություն անցկացնել այդ հոսքային առարկաներից»: Տնօրենը վստահեցրեց, որ ուսումնական ծրագրի թերակատարում չի լինի եւ նախատեսված նյութը լրիվ կուսումնասիրվի: «Կոպիտ ասած՝ եթե տրված է 10 ժամ, որ պիտի «Գիքոր» անցնենք, մենք կանցնենք 1-2 ժամով, մնացած 8 ժամը ես կծանրաբեռնեմ մյուս թեմաների վրա: Այսինքն` ես ծրագրային ոչ մի փոփոխություն չեմ անում՝ հիմնվելով չափորոշիչի վրա, հենքային ուսումնական պլանի վրա»:

Մանվել Պապոյանը շեշտադրում է նաեւ դասարանների խտությունը փոքրացնելու եւ 25-30 աշակերտի փոխարեն 15-20-ը դարձնելու անհրաժեշտությունը: Նշում է, որ համապատասխան ազատություն ունենալու դեպքում ինքը կարող է ձեւավորել այդպիսի դասարաններ՝ առայժմ առանց լրացուցիչ ֆինանսավորման՝ դպրոցի խնայողությունների հաշվին: «Այսինքն` առաջարկում եմ տարբերակված մոտեցում ցուցաբերել ավագ դպրոցներին, որովհետեւ այսպես համատարած գրագիտություն-համատարած միջակություն տարբերակի վրա ենք մենք աշխատում»,- արձանագրեց Պապոյանը: Նա նաեւ առաջարկել է, որ աշակերտներին հոսքից հոսք տեղափոխելը թույլատրվի միայն 10-րդ դասարանում: Առայժմ դա արգելվում է ընդամենը ավարտական՝ 12-րդ դասարանում: Բացի այդ գտնում է, որ 10-րդ դասարան ընդունելությունը պետք է կատարվի առնվազն գիտելիքների ստուգումով. «Որովհետեւ երեխա է գալիս, չի իմանում՝ եռանկյունը ինչ բան է, բայց ես նրան պետք է եռանկյունաչափական ֆունկցիա բացատրեմ»: Այս եւ մի շարք այլ առաջարկների հեղինակ Մանվել Պապոյանը նկատեց, որ դրանք ընդունվելու եւ կյանքի կոչելու դեպքում արդյունքները հնարավոր կլինի տեսնել երեք տարի անց: Այսինքն՝ երբ ավագ դպրոցն ավարտեն առաջիկա սեպտեմբերին ընդունվածները: