Անի Հովհաննիսյանը պատրաստվում է պաշտոնյաների անուններ տալ. ո՞ւմ «մեջքն» ավելի հզոր կգտվի

Երեկ մեծ պայթյուն տեղի ունեցավ լրագրողա-քաղաքական դաշտում: Ոստիկանությունը հաղորդեց, որ նախօրեին ձերբակալել է «analitik.am» կայքի տնօրենին եւ տնօրենի օգնականին՝ պատգամավորից շորթում կատարելու կասկածանքով:

Հաղորդագրության մեջ նշվում էր. «Ազգային ժողովի պատգամավորներից մեկը հաղորդում էր տվել ոստիկանության կազմակերպված հանցավորության դեմ պայքարի գլխավոր վարչություն, որ ««analitik.am» լրատվական կայքի տնօրենը կայքում պարբերաբար իր անձի, ընտանիքի անդամների, ինչպես նաեւ իր` որպես ԱԺ պատգամավորի գործունեությանը վերաբերող սուտ տեղեկատվություններ, զրպարտություններ եւ վարկաբեկիչ այլ նյութեր հրապարակելու կապակցությամբ հանդիպումներ է ունեցել իր հետ, որոնց ընթացքում, անդրադառնալով կայքի նախկին հրապարակումներին, դրանք չդադարեցնելու եւ հետագայում նմանատիպ հոդվածներ հրապարակելու սպառնալիքով իրենից պահանջել է յուրաքանչյուր ամիս վճարել 300.000 դրամ: Այնուհետեւ, կայքի տնօրենի ներկայացրած պահանջի կապակցությամբ պատգամավորի անունից բանակցություններ է վարել նրա ներկայացուցիչը: Բանակցությունների ընթացքում նրանց միջեւ պայմանավորվածություն է ձեռք բերվել, որ պահանջվող 300.000-ական դրամը, նախապես պայմանավորված որեւէ վայրում, մինչեւ յուրաքանչյուր ամսվա 5-ը պետք է վճարվի կամ կայքի տնօրենին, կամ նրա օգնականին»: Նախօրեին Երեւանի Նալբանդյան փողոցում գտնվող սրճարաններից մեկում 300 հազար դրամը վերցնելուց հետո բերման են ենթարկվել նշված լրատվամիջոցի տնօրեն Անի Հովհաննիսյանը եւ նրա օգնականը: Սա աննախադեպ իրադարձություն է Հայաստանի ներքաղաքական կյանքում. երրորդ հանրապետության պատմության մեջ հնարավոր չէ հիշել երկրորդ նման դեպք, երբ լրագրողը ձերբակալվում է ոչ թե իր գործունեության, քաղաքական հետապնդման հետեւանքով, այլ նման մեղադրանքով: Երեկ ոստիկանությունը նաեւ տարածեց գումարի փոխանցման եւ ձերբակալման պահերին արված տեսագրություն:

Արդեն երկար տարիներ է «Հայկական Ժամանակ» թերթի խմբագրությունը ահաբեկված զանգեր է ստանում տարբեր քաղաքացիներից, որոնք հիմնականում փոքր քաղաքների «էլիտայի» ներկայացուցիչներ են, եւ շփոթած լինելով «Հայկական ժամանակ» անունը մեկ այլ լրատվամիջոցի անվան հետ, սկսում են մեզ համար անհասկանալի մի խոսակցություն: Մեկ երկու նման խոսակցություններից եւ տեղերից ստացվող այլ ինֆորմացիաներից հետո պարզ դարձավ, որ ինչ-որ լրագրողներ այս մարդկանցից հարցազրույց վերցնելու կամ նրանց դեմ «վատ» հոդվածներ չհրապարակելու համար գումար են պահանջում: Նրանք նաեւ այնպես են ներկայանում, որպեսզի շփոթմունք առաջանա եւ մարդկանց մեջ ֆիքսվի, թե իրենց հետ խոսողը «Հայկական ժամանակից» է: Մեր պատասխանը խուճապահար խմբագրություն զանգահարող այս մարդկանց մեկն է լինում` դիմեք իրավապահ մարմիններին: Սակայն մինչ օրս որեւէ մեկը մեր խորհրդին չի հետեւել, նրանք նախընտրել են հեռու մնալ «շառից ու փորձանքից»՝ մտածելով, որ զանգահարած լրատվամիջոցը որեւէ տանիք կունենա եւ իրենց դիմումը կշրջվի իրենց դեմ, ասենք, սուտ մատնություն հոդվածով:

Երեկ հայտնի դարձավ, որ «Անալիտիկի» գործով իրավապահներին դիմողը պատգամավոր Տիգրան Ուրիխանյանն է եղել: Վերջինս եւ ԱԱԾ տնօրեն Գեորգի Կուտոյանը երկու քրոջ որդիներ են: Սոցիալական ցանցերում էլ քննարկում էին, թե ինչպես է լրատվամիջոցի ղեկավարը, իմանալով այս ազգակցական կապի մասին, Ուրիխանյանի հետ նման հարաբերությունների մեջ մտել: Օրվա վերջում Ուրիխանյանը նույնպես հաստատեց, որ ինքն է եղել իրավապահներին դիմող պատգամավորը: Պատգամավորի գրասենյակը հայտարարություն տարածեց, որտեղ նշվում էր, որ Ուրիխանյանը բարձր է գնահատում իրավապահ մարմինների կողմից դրսեւորված պրոֆեսիոնալիզմն ու ադեկվատ արձագանքը: «Գիտակցելով, որ սանձարձակ անձնավորությունը իգական սեռի է, եւ հուսալով, որ նա կարող է երբեւէ դարձի գալ ու ապրել բարոյական կյանքով, չի պատրաստվում (Ուրիխանյանը) ցուցմունքներ տալ նրա դեմ, առավելեւս նրա օգնականի դեմ, որն իր հերթին, վստահ ենք` Անի Հովհաննիսյանի «քաշվածն է»: Թող օրենքը որոշի հետագա ընթացքը»,- ասված է հայտարարության մեջ: Հայտարարությունն ունի նաեւ ինքնարդարացման երանգներ, որովհետեւ հանրային գիտակցության մեջ Ուրիխանյանի արարքը հայտնի որակումների է արժանանում, ինչին կարելի էր հանդիպել նաեւ երեկ ֆեյսբուքյան քննարկումներում:

Ֆեյսբուքն ու լրատվամիջոցները բավական ուրույն ձեւով արձագանքեցին կատարվածին: Ոմանք դժգոհություն էին հայտնում, որ լրատվական դաշտի շնաձկներին թողած, երիտասարդ մի աղջկա են ձերբակալել՝ մոտավորապես «գլխից է պետք բռնել» ոճի մեջ: Ոմանք պարզապես զարմանք էին արտահայտում կատարվածի վերաբերյալ: Լրագրողական համայնքի արձագանքը, սակայն, չափազանց զգուշավոր էր: Այն, ինչ կատարվել է, նման է մեղվի փեթակը խառնելուն, ինչը, իհարկե, ոչ մեկին պետք չէ: Հայաստանում կոռուպցիան, անազնիվ ճանապարհով հարստանալու, անաշխատ փող «ուտելու» երեւույթը արմատախիլ անելու մասին առաջին հերթին գրում են լրագրողները, իսկ վերջին պատերազմական իրադարձություններից հետո այս թեմայով տեքստերը առավել հուզական եւ բարձրագոչ են դարձել: Բայց որպեսզի դրանք ցանկալի ազդեցությունն ունենան եւ երկրում ու հանրային գիտակցության մեջ որեւէ բան փոխեն, առնվազն պետք է, որ հեղինակները նույն երեւույթի մասնիկը չլինեն: Վերջին շրջանում, սակայն, լրագրողները այնքան հանգիստ են սկսել խոսել աշխատանքի այս «ճյուղի» մասին, կարծես թե հենց այդպես էլ պետք է լիներ: Երեկ ոչ միայն փորձ արվեց Տիգրան Ուրիխանյանին մեղադրել իրավապահներին դիմելու համար, այլեւ շատ արագ տեղեկություններ սկսեցին շրջանառվել, թե ձերբակալությունը խորհրդարանի շենքում ինչ-ինչ ինտրիգների արդյունք է: Նշվեց, որ Անի Հովհաննիսյանին հովանավորում է ԱԺ լրատվության եւ հասարակայնության հետ կապերի վարչության պետ Արսեն Բաբայանը եւ վերջինիս ցուցումով է նա տարբեր պատգամավորների մասին նյութեր տպագրում:

Ինչ-որ հովանավորի մասին ակնարկ կար նաեւ Ուրիխանյանի գրասենյակի տարածած հայտարարության հետեւյալ հատվածում. «Անշուշտ, հիշյալ անձի արարքները կարելի էր արհամարհել, եթե չնկատվեր նրա սանձարձակ հանդգնությունն ու հղումով ազդեցիկ հովանավորների վրա անպատժելիության զգացումը»: Արսեն Բաբայանը հերքեց այս մեղադրանքները` հայտարարելով, որ իրեն զրպարտել են եւ ինքը այդ ուղղությամբ օրենսդրությամբ վերապահված որոշակի գործողություններ կիրականացնի: Եթե Բաբայանը չմտքափոխվի եւ իսկապես օրենքով սահմանված գործողությունների դիմի, կծիկը կարող է դեռ երկար բացվել, եւ անկանխատեսելի է, թե դաշտում էլ ինչ բացահայտումներ կլինեն: Կարող են նաեւ գտնվել այլ գործիչներ, ովքեր նմանատիպ բողոքով իրավապահներին կդիմեն: Իրադարձությունների զարգացման այս սցենարը, սակայն, ֆանտաստիկայի ժանրից է թվում: Ավելի հավանական է, որ շահագրգիռ կողմերի համատեղ ուժերով այս պատմությունը արագ մոռացության կմատնվի, ինչպես հաջողությամբ մոռացության են մատնվում բոլոր այն կոռուպցիոն գործերը, որոնց թելերը տանում են դեպի վեր եւ ընդգրկում են մեծ թվով պաշտոնյաների:

Այսօր արդեն տեղեկություններ են շրջանառվում, որ Անի Հովհաննիսյանը հարցաքննության ժամանակ ասել է, որ պատրաստ է տալ տարբեր պաշտոնյաների անուններ, ովքեր իր հետ համագործակել են, ինֆորմացիա են փոխանցել այս կամ այն անձի վերաբերյալ: Ըստ, որոշ լրատվամիջոցների, նա նաեւ ասել է, որ կհայտի այն անձի անունը ում ուղղորդմամբ որ նման գործունեություն է ծավալել, պայմանով, որ իրեն ազատ կարձակեն: Գործը այժմ հանձնված է գլխավոր դատախազ Գեւորգ Կոստանյանին: