Ինչպես կասեր Սերժ Սարգսյանի տատիկը` բա սրա համար էինք հավաքվե՞լ

Մոտ մեկ ամիս առաջ Ադրբեջանի կողմից սանձազերծված պատերազմական գործողություններից հետո թերեւս բոլորին ակնհայտ դարձավ, որ մենք չունենք խնդիրներ մեր զինուժի խիզախության ու արիության հարցում, սակայն լրջագույն խնդիրներ ունենք թիկունքում:

Ակնհայտ դարձավ, որ մեր տնտեսությունը իր այս կառուցվածքով ու կառավարմամբ ի վիճակի չէ համարժեք մատակարարում ապահովել ռազմաճակատին: Ակնհայտ դարձավ նաեւ, որ թիկունքում անհրաժեշտ են արմատական փոփոխություններ, որ տնտեսության ներկա քրեաօլիգարխիկ, մոնոպոլիզացված կառուցվածքը պետք է հիմնովին ջախջախվի ու սկսի զարգանալ ժամանակակից, իրապես մրցակցային, կոռուպցիայից, ստվերից, հովանավորչությունից զերծ ճանապարհով:

Սա պարզապես ակնհայտ է, եւ մինչ օրս ոչ ոք կասկած չի հայտնել սրա շուրջ: Պարզվում է, սակայն, որ սա ակնհայտ չէ միայն իշխանության համար: Երկու ամենաբարձրաստիճան պաշտոնյաները նախօրեին իրարից անկախ ելույթներ են ունեցել ու իրարից անկախ ապացուցել, որ ամենեւին չեն ընկալում պահի լրջությունը, հույսները դրել են բացառապես մեր զինվորների խիզախության ու անձնազոհության վրա եւ որեւէ շոշափելի փոփոխության կարիք չեն տեսնում:

Սերժ Սարգսյանը հանդիպել էր հանրային խորհրդի անդամների հետ, իսկ Հովիկ Աբրահամյանը գնացել էր Լոռու եւ Տավուշի մարզեր: Հիմա տեսնենք թե ինչ են մտածում ու ասում մեր «երեւելիները»:

Սերժ Սարգսյանի ելույթն ամբողջությամբ չի հրապարակվել, սակայն աշխատակազմի կողմից հրապարակած մի հատվածը լրիվ բավարար է կարծիք կազմելու համար: «Փոփոխություններ եղել են եւ շատ են լինելու... Խառնվել են սաղ իրար, փոխանակ գնան մարդկանց հետ զրուցեն, մարդկանց բացատրեն, որն ա մեր նպատակը, ինչ պետք ա անենք, որ ավելի ուժեղ լինենք»,- ասում էր Սերժ Սարգսյանը: Թե ի՞նչ փոփոխությունների մասին է խոսքը, պարզ է դառնում նրա ելույթի հաջորդ հատվածից. «Ներքին կյանքում, նորից եմ ասում, եղել են փոփոխություններ, էդ փոփոխությունները շարունակվելու են: Ապրիլ ամսին պետեկամուտների նախարարությունը հավաքագրել է 100 միլիարդ դրամ: Նու, մոտավորապես 100 միլիարդ դրամ: Մեր երկրի պատմության մեջ էդպիսի բան չի եղել»,- ասում է նա: Ըհըըը: Ամեն ինչ հասկանալի է: Ուրեմն Սերժ Սարգսյանի համոզմամբ լիքը փոփոխություն է արվել, եւ այդ փոփոխությունների արդյունքում 100 միլիարդ դրամ է հավաքագրվել պետբյուջե, ինչը աննախադեպ է: Այսինքն, սա փոփոխությունների այն գագաթնակետն է, որին ձգտում է Սերժ Սարգսյանը եւ որին հասել է:

Հիմա նայենք՝ արդյոք ապրիլ ամսին հավաքագրված 100 միլիարդը աննախադե՞պ է: Նու, մոտավորապես 100 միլիարդը: Իրականում պետեկամուտների կոմիտեն այս ապրիլին հավաքագրել է 97 միլիարդ դրամ: Դրամի արժեզրկման էֆեկտը բացառելու համար վերածենք այն դոլարի ու կստացվի 204 միլիոն դոլար: Սա իրոք 13 միլիոն դոլարով ավելի է, քան անցած տարվա ապրիլին, բայց 22 միլիոն դոլարով պակաս է 2014 թվականի ապրիլի ցուցանիշից: Այնպես որ, հավաքագրման մակարդակը շատ բարձր չէ, նու, աննախադեպ չէ: Եվ ուրեմն, ստացվում է, որ պետք է գնալ, մարդկանց հետ զրուցել, մարդկանց բացատրել, որ պետք է մի քանի միլիարդ դրամով ավելի շատ բյուջե հավաքել ու դա բավարար է ավելի ուժեղ լինելու համա՞ր: Դա՞ է մեր նպատակը: Ընդամենը դա՞: Դա բավարա՞ր է այնքան ուժեղ լինելու համար, որ թշնամու մտքով չանցնի անգամ պարսատիկով մեր ուղղությամբ կրակելու համար: Բա մենք էլ կարծում էինք, թե նպատակը իրոք ժամանակակից տնտեսություն ունենալն է, որ մեր բյուջեն ու հետեւաբար ռազմական ծախսերը աճեն ոչ թե մի քանի խղճուկ միլիարդ դրամով, այլ մի քանի միլիարդ դոլարով: Ինչպես կասեր նույն Սերժ Սարգսյանի իմաստուն տատիկը, «Բա սրա համար ե՞նք հավաքվել»:     

ՀՀ վարչապետ Հովիկ Աբրահամյանն էլ նախօրեին Նոյեմբերյանի մշակույթի տանը կայացած հանդիպման ժամանակ, անդրադառնալով պետական ծախսերի անարդյունավետության մասին թեմային, ըստ «Առավոտի», բառացիորեն ասել է. «Ռեսուրսները փորձում ենք արդյունավետ օգտագործել: Դատարկ խոսակցություններ շատ մի լսեք, որ մամուլում տարածում են, պատվիրատու լրատվամիջոցներին նկատի ունեմ, որոնք տարբեր սուտ, անհիմն տեղեկատվություններով մարդկանց գցում են այլ կարծիքների, մտքերի մեջ: Դա ճիշտ չէ, իրականություն չէ»:

Այսինքն, որ ասում են մոտ 220 միլիոն դոլար ծախսել են ու Դիլիջանում 7 աստղանի կոմֆորտով «ուսումնական կենտրոններ» են սարքել ԿԲ-ի ու ՊԵԿ-ի համար, որ ասում են հարյուր հազարավոր դոլարներ տվել են՝ ոստիկանության համար խմածություն չափող «ոսկեջրած» սարքեր են գնել եւ այլն ու դա ռեսուրսների անարդյունավետ ծախս է, նշանակում է՝ «պատվիրատու մամուլ են», «դա ճիշտ չէ, իրականություն չէ»...: Իսկ սա էլ նշանակում է, որ 150 հատ T-90 տանկ առնելու փոխարեն բյուջեի այդ միջոցներով «կայֆավատների էլիտար օբեկտներ» կառուցելը ճիշտ է եւ կառավարությունը շարունակելու է այդպես «արդյունավետ» ծախսել ռեսուրսները: Հովիկ Աբրահամյանի տատիկն էլ նման դեպքերի համար մի իմաստուն բան հաստատ ասած կլինի, բայց դա մեզ, ցավոք, հայտնի չէ: