Եվրոպական ֆուտբոլ. Զարմանահրաշ փաստեր

Եվրոպական առաջատար ֆուտբոլային երկրներում արդեն հայտնի են չեմպիոնները, եւ միայն Իսպանիայում ամեն ինչ վճռվելու է առաջիկա հանգստյան օրերին կայանալիք վերջին տուրում:

Թուրինի «Յուվենտուսը» 5-րդ անգամ անընդմեջ նվաճել է Իտալիայի չեմպիոնի կոչումը (ընդհանուր՝ 34-րդ անգամ), Փարիզի «Պարի Սեն Ժերմենը» 4-րդ անգամ անընդմեջ՝ Ֆրանսիայի չեմպիոնի կոչումը (ընդհանուր՝ 6-րդ անգամ), Մյունխենի «Բավարիան» 4-րդ անգամ անընդմեջ հռչակվեց Գերմանիայի չեմպիոն (ընդհանուր՝ 26-րդ անգամ), «ՊՍՎ Էյնդհովենը» 2-րդ անգամ անընդմեջ նվաճեց Հոլանդիայի չեմպիոնի կոչումը (ընդհանուր՝ 23-րդ անգամ), «Լեսթերն» էլ պատմության ընթացքում 1-ին անգամ նվաճեց Անգլիայի չեմպիոնի կոչումը:

Եվրոպական առաջատար երկրներից միայն Իսպանիայում է շարունակվում չեմպիոնական պայքարը. վերջին տուրից առաջ երկրի գործող չեմպիոն «Բարսելոնան» 1 միավորի առավելություն ունի Չեմպիոնների լիգայի եզրափակիչի ուղեգիր ձեռք բերած Մադրիդի «Ռեալից»: Առաջիկա կիրակի, Երեւանի ժամանակով 19:00-ին կմեկնարկեն «Գրանադա» - «Բարսելոնա» եւ «Դեպորտիվո» - «Ռեալ Մադրիդ» հանդիպումները: Չեմպիոնի կոչումը նվաճելու համար Մադրիդի թիմին անհրաժեշտ է միայն ու միայն հաղթանակ, նաեւ՝ «Բարսելոնայի» կողմից միավորների կորուստ: Մնացած դեպքերում («Ռեալը» չի հաղթում կամ «Բարսելոնան» հաղթում է) Իսպանիայի չեմպիոնի կոչումը նվաճելու է «Բարսելոնան»:

  Առայժմ «հանգիստ» թողնենք Իսպանիային եւ վերադառնանք այն երկրներին, ուր հայտնի են չեմպիոնները: Բավական հետաքրքիր, անգամ զարմանալի թվեր ու փաստեր են արձանագրվել վերջին օրերին հատկապես Անգլիայի չեմպիոն «Լեսթերի» հետ կապված: Ներկայացնեմ մի քանիսը.

- 1996 թվականի մայիսի 2-ին դանիացի Պետեր Շմեյխելը «Մանչեսթեր Յունայթեդի» կազմում նվաճեց Անգլիայի չեմպիոնի կոչումը. ուղիղ 20 տարի անց՝ 2016 թվականի մայիսի 2-ին Պետերի որդին՝ Կասպեր Շմեյխելը «Լեսթերի» կազմում հռչակվեց Անգլիայի չեմպիոն: Ներկայումս անգլիական բուքմեյքերները 250/1 հարաբերությամբ խաղադրույքներ են ընդունում, որ Պետեր Շմեյխելի թոռը նույնպես նվաճելու է Անգլիայի չեմպիոնի կոչումը:

- Հունիսի 13-ին Մյունխենի «Բավարիայի» ֆուտբոլիստ, ֆրանսիացի Կինգսլի Կոմանը նշելու է ծննդյան 20 - ամյակը. մինչ այժմ Կոմանը արդեն 2 անգամ նվաճել է Ֆրանսիայի, 1-ական անգամ՝ Իտալիայի եւ Գերմանիայի չեմպիոնի կոչումները: 65- ամյա իտալացի Կլաուդիո Ռանիերին ֆուտբոլիստի եւ մարզչի 43 տարվա կարիերայի ընթացքում առաջին անգամ լուրջ նվաճում ունեցավ՝ «Լեսթերի» գլխավոր մարզչի պաշտոնում հռչակվեց Անգլիայի չեմպիոն:

- Վերջին օրերի ընթացքում հաջողությունը ուղեկցում է անգլիական «Լեսթերի» սեփականատեր, թաիլանդցի միլիարդատեր Վիշայ Շրիվադանապրաբհային. իր թիմի չեմպիոնական կոչումը նվաճելու կապակցությամբ Վիշայը ընկերների հետ խնջույք է կազմակերպել, որից հետո այցելել է խաղատուն եւ թղթախաղի միջոցով իր կարողությունը ավելացրել է 2,5 միլիոն ֆունտով: Մոտ 3 միլիարդ եվրո կարողություն ունեցող Վիշայը 2010 թվականին «Լեսթերը» գնել էր 50 միլիոն եվրոյով: Անգլիայի չեմպիոնի կոչումը նվաճելու կապակցությամբ «Լեսթերը» ստանալու է 190 միլիոն եվրո. թիմի սեփականատերը խոստացել է բոլոր ֆուտբոլիստներին պարգեւատրել «Մերսեդես» մակնիշի ավտոմեքենայով, իսկ մայիսի 7-ին կայացած «Լեսթեր» - «Էվերտոն» հանդիպման ընթացքում ստադիոն եկած բոլոր ֆուտբոլասերները ստացել են անվճար գարեջուր եւ պիցա:

- Ավստրալացի դարպասապահ, 44-ամյա Մարկ Շվարցերը միակ մարդն է, որ վերջին 2 տարիներին նվաճել է Անգլիայի չեմպիոնի կոչումը՝ անցյալ տարի «Չելսիի», այս տարի «Լեսթերի» կազմում: Հետաքրքիր է, որ Շվարցերը ե՛ւ «Չելսիի», ե՛ւ «Լեսթերի» կազմում չի անցկացրել ոչ մի հանդիպում, բայց եղել է հայտացուցակում:

- Հայտնի իտալացի օպերային երգիչ Անդրեա Բոչելին «Լեսթերի» գլխավոր մարզիչ Կլաուդիո Ռանիերիի հետ տարիներ առաջ գրազ էր եկել, որ եթե վերջինիս հաջողվի երբեւէ նվաճել չեմպիոնական կոչում, ապա կերգի հենց ստադիոնում: Հայտնի տենորը կատարել է խոստումը. մայիսի 7-ին կայացած «Լեսթեր» - «Էվերտոն» հանդիպումից առաջ Բոչելին կատարել է «Տրուբադուր» օպերայից մի հատված հենց ստադիոնում՝ Ռանիերիի եւ 32 հազար հանդիսականների ներկայությամբ: Ի դեպ, Ռանիերին Անգլիայի չեմպիոնի կոչումը նվաճելու համար ստանալու է 6,4 միլիոն եվրո պարգեւավճար. «Լեսթերի» հետ կնքած պայմանագրում նախատեսված էր, որ իտալացի մասնագետը կստանա 128 հազար եվրո 18-րդ տեղից բարձր յուրաքանչյուր հորիզոնականի, ինչպես նաեւ բոնուսներ եվրագավաթների գոտում հայտնվելու համար:

- 5000/1՝ այսպիսի հարաբերակցությամբ էին անգլիական բուքմեյքերները մրցաշրջանի մեկնարկից առաջ խաղադրույքներ ընդունել «Լեսթերի» չեմպիոնության վերաբերյալ: Համեմատության համար նշենք, որ նույն բուքմեյքերները Քիմ Քարդաշյանի՝ ԱՄՆ նախագահ դառնալու հավանականությունը գնահատել են 2000/1 հարաբերակցությամբ: