Մենք` բաժնետեր, դուք` սպասող. խաղողագործներն ընտրել են դպրոցի դասերը տապալելու տարբերակը

Երեկ ու դրա նախորդ օրը ամբողջությամբ կամ մասնակի տապալվել են Արարատի մարզի Քաղցրաշեն համայնքի միջնակարգ դպրոցի դասերը՝ ի նշան աշակերտների ընտանիքների բողոքի, որոնք ամիսներ շարունակ չեն կարողանում ստանալ մթերված խաղողի գումարը: 

Միառժամանակ առաջ չկատարվող վճարումների խնդրի վրա ՀՀ կառավարության շենքի մոտ ուշադրություն հրավիրող քաղցրաշենցիները հայտարարել էին, որ հարցին լուծում չտրվելու դեպքում դասադուլ են կազմակերպելու՝ երեխաներին դպրոց չուղարկելով: Ավելի ուշ, փաստորեն, խոսքը գործի են վերածել: Գյուղացիներից երեկ տեղեկացանք, որ մտադիր են այս ձեւով պայքարը շարունակել այնքան ժամանակ, քանի դեռ գումարները չեն ստացել: Նրանք այլ ելք չեն տեսնում, քանի որ պատկան մարմինները շարունակ ժամկետներ են նշել, բայց հետեւողական չեն գտնվել: ՀՀ վարչապետ Հովիկ Աբրահամյանն էլ, ըստ նրանց, խոստացել էր, որ մինչեւ մայիսի 10-ը գումարները մաս-մաս պիտի վճարված լինեին: Նշված ժամկետի ավարտին կառավարության շենքի մոտ եւս մեկ անգամ բողոքի ցույց կազմակերպելուց հետո քաղցրաշենցիները անցել են խոստացված մարտավարությանը:

Դպրոցի տնօրեն Թաթուլ Աբրահամյանը մեզ հետ զրույցում ասաց, որ առաջին օրն ընդհանրապես դաս չի եղել, իսկ արդեն երկրորդ օրը, այսինքն՝ երեկ, որոշ աշակերտներ հաճախել են դպրոց: Դպրոցն ունի 300 աշակերտ, այդ օրը դասի են գնացել նրանց միայն տասը տոկոսը: Հարցին, թե այդ աշակերտներն այն ընտանիքների երեխաներն են, որոնք մթերման գումարի խնդիր չունեն, տնօրենը պատասխանեց. «Նաեւ: Չի կարելի այդպես բացարձակ ասել»: Դասադուլին զուգահեռ ծնողները բողոքի ակցիա են անցկացրել դպրոցի մոտ գտնվող մարզադաշտում: Տնօրենը հույս ունի, որ այսօրվանից արդեն դասերը կընթանան բնականոն հունով, որովհետեւ թե՛ գյուղատնտեսության նախարարության, եւ թե՛ խաղող մթերող կազմակերպության ներկայացուցիչներն, ըստ նրա, գյուղացիներին խոստացել են առաջիկայում անպայման լուծում տալ խնդրին: Թաթուլ Աբրահամյանի գնահատմամբ, բողոքի ակցիայի այսպիսի դրսեւորումը նախադեպ դարձավ, իսկ դասերի հաշվին գործելը ծնողների համար ճարահատյալ քայլ էր: «Եթե կրթության տեսանկյունից նայենք, դա բացասական էր, բայց ծնողներն ուրիշ ելք չունենալու պատճառով դա են ընտրել՝ հասկանալով, որ խոչընդոտում են կրթության ընթացքը, ինչն իրենց երեխաների ապագայի վրա կարող է ազդեցություն ունենալ»,- ասաց նա: 

Արարատի մարզպետարանի աշխատակազմի կրթության, մշակույթի եւ սպորտի վարչության կրթության բաժնի պետ Ալբերտ Մկրտչյանը նույնպես մեր զրույցում հույս հայտնեց, որ Քաղցրաշենի միջնակարգ դպրոցում այսօրվանից դասապրոցեսը կվերականգնվի ամբողջ ծավալով: Երկարամյա աշխատանքային փորձ ունեցող մասնագետը եւս նկատեց, որ իր պրակտիկայում նման դեպք առաջին անգամ է հանդիպում, երբ որպես այս կամ այն խնդրի լուծման տարբերակ ընտրվում է երեխաներին դպրոց չուղարկելը:

«Բնակչությունը հավաքվել է դպրոցի մոտ եւ փորձում է խոչընդոտել դպրոցի դասերը, որպեսզի դրանով ուշադրություն գրավի: Երեկ էլ, այսօր էլ մենք այցելել ենք դպրոց: Այսօր, ճիշտ է, աշակերտների թվաքանակը փոքր էր, բայց դասապրոցեսը ընթանում էր: Կոլեկտիվի հետ ենք խոսել, ծնողների հետ ենք զրուցել՝ հաշվի առնելով ուսումնական տարվա ավարտը, որից ընդամենը մի քանի օր է մնացել, եւ դպրոցը բավականին խնդիրներ ունի լուծելու՝ տարին ամփոփելու՝ կիսամյակային գրավորներ, տարեկան գնահատականներ եւ այլն, իսկ մայիսի 27-ին վերջին դասն է»,- երեկ ասաց կրթության բաժնի պետը: 

«Ծնողների հետ բացատրական աշխատանքներ են տարվել, որ վաղը ամբողջովին դպրոցը պետք է աշխատի: Կարծում ենք՝ այդպես կլինի, որովհետեւ դա բխում է առաջին հերթին աշակերտների եւ ծնողների շահից: Երեխաները չպետք է տուժեն ստեղծված իրավիճակում: Ծնողներին բացատրվել է, որ եթե խնդիր ունեն, պիտի փորձեն այլ ճանապարհով այդ մասին բարձրաձայնել, լուծել, բայց ոչ թե աշակերտների միջոցով: Կարծում եմ, որ բոլորն էլ հասկացել են: Հույս ունենք եւ ակնկալում ենք, հավանականությունը շատ մեծ ենք համարում, որ վաղը նորմալ հունով դպրոցը կսկսի աշխատել»,- շարունակեց նա:

Նշենք, որ քաղցրաշենցի խաղողագործներին պարտք է «Վինար» ընկերությունը: Վճարման ենթակա գումարն ընդհանուր առմամբ կազմում է մոտ 185 միլիոն դրամ: Գործարանը գյուղացիների արտադրանքը մթերել է անցյալ տարի: Շուտով հաջորդ բերքը ստանալու ժամանակն է, իսկ նախորդի վրա թափած չարչարանքի արդյունքը գյուղացին դեռ չի տեսել: «Վինարի» սեփականատերերն, ի դեպ, Ավետ Գալստյանը եւ ԱԺ պատգամավոր Կարո Կարապետյանն են (Յուվեցի Կարո): Երեկ «Ազատություն» ռադիոկայանի՝ խնդրի վերաբերյալ թոք շոուի ժամանակ Ավետ Գալստյանը նկատեց, որ ինքը եղել է Իտալիայում եւ տեղյակ է, որ այնտեղ կա գործարան, որին բերք հանձնող 700 խաղողագործները այդ ընկերության բաժնետերեր են, ինչը նշանակում է, որ խաղողագործներն օգտվում են միայն վերջնական արդյունքից: Թոք շուին ներկա գյուղացիների մի մասը զայրացան, հայտարարեցին, որ իտալիաներն իրենց չեն հետաքրքրում, այլ միայն այն, թե երբ է վճարվելու գումարը, ապա եւ լքեցին տաղավարը: Իսկ հայաստանյան գործարանի սեփականատերը, ի տարբերություն Իտալիայում գտնվողի, խաղողագործին չի առաջարկում բաժնետեր դառնալ ու հետեւաբար ավելի մեծ եկամուտ ակնկալել: Իտալական տարբերակից նրան գրավում է գյուղացու երկար սպասելու հատվածը միայն: