Աշոտյանի նվերը վերադարձնելուց հետո ԿԳՆ աշխատակազմի ղեկավարը մնացել է առանց ավտոմեքենայի

ՀՀ կրթության եւ գիտության նախարարության աշխատակազմի ղեկավար Նաիրի Հարությունյանը մնացել է առանց ծառայողական ավտոմեքենայի, որովհետեւ որոշում է ընդունվել նախկին նախարարին սպասարկող «Ֆոլկսվագեն տուարեգ» մակնիշի մեքենան վերադարձնել կրթության ազգային ինստիտուտ:

Այդ ջիփը կրթության ազգային ինստիտուտը, հիշեցնենք, տարիներ առաջ նվիրել-տրամադրել էր ԿԳՆ-ին` այն ժամանակ գործող նախարար Արմեն Աշոտյանին սպասարկելու նպատակով:  Իսկ նախարարի համար հատկացված պետական մեքենան` «Տոյոտա քեմրի»-ն, փոխանցվել էր աշխատակազմի ղեկավարին: Բայց հետագայում նորանշանակ նախարար Լեւոն Մկրտչյանը հրաժարվեց Աշոտյանի մեքենայից` նախընտրելով կառավարության որոշմամբ նախարարի համար նախատեսված «Տոյոտա»-ն: Նշվում էր, որ «թափուր մնացած» «Ֆոլկսվագեն տուարեգ»-ը գուցե մեկ այլ պաշտոնյայի սպասարկի, մասնավորապես աշխատակազմի ղեկավարին, որը, փաստորեն, առանց երկաթե նժույգի էր մնացել, բայց տարիներ շարունակ Արմեն Աշոտյանի համար աշխատած  «Ֆոլկսվագենն», ի վերջո, «տուն» վերադարձավ:

Կրթության եւ գիտության նախարարության պաշտոնական կայքում հրապարակվել է գերատեսչության ավտոմեքենաների ցանկը` ըստ մակնիշների, արտադրության տարեթվի, շարժիչի հզորության եւ պետհամարանիշի: Դրանց թիվն, ընդհանուր առմամբ, 8-ն է: Ըստ այդ տեղեկատվության, նախարարին սպասարկում է 2013 թվականի արտադրության «Տոյոտա քեմրի»: Երկու փոխնախարարներին` «Տոյոտա կորոլա»` դարձյալ 2013 թվականի արտադրության: Կրթության պետական տեսչության պետի համար օրենսդրորեն նախատեսված է «Նիսան Մաքսիմա», որը 2004 թվականի արտադրության է, Լեզվի պետական տեսչության պետի համար` «ՎԱԶ 21214»` 2006 թվականի, Բարձրագույն որակավորման հանձնաժողովի նախագահի ծառայողական ավտոմեքենան «ԳԱԶ 3102121» մակնիշի է` նույնպես 2006 թվականի, լիցենզավորման գործակալության պետն ունի «Նիսան Մաքսիմա», որը 2007 թվականի է, բայց, ըստ նույն աղբյուրի, գտնվում է ոչ բարվոք վիճակում: Իսկ ինչ վերաբերում է ԿԳՆ աշխատակազմի ղեկավարի ծառայողական ավտոմեքենային, դրան վերաբերող տողը նշված ցանկում դատարկ է: Առաջիկա ծրագրերում էլ կարծես այդ պաշտոնյային փոխադրամիջոցով ապահովելու խնդիր չկա:

«Այս պահին կարող եմ ասել, որ ավտոմեքենա չկա: Աշխատակազմի ղեկավարի համար օրենքը բնականաբար թույլատրում է ունենալ ծառայողական ավտոմեքենա, բայց պետք է այն գոյություն ունենա: Հնարավորություն լինելու դեպքում ձեռք կբերենք»,- մեր հարցին պատասխանելով` ասաց ԿԳՆ աշխատակազմի ղեկավար Նաիրի Հարությունյանը: Իսկ թույլատրվելուց բացի ինչ միջոցներով պետք է դա ձեռք բերվի` բյուջեից հատուկ այդ նպատակի համար հատկացո՞ւմ է արվելու: «Ստացվում է` դուք ավելի անհանգիստ եք ինձ համար, քան ինքս: Ես մեծ սիրով իմ անձնական ավտոմեքենայով հաճախում եմ աշխատանքի, գնում եմ տուն, դրանից շատ չեմ նեղվում, խնդրում եմ դուք էլ մի նեղվեք: Ես ծանր չեմ տանում ծառայողական ավտոմեքենա լինել-չլինելու հանգամանքը: Կստացվի, բյուջեից փող կտրամադրեն, ձեռք կբերենք, չի լինի, ես դրանից շատ չեմ տխրի: Առողջություն լինի եւ երջանկություն, ավտոմեքենան առաջնային չէ: Ես իմ անձնական ավտոմեքենան ամեն օր մեծ սիրով, հաճույքով ինքս վարում եմ եւ գալիս եմ աշխատանքի»,- ասաց Նաիրի Հարությունյանը: Հարցին, թե ինչ է եղել մարդատար այն տրանսպորտային միջոցը, որը պետք է որ մինչեւ «Ֆոլկսվագեն տուարեգ» նվերի ի հայտ գալը սպասարկած լինի ԿԳՆ աշխատակազմի ղեկավարին, նա պատասխանեց. «Ժամանակին, եթե մի քիչ ավելի հետ գնանք, աշխատակազմի ղեկավարին սպասարկում էր այլ մեքենա: Ես այդ ժամանակ չեմ աշխատել, բայց իմ ունեցած տեղեկություններով «ԳԱԶ 31» մակնիշի ավտոմեքենա է եղել: Դա օտարվել է: Պետք է փոխարենը նորը ձեռք բերվի, հիմա այս պահին հնարավորություն չկա, ձեռք չի բերվում, որեւիցե ողբերգություն այդտեղ չկա»:

Վերադառնալով պետական մարմիններին սպասարկող ծառայողական ավտոմեքենաների ցանկը հրապարակային դարձնելու պահանջին` նշենք, որ դա ներկայացվեց ընդամենը վերջերս, երբ կառավարությունը սկսեց անհաշտ պայքար մղել հին ու նոր ավտոմեքենաների դեմ ու նաեւ հաշվետու լինելու հրամայական առաջացավ: Այժմ արդեն գերատեսչություններն իրենց պաշտոնական կայքերում հրապարակում են ծառայողական ավտոմեքենաների ցանկը: Մշակույթի նախարարությունում էլ այդ ցանկը կազմված է տրանսպորտային 7 միջոցից: Մեկական «Տոյոտա քեմրի» սպասարկում է մշակույթի նախարարին ու նրա տեղակալներից երկուսին: Նախարարինը 2013 թվականի արտադրության է, փոխնախարարներինը` 2008:  Մշակույթի երրորդ փոխնախարարի, ինչպես նաեւ աշխատակազմի ղեկավարի ծառայողական ավտոմեքենաները «Հոնդայի սոնատա» մակնիշի են` 2010 թվականի արտադրության: Մշակութային արժեքների պահպանության գործակալության պետին սպասարկում է «Պեժո 406»` 2004 թվականի արտադրության, իսկ պատմության եւ մշակույթի հուշարձանների պահպանության գործակալության պետի համար նախատեսված է «ԳԱԶ 31-10», որը թողարկվել է 1998 թվականին: