Ֆուտբոլ. Եվրոպայի առաջնություն. Հրաշալի երեկոներ

Այսօր եւ վաղը ֆուտբոլասերներին սպասվում են անչափ հետաքրքիր 2 հանդիպումներ. «Եվրո 2016»-ի քառորդ եզրափակիչում նախ մրցելու են եվրոպական ամենատիտղոսակիր հավաքականները՝ Գերմանիան եւ Իտալիան, հետո էլ տանտերերը՝ Ֆրանսիայի հավաքականը հանդիպելու է աշխարհի ամենահամակրելի թիմին՝ Իսլանդիային: Ցանկացած մեծ մրցաշարերում, լինեն դրանք Աշխարհի կամ Եվրոպայի առաջնություններ, կան հավաքականներ, որոնք, անկախ ցանկացած հանգամանքից, համարվում են ֆավորիտներ: Նման թիմերից են Գերմանիան եւ Իտալիան: Մինչ այժմ կայացած Աշխարհի 20 եւ Եվրոպայի 14 առաջնություններում (ընդհանուր առմամբ՝ 34 մրցաշար) Գերմանիան եւ Իտալիան համատեղ նվաճել են 12 տիտղոս. Գերմանիան 4 անգամ դարձել է Աշխարհի, 3 անգամ էլ Եվրոպայի չեմպիոն, իսկ Իտալիան Աշխարհի 4 չեմպիոնական տիտղոսների հետ մեկտեղ 1 անգամ էլ դարձել է Եվրոպայի չեմպիոն:

Տիտղոսների առումով այս թիմերի մեջ առավելություն ունի Գերմանիան, բայց ահա Աշխարհի եւ Եվրոպայի առաջնություններում նրանց միջեւ կայացած հանդիպումներում դեռ երբեք գերմանացիները չեն կարողացել հաղթել: Աշխարհի եզրափակիչ առաջնություններում Գերմանիան եւ Իտալիան հանդիպել են 5 անգամ. 3 անգամ հաղթել են իտալացիները, 2 անգամ էլ արձանագրվել է ոչ-ոքի, ընդ որում, 1982 թվականին Իտալիան Գերմանիային հաղթել է Աշխարհի առաջնության եզրափակիչում: Եվրոպայի եզրափակիչ առաջնությունների ժամանակ կայացած Գերմանիա - Իտալիա 2 հանդիպումներից մեկում հաղթել է Իտալիան, 1 խաղում էլ արձանագրվել է ոչ-ոքի: Իրենք՝ գերմանացիներն էլ են նշում, որ Իտալիան ամենաանհարմար մրցակիցն է իրենց համար: Անցյալ՝ «Եվրո 2012»-ի կիսաեզրափակիչում ակնհայտ ֆավորիտի կարգավիճակով հանդես եկող Գերմանիան անակնկալ պարտություն կրեց Իտալիայից 1-2 հաշվով:

Բայց Գերմանիայի համար սարսափելի այս վիճակագրական տվյալների կողքին կա մեկ այլ փաստ. Գերմանիան մշտապես կարողացել է հաղթահարել «Եվրոների» քառորդ եզրափակիչի արգելքը. 5 անգամ Գերմանիան հասել է քառորդ եզրափակիչ եւ բոլոր դեպքերում հաղթել է: Կա նաեւ մեկ այլ հանգամանք, ցանկացած շարք՝ լավ կամ վատ, մի օր ավարտվում է, եւ այսօր Բորդոյում կայանալիք Գերմանիա - Իտալիա խաղում կամ Գերմանիան պաշտոնական մրցաշարերում առաջին հաղթանակը կտոնի Իտալիայի նկատմամբ, կամ էլ Իտալիան կհաղթի, եւ այս դեպքում կավարտվի Գերմանիայի՝ «Եվրոներում» քառորդ եզրափակիչների անպարտելի շարքը: «Ձերդ մեծություն Պելլե»՝ երեկ նման վերնագրով է լույս տեսել իտալական հանրահայտ «Corriere dello Sport»-ը: Ըստ իտալական թերթի՝ Իտալիայի հավաքականի հարձակվող Գրացիանո Պելլեն ոչ միայն ֆուտբոլի Արքա Պելեի անվանակիցն է, այլ նաեւ կարող է վճռական դերակատարում ունենալ Գերմանիայի հետ խաղում: Իտալիան «Եվրո 2016»-ի առաջին խաղում հաղթել է մրցաշարի ֆավորիտներից Բելգիային (2-0), 1/8 եզրափակիչում էլ պայքարից հանել է Եվրոպայի գործող չեմպիոն Իսպանիային (2-0): Այս խաղերում մեկական գոլի հեղինակ է դարձել Պելլեն: 

Իտալիան պատրաստ է Եվրոպայի չեմպիոնին տիտղոսազրկելուց հետո պայքարից հանել նաեւ Աշխարհի գործող չեմպիոն Գերմանիային: Ընդ որում, դրա համար գործի են դրվել ոչ միայն մարզական բաղադրիչները, այլեւ իտալացիներին հատուկ սնահավատությունը: Իտալիայի հավաքականի մարզաբազայում կարեւոր խաղերից առաջ մշտապես համերգ է կազմակերպվում, եւ Գերմանիայի հետ խաղից առաջ իտալացի հայտնի ռոք երգիչ Նեկն է այցելել Իտալիայի հավաքականի մարզաբազա եւ ելույթ ունեցել ֆուտբոլիստների համար: Բայց Գերմանիային հաղթելու համար Իտալիան պետք է անի մի բան, որը դեռ չի արել այս մրցաշարում ոչ մի թիմ՝ գոլ խփի Գերմանիային (թեկուզ հետխաղյա 11 մետրանոցից, եթե հանդիպման հիմական եւ լրացուցիչ ժամանակներն ավարտվեն  0-0):

Իսկ վաղը կայանալիք վերջին քառորդ եզրափակիչում Ֆրանսիան մրցելու է Իսլանդիայի հետ: Առաջին հայացքից այս խաղում դժվար է գտնել որեւէ ինտրիգ. «Եվրո 2016»-ի կազմակերպիչ Ֆրանսիան ակնհայտ ֆավորիտ է. մինչ այժմ այս թիմերի միջեւ կայացած 10 խաղերում Իսլանդիան դեռ չի հաղթել. 7 անգամ հաղթել է Ֆրանսիան, 3 խաղ էլ ավարտվել է ոչ-ոքի: Իհարկե, հիմա Իսլանդիան այլ, շատ ավելի ուժեղ, առավել եւս՝ համակրելի թիմ է եւ արդեն իսկ դարձել է այս մրցաշարի ամենամեծ անակնկալը: Ընդ որում, կարծես Իսլանդիայում հակված էլ չեն բավարարվել ձեռք բերածով: «Լրջանալու պահն է»՝ երեկ այսպիսի վերնագրով է լույս տեսել իսլանդական մարզական «Morgunblaðið» պարբերականը: «Անգլիայի նկատմամբ հաղթանակը եւ քառորդ եզրափակիչում հայտնվելը արդեն պատմություն է: Հիմա եկել է կրկին լրջանալու ժամանակը. խաղալու ենք Ֆրանսիայի դեմ»,- նշել է պարբերականը: Իսլանդիայի նորընտիր նախագահ Գուդնի Յոհանսոնն էլ հրաժարվել է կառավարական լոժայից դիտել հանդիպումը: «Ես կնստեմ տրիբունայում՝ իսլանդացի երկրպագուների հետ, մեր թիմի մարզաշապիկով: Ինչո՞ւ նստեմ VIP-ում, շամպայն խմեմ, եթե դա ես կարող եմ անել աշխարհի ցանկացած վայրում»,- ասել է Յոհանսոնը:

Ավելի շատ վիճակագրական տվյալներով հարուստ այս նյութը ցանկանում եմ ավարտել «Եվրո 2016»-ի ընթացքում մեծ մասսայականություն վայելող նախկինում հայտնի ֆրանսիացի ֆուտբոլիստ Էրիկ Կանտանայի տեսաուղերձի փոքրիկ հատվածով: «Ֆուտբոլը թվեր կամ վիճակագրություն չէ: Ֆուտբոլը վառվող սրտեր են, նպատակաուղղվածություն, աշխատասիրություն եւ տաղանդ: Ֆուտբոլը երազանք է, ուր ամեն ինչ հնարավոր է: Ֆուտբոլը կյանք է՝ իմ, քո, մեր բոլորի կյանքը»,- ասել է իրեն ֆուտբոլի «գլխավոր անձ» հայտարարած Կանտոնան: Եվ այսպես, մեզ 2 հրաշալի ֆուտբոլային երեկոներ են սպասվում. այսօր կայանալու է Գերմանիա - Իտալիա, իսկ վաղը՝ Ֆրանսիա - Իսլանդիա հանդիպումները: 2 հանդիպումներն էլ մեկնարկելու են Երեւանի ժամանակով 23:00-ին: