Բախման հետեւանքով կա 11 տուժած. «Սասնա ծռեր» ջոկատի վիրավոր անդամին ոստիկաններ են հսկում

Կիրակի` հուլիսի 17-ին, Երեւանում տեղի ունեցած զինված բախման հետեւանքով, երբ «Սասնա ծռեր» խմբավորման անդամները գրոհել էին ՀՀ ոստիկանության պարեկապահակային ծառայության (ՊՊԾ) գնդի վրա, հոսպիտալացվել է 6 մարդ: Միջադեպից հետո առողջապահական հաստատություններ դիմած անձանց ընդհանուր թիվն ավելի մեծ է:

Դատելով առողջապահության նախարարության տարածած հաղորդագրությունից, բժիշկներին են դիմել ընդհանուր առմամբ 9 անձ, որոնցից հոսպիտալացվել է 6-ը, իսկ 3-ն անհրաժեշտ բժշկական օգնություն է ստացել ամբուլատոր պայմաններում: Մեր պարզած տեղեկությունների համաձայն, բուժհաստատություններ դիմած անձանց թիվը 11-ն է, որոնցից 5-ը մինչեւ մի քանի ժամ հիվանդանոցում գտնվելուց հետո դուրս են գրվել:

Զինված միջադեպի հետեւանքով տուժածներից երեքը տեղափոխվել են «Էրեբունի» բժշկական կենտրոն: Նրանցից մեկը ոստիկան է` 40-ամյա Տիգրան Դանիելյանը, որն արդեն հաջորդ օրը դուրս է գրվել: Երկրորդը ոստիկանության օպերատոր, 1983 թվականին ծնված Ռոբերտ Հայրապետյանն է, որը նույնպես առաջիկա մեկ-երկու օրվա ընթացքում կկարողանա տուն գնալ, իսկ երրորդը, որի վիճակն ամենածանրն է, «Սասնա ծռեր» խմբավորման 26-ամյա անդամ Թաթուլ Թամրազյանն է: Նա գտնվում է վերակենդանացման բաժանմունքում:

«Հայտնի դեպքերի հետեւանքով երեկ առավոտից ընդունել ենք երեք վիրավոր`մեկը ուսահոդի ոչ հրազենային վնասվածքով, որն այսօր դուրս է գրվել, երկուսը` հրազենային վնասվածքներով: Հրազենային վիրավորում ունեցող հիվանդներից մեկի (օպերատորի.-խմբ.) մոտ առկա է աջ նախաբազկի փափուկ հյուսվածքների կույր վնասվածք, այսինքն` փամփուշտը մտել ու դուրս չի եկել: Ձեռքը վիրահատվել է, փամփուշտը հանել ենք, հիվանդի վիճակն այսօր բավարար է, հետագա բարդություններ չեն սպասվում, հավանաբար առաջիկա երկու օրը դուրս կգրենք: Մյուս հիվանդի մոտ («Սասնա ծռեր» խմբավորման անդամի.-խմբ.) առկա է որովայնի թափանցող վնասվածք` աղիքի, երիկամի վնասումով, ներքին արյունահոսությամբ: Այսօր վիրահատվել է: Վիճակը գնահատվում է ծանր, կայուն: Արհեստական շնչառության ապարատից անջատվել է: Իհարկե, կյանքին սպառնացող վտանգ կա: Նա դեռեւս տեւական բուժման կարիք ունի, միգուցե` էտապային, եւ հետագայում հնարավոր է նոր վիրահատություն: Այս ամենից հետո վիճակը երկրորդ օրվա համար այնպիսին է, ինչպիսին որ կուզենայինք տեսնել»,- լրագրողների հետ ճեպազրույցում ասաց «Էրեբունի» բժշկական կենտրոնի ընդհանուր կրծքային վիրաբուժության բաժանմունքի վարիչ Արսեն Ասատրյանը:

Վերակենդանացման բաժանմունքի մոտ հանդիպեցինք «Սասնա ծռեր» խմբավորման անդամ Թաթուլ Թամրազյանի հարազատներին, որոնք նրան տեսակցելու հնարավորություն դեռ չէին ունեցել: Ասացին, որ տղայի ընտանիքի անդամները Ռուսաստանում են, իսկ նա էլ, որ հիմնականում այնտեղ է բնակվել, Հայաստան է վերադարձել վերջերս: Ի դեպ, վերակենդանացման բաժանմունքում, ինչպես մեզ հաջողվեց պարզել, վիրավոր Թաթուլին հսկում էին մի քանի ոստիկան:

ՊՊԾ գնդի գրավումից հետո եւս հինգ տուժած, այդ թվում` երկու ոստիկան, տեղափոխվել է «Սուրբ Գրիգոր Լուսավորիչ» բժշկական կենտրոն: Հոսպիտալացվել է նրանցից միայն մեկը: Խոսքը պատանդառված այն ոստիկանի մասին է, որի մոտ, ինչպես հայտարարվում էր, սրտի ու ճնշման հետ կապված խնդիրներ էին առաջացել, շտապ օգնություն էր հրավիրվել, բայց ապստամբները որոշ ժամանակ թույլ չէին տալիս նրան հիվանդանոց տեղափոխել:

Վերակենդանացման եւ շտապօգնության բաժանմունքի վարիչ Սամվել Կարապետյանը, մանրամասներ ներկայացնելով հիվանդանոց ընդունվածների ու նրանց ախտորոշումների մասին, ասաց. «5 տղամարդ է ընդունվել մեզ մոտ: Առաջին տղամարդը, որ ընդունվեց, ժամը 10:35-ի շրջանում էր` Սամվել Աբովյան, լրագրող, վատացել էր, հետազոտվեց: Սրունք-թաթային հոդի հյուսվածքների սալջարդ ախտորոշմամբ դուրս է գրվել, իհարկե համապատասխան օգնություն ցուցաբերելուց հետո: Հաջորդ հիվանդը` Վլադիմիր Սիրեկանյան, որը ոստիկան է, 44 տարեկան, սթրեսային ֆոնի վրա եղել է հիպերտոնիկ կրիզ, ճնշման բարձրացում մինչեւ 220-230: Այսօր առավոտյան, համապատասխան օգնությունից հետո կազդուրվել է, դուրս է գրվել: Մյուս հիվանդը` Կարո Հովհաննիսյան` 28 տարեկան: Նա նշում էր գոտկային հատվածում ցավեր, հետազոտվել է, համապատասխան օգնությունից հետո դուրս է գրվել: Վերջնական ախտորոշումը` մակերեսային քերծվածքներ, թույլ սալջարդներ ծնկան հոդերի շրջանում: Երեկոյան ժամը 21-ի շրջանում ընդունվել է Հայկազ Սարդարյանը` 75 տարեկան, կենսաթոշակառու: Հիմնականում տրավմատիկ ոչինչ չի ունեցել, ուներ սրտի իշեմիկ խրոնիկ հիվանդություն, եղել է ճնշման բարձրացում եւ քթային արնահոսություն, համապատասխան միջամտությունից, օգնությունից հետո հիվանդը իր կամքով, կնոջ ուղեկցությամբ, դուրս է գրվել: Եվ մեկ ոստիկան ընդունվել է ժամը 22-ի սահմանում, օրվա ընթացքում սայթաքել էր, ծնկան հոդի շրջանում ստացել էր փոքր սալջարդ»:

Մեկ այլ ոստիկան` 45-ամյա Գագիկ Մկրտչյանը, դարձյալ հրազենային ծանր վնասվածքով, տեղափոխվել է Համալսարանական կլինիկական թիվ 1 հիվանդանոց: Նրան մասին որեւէ դրական լուրի սպասող հարազատները փոխանցեցին, որ բախման օրը հերթապահության է եղել եւ գրոհի ժամանակ գտնվել է ՊՊԾ գնդի տարածքում: Անզգայացման եւ ինտենսիվ թերապիայի ծառայության ղեկավար Իրինա Մալխասյանն ասաց, որ հիվանդը վիրահատվել է: «Կիրակի առավոտյան հիվանդը ընդունվել է մեզ մոտ` հրազենային ծանր վնասվածքով, կատարվել է վիրահատություն: Փառք Աստծո բարեհաջող է անցել: Հիվանդի վիճակը ծանր է, բայց կայուն, արհեստական շնչառության տակ է, նա հատուկ քնեցվում է, մինչեւ ամենադժվար փուլը մենք հաղթահարենք»,- փոխանցեց բժիշկը` այլ մանրամասներ չհայտնելով: Նաեւ նշեց, որ միջադեպի հետեւանքով այլ հիվանդներ իրենց մոտ չեն ընդունվել: Ինչ վերաբերում է մյուս երկու տուժածին, նրանք նույնպես ոստիկաններ են, տեղափոխվել են ՊՆ կենտրոնական զինվորական հոսպիտալ: Հրաչ Խոստեղյանը, որը քունքի շրջանում ունեցել է հրազենային բեկորային վիրավորում, ամբուլատոր բուժօգնություն ստանալուց հետո դուրս է գրվել: Մյուս ոստիկանի` Արամ Հովհաննիսյանի մոտ առկա է հրազենային վիրավորում` որովայնի շրջանում: Նա շարունակում է ստացիոնար բուժում ստանալ:

Այսպիսով, «Սասնա ծռեր» խմբավորման եւ իրավապահների բախման հետեւանքով 11 տուժածից 7-ը ոստիկանության աշխատակից է: