Հուլիսյան բախումների ընթացքում տուժածները պետք է բուժում ստանան անվճար

Երեւանում հուլիսյան հայտնի իրադարձությունների ընթացքում տուժած անձինք, որոնք ոստիկանության եւ ցուցարարների բախումների հետեւանքով ստացել էին տարբեր վնասվածքներ եւ տեղափոխվել կամ դիմել բժշկական հաստատություններ, ըստ առողջապահության նախարարի հրամանի, պետք է բժշկական օգնություն եւ սպասարկում ստանան անվճար: Այսինքն` պետպատվերի շրջանակում:  

Այս մասին տեղեկացանք նշված գերատեսչությունից: «Իրավունքների պաշտպանություն առանց սահմանների» հ/կ նախագահ Հայկուհի Հարությունյանը նախորդ օրը բաց նամակ էր հղել  առողջապահության նախարար Արմեն Մուրադյանին, որտեղ առաջ էր քաշել մի քանի հարցեր: «Հարգելի պարոն Մուրադյան, սույնով դիմում ենք Ձեզ՝ մեր մտահոգությունները հայտնելով 2016 թ. հուլիսի 29-30-ը ընկած ժամանակահատվածում ոստիկանության կողմից խաղաղ ցուցարարների նկատմամբ կիրառված պայթուցիկ նյութերի եւ այլ միջոցների արդյունքում տուժած քաղաքացիների ախտորոշման եւ բուժօգնության առնչությամբ: 2016թ. օգոստոսի 1- 3-ը ընկած ժամանակահատվածում տարբեր բժշկական կենտրոններում հանդիպել ենք դեռեւս բուժում ստացող տուժած քաղաքացիների, որոնց առնչությամբ Ձեզ ենք ներկայացնում մեր մտահոգությունները եւ ակնկալում ենք դրանց հրատապ լուծումները»,- նախ նշվում է  նամակում, ապա շարադրվում են մտահոգող խնդիրները:

«Մինչ օրս տուժած քաղաքացիները եւ նրանց ընտանիքի անդամները չեն տեղեկացվել վնասվածքների վերաբերյալ եւ նրանց համապատասխան ախտորոշում չի ներկայացվել: Այս հանգամանքը խիստ կարեւոր է նախաքննության մարմնի կողմից իրականացվող քննության ընթացքում յուրաքանչյուրի ստացած վնասների պատճառների գնահատման եւ համարժեք պատասխանատվության առաջադրման համար: Խնդրում ենք հետեւողականություն դրսեւորել եւ ապահովել պատշաճ վերահսկողություն, որպեսզի տուժած քաղաքացիների վնասվածքները, ըստ ծանրության եւ լրջության հստակ ու ճշգրիտ արձանագրվեն, ախտորոշվեն եւ դրանք տրամադրվեն քաղաքացիներին»,- գրել է Հարությունյանը:

Հաջորդ խնդիրը վերաբերում էր բուժման ծախսերին: «Դեռեւս բուժում ստացող քաղաքացիները եւ նրանց ընտանիքի անդամները անհանգստացած եւ մտահոգված են, քանի որ հստակ տեղեկություն չունեն այն մասին, թե ով է հոգալու բուժման ծախսերը: Այս առնչությամբ խնդրում ենք ապահովել, որպեսզի ոստիկանության գործողությունների հետեւանքով տուժած բոլոր քաղաքացիները ստանան անվճար բժշկական օգնություն: Այդ մասին խնդրում ենք հայտարարել բուժում ստացող քաղաքացիներին եւ նրանց ընտանիքի անդամներին»:

Առողջապահության նախարար Արմեն Մուրադյանին ուղղված բաց նամակում երրորդ խնդիրը վերաբերում է տուժածների հոգեբանական աջակցությանը: «Իրավունքների պաշտպանություն առանց սահմանների» հասարակական կազմակերպության նախագահն այդ առնչությամբ գրել է. «Ոստիկանության գործողությունների հետեւանքով տուժած քաղաքացիների մոտ առկա է վախի եւ տագնապի զգացողություն: Այս մասին հայտարարել են նաեւ մասնագիտացված բուժօգնություն տրամադրող բժիշկները: Ուստի դիմում ենք ձեզ՝ խնդրելով տուժած քաղաքացիների համար ապահովել հոգեբանական մասնագիտացված օգնություն՝ վախի, տագնապի եւ այլ բարդույթների վերացման համար»:

Տուժածների վնասվածքների ու ախտորոշման մասին տեղեկություն չունենալու վերաբերյալ առողջապահության նախարարի խոսնակ Անահիտ Հայթայանը նշեց. «Քաղաքացիների մի մասը դեռեւս բուժում է ստանում։ Դուրս գրվելիս նրանք ստանում են էպիկրիզ, որում մանրամասն նկարագրվում է հիվանդության պատմությունը: Իսկ մինչ դուրս գրվելը հիվանդին բանավոր տեղեկացվում է իր վիճակի մասին»: Նա նաեւ հավաստիացրեց, որ արդեն դուրս գրված քաղաքացիներն անհրաժեշտ փաստաթղթերը ստացել են: Տուժածներին հոգեբանական ծառայություններ տրամադրելու վերաբերյալ էլ տիկին Հայթայանը նկատեց, որ թեպետ դրանք առողջապահական չեն, բայց անհրաժեշտության դեպքում նախարարությունը պատրաստ է, համագործակցելով ոլորտում գործող մասնագիտական ասոցիացիաների հետ, քաղաքացիներին ցուցաբերել հոգեթերապեւտիկ բժշկական օգնություն, ինչի փորձն ունեցել են մասնավորապես ապրիլյան պատերազմից հետո: Ըստ նրա, ցանկացած հիվանդանոցում, եթե այս կամ այն հիվանդը ունենում է նաեւ հոգեբանական խնդիրներ, բժիշկն այդ մասին տեղեկացնում է, եւ նախարարությունն ապահովում է այդ ծառայությունը: Առայժմ նման պահանջարկ չի եղել: 

Ինչ վերաբերում է հուլիսի ընթացքում տեղի ունեցած բախումների ժամանակ տուժածներին անվճար բուժօգնություն տրամադրելուն, ապա նախարարի համապատասխան հրամանը թվագրված է օգոստոսի 3-ով: Առողջապահության նախարարությունից երեկ փոխանցեցին, որ այդ օրվա դրությամբ հիվանդանոցային բուժումը շարունակում է 16 անձ: Դա նշանակում է, որ տասնյակ մարդիկ արդեն դուրս են գրվել: Անահիտ Հայթայանը վստահեցրեց, որ վերջիններից նույնպես գումար չի գանձվել: Ու թեպետ նախարարի հրամանը ձեւակերպվել է ավելի ուշ, բուժհաստատությունները նախապես բանավոր զգուշացվել են, որ տուժածների բուժօգնությունը պետք է իրականացնել պետպատվերի շրջանակում:

Հ.Գ. Հուլիսի 29-ի լույս 30-ի գիշերը տեղի ունեցած իրադարձությունների հետեւանքով աչքը կորցրած 17-ամյա Սայադ Հարությունյանի քույրը դրամահավաք է նախաձեռնել, որպեզի եղբայրն արտերկիր տեղափոխվի եւ այնտեղ իրականացվի աչքի պրոթեզավորում: Տղայի հարազատները կարծում են, որ ի տարբերություն Հայաստանում առաջարկվող պրոթեզավորման, այնտեղ հնարավոր կլինի դա ավելի որակյալ կազմակերպել: Այդ նպատակով բացվել է հաշվեհամար:

Ակբա Կրեդիտ Ագրիկոլ բանկ

(Acba Credit Agricole bank)

Ստացող՝ Ռոմա Հարությունյան

(Beneficiary name:

Roma Harutyunyan)

ՀՀ դրամ (AMD) account no:

220199490065138

ԱՄՆ դոլար (USD) SWIFT:

AGCAAM22, account no:

220199570122138

Եվրո (EURO) SWIFT:

AGCAAM22, account no:

220381650070002

Ռուբլի (Rouble) SWIFT:

AGCAAM22, account no:

220381650070958

Օնլայն տարբերակով փոխանցում կարելի է կատարել հետեւյալ հաշվեհամարին՝

16045036922000

(ՎՏԲ Հայաստան բանկ)

Ստացող՝ Ռոմա Հարությունյան

Հեռախոսահամարներ`

Հայր` 094812692

Մայր` 094632003

Քույրեր` 093639527, 077812692