Դատապարտյալների հիվանդանոց այցելել թույլ չտրվեց, այնտեղի վիճակի մասին պատմեցին հեռակա

Վերջին իրադարձությունների առիթով, երբ «Սասնա ծռերի» որոշ վիրավոր անդամներ տեղափոխվեցին «Դատապարտյալների հիվանդանոց» քրեակատարողական հիմնարկ (ՔԿՀ), տեղեկություններ հրապարակվեցին այնտեղ տիրող անմխիթար վիճակի մասին, ինչը նպաստավոր չէ, եթե չասենք` ոչ բարենպաստ է հիվանդների բուժման տեսանկյունից:

Արամ Մանուկյանի փաստաբան Ինեսա Պետրոսյանը հայտարարել էր տարածքի բորբոսնած պատերի, կեղտոտ շրջակայքի, խավարասերների մասին, որոնք «ման են եկել Մանուկյանի բաց վերքի վրայով»: Օրերս գրավոր դիմել էինք ՀՀ արդարադատության նախարարության քրեակատարողական վարչություն` թույլտվություն ստանալու այցելել «Դատապարտյալների հիվանդանոց»` ընդհանուր վիճակը լուսաբանելու, այնտեղ առկա բուժական ու մասնագիտական հնարավորությունների վերաբերյալ տեղեկություններ ստանալու նպատակով: ՔԿ վարչությունից, սակայն, երեկ մերժում ստացանք: «Դատապարտյալների հիվանդանոց» քրեակատարողական հիմնարկ այցելելու եւ համապատասխան ռեպորտաժի միջոցով հանրությանը լուսաբանելու Ձեր առաջարկությունը քրեակատարողական հիմնարկի վարչակազմի կողմից ներկայումս գտնվել է ոչ նպատակահարմար: Քրեակատարողական հիմնարկ այցելելու առաջիկա հնարավորության դեպքում ՔԿԾ լրատվական բաժնի կողմից Ձեզ կիրազեկվի»,- պատասխանել են ՔԿՎ-ից` չպատճառաբանելով, թե ինչու է լուսաբանումը աննպատակահարմար:

Ամեն դեպքում, ՔԿՎ-ից մեզ են ուղարկվել մի շարք պարզաբանումներ՝ հետաքրքրող հարցերի վերաբերյալ: Դրանց կցվել են նաեւ լուսանկարներ, բնականաբար,  բարվոք պայմանների մասին վկայող տարածքներից:

Մեր ստացած գրավոր պատասխանում նախ նշվում է, որ իրականությանը չեն համապատասխանում «Դատապարտյալների հիվանդանոց» քրեակատարողական հիմնարկի անմխիթար վիճակի, ինչպես նաեւ այնտեղ պահվող հիվանդ դատապարտյալների բուժման պայմանների բացակայության մասին դիտարկումները: «Դատապարտյալների հիվանդանոց» քրեակատարողական հիմնարկում պահվող կալանավորված անձինք եւ դատապարտյալները լիարժեք ապահովված են ստացիոնար պայմաններում բուժումը պատշաճ կազմակերպելու բոլոր հնարավորություններով: Հարկ է նշել, որ սկսած 2015 թվականի սկզբից, «Դատապարտյալների հիվանդանոց» քրեակատարողական հիմնարկում իրականացվել եւ շարունակվում են ամբողջ ծավալով իրականացվել ծավալուն բարեփոխումներ՝ թե՛ բնակության պայմանների բարելավման, թե՛ բուժանձնակազմի որակավորման բարձրացման, եւ թե՛ բժշկական արդի սարքավորումներով վերազինման ուղղությամբ»,- վստահեցնում է ՀՀ ԱՆ քրեակատարողական վարչությունը: Նշվում է, որ «Դատապարտյալների հիվանդանոց» քրեակատարողական հիմնարկում հիմնանորոգվել են ա) բնակելի գոտու թերապեւտիկ բաժանմունքի ընդհանուր օգտագործման խոհանոցը եւ հիվանդասենյակը, բ) վիրաբուժական բաժանմունքը, գ) թոքախտաբանական բաժանմունքի մի շարք հիվանդասենյակներ, դ) նարկոլոգիական բաժանմունքի հիվանդասենյակներն ամբողջությամբ, ե) փակ պատժատեսակի մասնաշենքի հիվանդասենյակներն ամբողջությամբ, զ) կարանտինային բաժանմունքի հիվանդասենյակներն ամբողջությամբ:

Ուշագրավ իրավիճակ է մաքրության առումով: Այստեղ դրան սկսել են կարեւորություն տալ միայն վերջերս: «Սկսած 2015 թվականի մարտից՝ քրեակատարողական բոլոր հիմնարկներում, այդ թվում նաեւ «Դատապարտյալների հիվանդանոց» քրեակատարողական հիմնարկում պարբերաբար իրականացվել են սանիտարահիգիենիկ եւ հակահամաճարակային բազմաբնույթ գործողություններ: Բացի այդ, առաջին անգամ իրականացվել են դեզիսեկցիոն աշխատանքներ (միջատների դեմ), որպիսիք նախկինում երբեւէ չեն իրականացվել: 2016թ. արդեն իսկ վերակնքված պայմանագրի շրջանակներում քրեակատարողական բոլոր հիմնարկներում իրականացվել են դեզինսեկցիոն՝ ախտահանման, մակաբույծների ոչնչացման եւ դեռատիզացիոն աշխատանքներ: Նշված միջոցառումներն այսուհետ եւս կրելու են պարբերական բնույթ»,- հայտնում են ՔԿ վարչությունից:

Ներկայումս «Դատապարտյալների հիվանդանոց» քրեակատարողական հիմնարկում գործում են հետեւյալ բժշկական ստորաբաժանումները. թոքախտաբանական բաժին (ռեգուլյար տուբերկուլյոզի բաժանմունք, դեղորայքակայուն տուբերկուլյոզի բաժանմունք, բակտերիոլոգիական լաբորատոր խումբ), թերապեւտիկ բաժանմունք, վիրաբուժական բաժանմունք, ինֆեկցիոն բաժանմունք, հոգեբուժական բաժանմունք, նարկոլոգիական բաժանմունք, կլինիկակենսաքիմիական լաբորատոր բաժանմունք, ֆունկցիոնալ ախտորոշման եւ ֆիզիոթերապիայի բաժանմունք, ռենտգեն բաժանմունք, ատամնաբուժական բաժանմունք, հերթապահ բժշկական խումբ: Քրեակատարողական հիմնարկը համալրված է բժշկական անձնակազմի 74 հաստիքային միավորով, որոնցից 11-ը նեղ մասնագիտացում ունեցող բժիշկ-մասնագետներ են:

Փորձառու կադրեր ներգրավելու նպատակով նաեւ խրախուսման մեխանիզմներ են նախատեսվել: «Բժշկական սպասարկման ծառայությունում գործող որակյալ կադրերի արտահոսքը կանխելու, ինչպես նաեւ 30 տարեկանից բարձր փորձառու բժիշկների ծառայության ընդունելու անհրաժեշտությամբ պայմանավորված, քրեակատարողական ծառայությունում ներդրվել է քաղաքացիական ծառայության ինստիտուտը, որի արդյունքում ծառայության սահմանային տարիքի հասած, սակայն բժշկագիտության բնագավառում հարուստ փորձառություն ունեցող քրեակատարողական ծառայողները հնարավորություն են ստացել աշխատավարձի պահպանմամբ ձեւակերպել նաեւ երկարամյա ծառայության կենսաթոշակ»,- տեղեկանում ենք մեզ ուղարկված գրությունից:

Նշվում է նաեւ առաջիկայում իրականացվելիք ծրագրերի մասին, որոնք, ըստ ՔԿՎ ղեկավարության, պետք է նպաստեն ինչպես մասնագետների պատրաստմանը, այնպես էլ բուժսարքավարումներով ապահովմանը: