Հրազդանի քաղաքապետարանի նախկին աշխատակիցը դատի է տվել քաղաքապետին

Հրազդանի քաղաքապետարանի կրթության, մշակույթի եւ երիտասարդության հարցերի բաժնի արդեն նախկին պետ Անահիտ Նազարյանը դատական գործ է ձեռնարկել ընդդեմ քաղաքապետ Արամ Դանիելյանի: Նախկին պաշտոնյան հայց է ներկայացրել Կոտայքի մարզի ընդհանուր իրավասության դատարան` պահանջելով անվավեր ճանաչել իրեն աշխատանքից ազատելու՝ քաղաքապետի հրամանը ու վերականգնել պաշտոնում: Դատական առաջին նիստը նշանակված է սեպտեմբերի 28-ին:

Արդեն տեղեկացրել ենք, որ ընթացիկ տարվա ապրիլին քաղաքապետի ընտրությունների արդյունքում վերընտրվելով այդ պաշտոնում, Արամ Դանիելյանը ձեռնամուխ էր եղել կառուցվածքային փոփոխությունների ու կադրային կրճատումների: Նա այդպես էր որոշել`  չնայած որ քաղաքապետարանի հաստիքացուցակն այս տարվա համար արդեն իսկ հաստատվել էր նախորդ տարվա վերջին:

Անահիտ Նազարյանը մեր զրույցում նկատում էր, որ մարդկանց աշխատանքից ազատելիս հաշվի չեն առնվել ոչ նրանց կրթությունը, ոչ մասնագիտական ստաժը, ոչ համայնքային ծառայողի դասային աստիճանը: Ու համապատասխան մարմինների մտքով էլ չի անցնում ուսումնասիրություններ անցկացնել` պարզելու, թե Հրազդանի քաղաքապետարանի աշխատակիցների ճակատագրերը ինչ սկզբունքով են վճռվել ու այդ ընթացքում որքանով է կարեւորվել արդարության ու օրինականության գործոնը:

Մասնավորապես իր զբաղեցրած հաստիքն, ինչպես համոզված է նախկին պաշտոնյան, կրճատվել է քաղաքապետի հետ ունեցած լարված հարաբերությունների պատճառով: Նա պատմում էր, որ այդ լարվածությունն ավելի խորացել էր նախորդ տարվա օգոստոսին, երբ խորհրդակցություններից մեկի ժամանակ քաղաքապետը, հայհոյանքներ տեղալով, մեղադրել է իրեն, թե ինչու չի հայտնել Հրազդանի երաժշտական դպրոցներից մեկի աշխատակիցների շրջանում հնչած բողոքների մասին, ըստ որոնց` իրենց աշխատավարձերը ուշանում են, իսկ Դանիելյանն այդ գումարներով հանգստանալու է մեկնում արտասահմանյան երկրներ ու մասնավորապես Ֆրանսիա:

Անահիտ Նազարյանը չի բացառում, որ հայհոյանքներն իրեն ուղղվել են` հունից հանելու եւ աշխատանքից ազատման դիմում գրելուն դրդելու նպատակով, բայց ինքը դա վճռականորեն չի արել: Հետո սկսվել է աշխատանքից մեկուսացումը, գործընկերները դադարել են բարեւել եւ այլն: Հրազդանի քաղաքապետի ընտրությունների ժամանակ Անահիտ Նազարյանը նաեւ բացահայտ կանգնել է Դանիելյանի մրցակից Սասուն Միքայելյանի կողքին, ու «մեղքերի» այդ փունջը վերընտրված քաղաքապետը նրան չի ներել: «Քաղաքապետն ու աշխատակազմի ղեկավարը դադարեցին ինձ տալ հանձնարարություններ, հրահանգներ, ցուցումներ: Ավելին, արգելեցին թե՛ քաղաքապետարանի, թե՛ բաժնի ենթակայության նախադպրոցական եւ արտադպրոցական ուսումնական հաստատությունների աշխատակիցներին ինձ հետ շփվել, խոսել, անգամ վերելակ նստել:

10 ամիսների ընթացքում ես իմ աշխատասենյակից դուրս չեմ եկել, որպեսզի չհանդիպեմ նվաստացնողներին, ծաղրողներին, սողուններին: Իմ շփումը եղել է միայն իմ բաժնի աշխատակիցների հետ, որոնք էլ այդ պատճառով հուլիսի 1-ից ինձ հետ միասին ազատվեցին աշխատանքից: Մինչեւ 65 տարեկանը ես իրավունք ունեմ աշխատել: Սկզբունքի հարց է, պիտի պայքարեմ: Վիրավորական է, որ 40 տարի անբասիր աշխատում ես, երբ որ պիտի արդեն անցնես վաստակած հանգստի, այսպես խայտառակ ձեւով են ճանապարհում»,- ասում է մեր զրուցակիցը:  Նա, ի դեպ, նկատում է, որ քաղաքապետ Արամ Դանիելյանի գործելաոճն է հատկապես տղամարդ աշխատակիցների հետ խոսել անհարգալից ու հայհոյանքներով:

Հրազդանի քաղաքապետարանի լրատվության եւ հասարակայնության հետ կապերի բաժնից մեր հարցմանն ի պատասխան պարզաբանումներ են ներկայացրել նախկին կրթության, մշակույթի եւ երիտասարդության հարցերի բաժնի պետ Անահիտ Նազարյանի բարձրաձայնած խնդիրների վերաբերյալ:

«Կառուցվածքային փոփոխությունների արդյունքում հաստիքների թիվը 106-ից դարձել է 78 եւ նշված հաստիքներից այժմ 71 աշխատակից զբաղեցնում է այդ տեղերը: (դրանք քաղաքական, համայնքային, հայեցողական, տեխնիկական պաշտոներն են): Նախկինում եղել են 13 պայմանագրային աշխատողներ, հունիսի 1-ի դրությամբ չունենք պայմանագրային ոչ մի աշխատող: Հրազդանի համայնքապետարանի աշխատակազմի օպտիմալացման խնդիրը 2010 թվականից գտնվել է ՀՀ տարածքային կառավարման նախարարության ուշադրության կենտրոնում: ՀՀ փոխվարչապետ, տարածքային կառավարման նախարարի 2010 թ. մարտի 18-ի 01/17/1593-10 հանձնարարականի կատարման նպատակով Հրազդան քաղաքի ավագանու 2014 թվականի մարտի 21-ի N28 որոշմամբ օպտիմալացվել են համայնքապետարանի աշխատակազմի 7 աշխատակիցներ եւ հիմնավոր տեղեկանքով ներկայացվել է ՀՀ Կոտայքի մարզպետարան եւ տարածքային կառավարման նախարարություն: Հրազդան համայնքի ավագանու 2016 թվականի ապրիլի 28-ի թիվ 32 որոշմամբ հաստատվել է համայնքապետարանի աշխատակազմի նոր հաստիքացուցակը, իսկ ՀՀ տարածքային կառավարման եւ զարգացման նախարարի 16.05.2016 թվական թիվ 38-Ա հրամանով հաստատվել համայնքային ծառայության պաշտոնների նոր անվանացանկը»,- ասվում է Հրազդանի քաղաքապետարանի պատասխան գրության մեջ:

Նաեւ նշվում է, որ համայնքի ղեկավարի կողմից կատարվել է համայնքի ավագանու որոշման պահանջը, ինչի արդյունքում աշխատանքից ազատվող աշխատողները սահմանված կարգով 2 ամիս առաջ ծանուցվել են հաստիքների կրճատման հետեւանքով աշխատանքից ազատման մասին: Ինչ վերաբերում է Անահիտ Նազարյանի այն դիտարկմանը, որ կրճատումներն իրականացվելիս գործել է անհայտ մի սկզբունք, Հրազդանի քաղաքապետարանից արձագանքում են. «Ձեր գրությամբ նշված այդ մարդը, ինչպես նաեւ այլ աշխատակիցներ աշխատանքից ազատվել են «Համայնքային ծառայության մասին» ՀՀ օրենքի 33-րդ հոդվածի «զ» կետի հիմքով՝ հաստիքների կրճատման հետեւանքով, օրենսդրությամբ սահմանված կարգի պահպանմամբ: Այսինքն, կրճատվել են ոչ թե կոնկրետ աշխատակիցներ, այլ հաստիքներ: Նոր օպտիմալացումից հետո նշանակումները կատարվել են «Համայնքային ծառայության մասին» օրենքի 29-րդ հոդվածի պահանջներով եւ նախապատվության սկզբունքով: Խտրական վերաբերմունքի եւ այլ խոսակցություններն ընդամենը հերյուրանքներ են՝ հեռու իրականությունից»:

Ի դեպ, նշված հոդվածի 29-րդ կետում մասնավորապես ասվում է. «Հաստիքների կրճատման դեպքում աշխատանքային գործունեությունը շարունակելու նախապատվության իրավունքը տրվում է համայնքային ծառայության ավելի բարձր դասային աստիճան ունեցող համայնքային ծառայողին, իսկ այս պայմանի հավասարության դեպքում՝ համայնքային ծառայության առավել երկար ստաժ ունեցող համայնքային ծառայողին»: Ու հենց այս դրույթն էլ, ըստ Անահիտ Նազարյանի, չի պահպանվել աշխատակիցներին աշխատանքից ազատելու ընթացքում: Ավելին, նրա փոխանցմամբ, ավելի ուշ նույնիսկ ընդունվել են նոր մարդիկ, որոնք անգամ բարձրագույն կրթություն չունեն: