Եվրոպայի լավագույն ֆուտբոլիստ. Կրկին Կրիշտիանու Ռոնալդուն

Ֆուտբոլի Պորտուգալիայի հավաքականի ավագ, Մադրիդի «Ռեալի» հարձակվող Կրիշտիանու Ռոնալդուն կարիերայի մեջ 2-րդ անգամ ճանաչվել է Եվրոպայի լավագույն ֆուտբոլիստ: Երեկ երեկոյան Մոնակոյի «Գրիմալդի Ֆորում» հանդիսությունների սրահում կայացել է ֆուտբոլի Չեմպիոնների լիգայի հերթական խաղարկության խմբային փուլի վիճակահանությունը, հրապարակվել է նաեւ անցյալ՝ 2015-16թթ. խաղաշրջանի Եվրոպայի լավագույն ֆուտբոլիստի անունը:

Հիշեցնեմ, որ կանոնակարգի համաձայն՝ Եվրոպայի լավագույն ֆուտբոլիստը ընտրվում է ՈՒԵՖԱ-ի անդամ բոլոր երկրների 1-ական լրագրողի եռափուլ քվեարկությունների արդյունքում: 1-ին փուլում լրագրողները ներկայացնում են ավարտված մրցաշրջանի արդյունքներով Եվրոպայի լավագույն ֆուտբոլիստի կոչման հավակնող ցանկացած 5 ֆուտբոլիստների իրենց տարբերակները, եւ առավել շատ միավորներ հավաքած 10 լավագույն ֆուտբոլիստները շարունակում են պայքարը: 2-րդ փուլում քվեարկությունը ընթանում է արդեն այս 10 ֆուտբոլիստների շրջանակում ու առավելագույն միավորներ հավաքած 3 ֆուտբոլիստները դուրս են գալիս եզրափակիչ:

2015-16 թթ. մրցաշրջանի արդյունքներով եզրափակիչ փուլ էին դուրս եկել Մադրիդի «Ռեալի» հարձակվողներ, պորտուգալացի Կրիշտիանու Ռոնալդուն, ուելսցի Գարեթ Բեյլը եւ Մադրիդի «Ատլետիկոյի» հարձակվող, ֆրանսիացի Անտուան Գրիզմանը: Դեռ մինչ եզրափակիչ քվեարկությունը մասնագետները ակնհայտ առավելություն էին տալիս Կրիշտիանու Ռոնալդուին: Տարվա 2 գլխավոր՝ Եվրոպայի չեմպիոնի եւ Չեմպիոնների լիգայի գավաթակրի տիտղոսները պորտուգալացու գլխավոր հաղթաթղթերն էին անցյալ խաղաշրջանում, թեեւ Չեմպիոնների լիգայի եզրափակիչում Ռոնալդուն աչքի չընկավ արտակարգ խաղով, իսկ Եվրոպայի առաջնության եզրափակիչում էլ խաղադաշտում անցկացրեց ընդամենը 25 րոպե:

Բայց հենց Ռոնալդուն  «Ռեալի» կազմում դարձավ ետխաղյա հաղթական 11 մետրանոցի հեղինակ Չեմպիոնների լիգայի եզրափակիչում, իսկ Եվրոպայի առաջնությունում ուղղակի անգնահատելի էր նրա լուման Պորտուգալիայի հաղթանակի մեջ: Կրիշտիանու Ռոնալդուն «Եվրո 2016»-ի ամբողջ ընթացքում Պորտուգալիայի սիրտն ու հոգին էր, առաջատարը, գլխավոր հրամանատարը: Անգամ եզրափակիչում ստացած վնասվածքից հետո Կրիշտիանուն օգնեց իր երկրի հավաքականին՝ գրեթե կատարեց թիմի գլխավոր մարզչի դերը, ստվերելով իրական գլխավոր մարզիչ Ֆերնանդու Սանթուշին: Ի պատիվ պատմական հաղթանակի՝ Եվրոպայի չեմպիոնի կոչման, Կրիշտիանու Ռոնալդուի անվամբ վերանվանվեց նրա ծննդավայր Մադեյրա կղզու օդանավակայանը: 

Ոչ պակաս հաջող ստացվեց հատկապես խաղաշրջանի վերջնամասը Մադրիդի «Ռեալի» մյուս աստղի՝ Գարեթ Բեյլի համար: Եթե Պորտուգալիան նոր անուն չէր եվրոպական ֆուտբոլային քարտեզի վրա, ապա Ուելսի ցուցադրած խաղը եւ արդյունքը մեծագույն անակնկալներից էր «Եվրո 2016»-ում: Բեյլի հիասքանչ խաղի շնորհիվ Ուելսը իր պատմության մեջ առաջին անգամ մտավ Եվրոպայի առաջնության լավագույն քառյակ, եւ հայրենիքն էլ ոչ պակաս «առատաձեռն» պարգեւատրեց Բեյլին. նրա անունով (թեկուզ՝ ժամանակավորապես) վերանվանվեց մի ամբողջ քաղաք:

Իր լավագույն մրցաշրջանն անցկացրեց Մադրիդի «Ատլետիկոյի» եւ Ֆրանսիայի հավաքականի հարձակվող Անտուան Գրիզմանը: Թեեւ Գրիզմանը ճանաչվեց «Եվրո 2016»-ի լավագույն ֆուտբոլիստ, բայց Եվրոպայի լավագույն ֆուտբոլիստի կոչմանն արժանանալուն հաստատապես խանգարեց 2 կարեւոր եզրափակիչներում՝ Եվրոպայի առաջնությունում եւ Չեմպիոնների լիգայում կրած պարտությունները: Ամեն դեպքում Գրիզմանը կարողացավ մտնել Եվրոպայի լավագույն ֆուտբոլիստների մեջ, անգամ առաջ անցավ Լիոնել Մեսիից:  

Բայց որեւէ տիտղոս նվաճելու համար բավարար չէ անցնել միայն Մեսիին. կա նաեւ Կրիշտիանու Ռոնալդուն, որը եւ ՈՒԵՖԱ-ի անդամ երկրների լրագրողների քվեարկության արդյունքում ճանաչվեց Եվրոպայի 2015-16 թթ. խաղաշրջանի լավագույն ֆուտբոլիստ: 55 լրագրողներից 40-ը իրենց ձայնը տվել են պորտուգալացու օգտին, Գրիզմանը ստացել է 8, Բեյլը՝ 7 ձայն: Կրիշտիանու Ռոնալդուն կարիերայի ընթացում 2-րդ անգամ արժանացավ այս տիտղոսին (1-ին անգամ լավագույնն էր ճանաչվել 2014 թվականին) եւ կրկնեց Մեսիի ցուցանիշը, որը Եվրոպայում լավագույնն էր ճանաչվել 2011 եւ 2015 թվականներին: