Տուրիստները գալու են Նոր Կյանք ու check-in են լինելու. Գ. Սարգսյան

Չնայած, ընդդիմադիր «Քաղաքացիական պայմանագիր» կուսակցությունը սեպտեմբերի 18–ին կայացած ՏԻՄ ընտրություններում հաղթել է Արարատի մարզի Նոր Կյանք համայնքի ընտրություններում, սակայն այնպես չի, որ իշխանությունն ընտրախախտումներ կատարելու որեւէ փորձ չի կատարել: Այս մասին լրագրողների հետ հանդիպմանն ասաց ՔՊ վարչության անդամ, մամուլի խոսնակ Ալեն Սիմոնյանը: Սիմոնյանը հիշեցրեց, որ իրենք մասնակցել են 3 համայնքի ընտրություններում՝ Ոսկեվազ, Իրինդ եւ Նոր Կյանք, կարողացել են հաղթել Նոր Կյանքում:

Նոր Կյանքի նորընտիր գյուղապետ Գարիկ Սարգսյանը հայտարարեց, որ իր հաջողությունը պայմանավորում է թիմի աշխատանքով.

«Երբ Նոր Կյանքում որոշվեց տարածքային կառույց հիմնել, խորհրդի նախագահ ես ընտրվեցի, որոշում կայացվեց, որ պետք է առաջադրվենք առաջիկա ՏԻՄ ընտրություններին, տեղում աշխատեց ուժեղ թիմ, որը կազմեց ծրագիր՝ վերհանելով բոլոր խնդիրները»,- ասաց Գարիկ Սարգսյանը:

«Մենք ասում էինք ոչ թե եկեք մեզ ընտրենք ու մեր ծրագիրը, այլ հիմնական շեշտն այն էր, որ ձեր քվեն պահելու ենք, ոչ ոք չի կարող իմանալ ձեր քվեարկությունը, այն լինելու է գաղտնի»,- մանրամասնեց Սարգսյանն իրենց քարոզարշավի աշխատանքները:

Ալեն Սիմոնյանը հավելեց, որ Նոր Կյանքում ՔՊ-ն կիրառեց Հրազդանի ընտրությունների փորձը.

«Այստեղ հաջողվեց, որովհետեւ գումար բաժանելը չեղավ, ինչպես Հրազդանում»,-ասաց Սիմոնյանը՝ հույս հայտնելով, որ Նոր Կյանքի հաջողությունները կգրանցվեն նաեւ հոկտեմբերի 2-ին Վանաձորում եւ Գյումրիում սպասվող ՏԻՄ ընտրություններում:

Լրագրողները հետաքրքրվեցին՝ գյուղում լարվածություն չկա՞,  Գարիկ Սարգսյանն ասաց, որ բացարձակ լարվածություն չկա.

«Բոլորի տրամադրությունը շատ բարձր է, միմյանց աչքալուսանք  էին տալիս, որ 17 տարի անց գյուղապետը փոխվեց»,- ասաց Սարգսյանը՝ հավելելով, որ գյուղի բնակիչների մեծ մասն արտերկրում է, եւ իր ընտրվելուց հետո բոլորը զանգել շնորհավորել են:

Հարցին՝ ինչպիսի՞ն է լինելու Նոր Կյանքի նոր կյանքը, Գարիկ Սարգսյանը պատասխանեց.

«Տուրիստները գալու են Նոր Կյանք ու check-in են լինելու»:

Լրագրողներից մեկի դիտարկմանը, որ ՀՀԿ-ական պատգամավոր Լեռնիկ Ալեքսանյանը հայտարարել է, որ ի վերջո «իր դուռն է գնալու Սարգսյանը», Գարիկ Սարգսյանը հիշեցրեց, որ սահմանադրական հանրաքվեի ժամանակ ինքը դիտորդ է աշխատել ընտրատեղամասում, որտեղ էլ եղել է Ալեքսանյանը.

«Իմ հնարավորությունների սահմանում արել եմ ամեն ինչ, որ խախտում չլինի, այդ ընտրատեղամասը համակ ուշադրության կենտրոնում է եղել, ոչ ոք չի կարողացել անել որեւէ բան, որ չքվեարկած քվեաթերթիկ հայտնվի արկղում: Ինչպե՞ս է Լեռնիկ Ալեքսանյանը պատկերացնում, որ  մեկ դիտորդի վրա չի կարողանում ազդել, պետք է ազդի՞ համայնքի ղեկավարի վրա, դա բացառված է»,- ասաց Նոր Կյանքի գյուղապետը՝ հավելելով, որ իրեն փորձել են համոզելով, սպառնալով դուրս բերել ընտրատեղամասից, բայց որեւէ մեկին դա չի հաջողվել:

Հետաքրքրվեցինք՝ պատրաստվո՞ւմ է ազատվել նախկին գյուղապետի կադրերից, Գարիկ Սարգսյանն ասաց, որ չաշխատող պաշտոնյաները պետք է հեռանան.

«Մարդը, եթե չի աշխատում, պետք է հեռանա եւ նոր սերունդ գա, նախկին գյուղապետը ոչինչ չէր անում, միայն պեչատ էր դնում»,- ասաց Սարգսյանը:

Հարցին՝ այս ընտրությունների արդյունքով ամրագրեցի՞ն ՔՊ-ին որպես միակ ընդդիմություն, Ալեն Սիմոնյանը հիշեցրեց, որ ՀՀ-ում պետք է լինի մեկ ընդդիմություն, եւ ՔՊ-ն հավակնում է լինել այդ ընդդիմությունը.

«Փորձելու ենք դա անել Գյումրիում, Վանաձորում եւ գնալու ենք դեպի համապետական ընտրություններ, վստահեցնում եմ ձեզ՝ գրանցելու ենք բավականին լավ արդյունքներ»,- ասեց Սիմոնյանը:

Հարցին՝ համարո՞ւմ եք Նոր Կյանքի հաղթանակն իշխանափոխության սկիզբ, Սիմոնյանը պատասխանեց.

«Մեր քաղաքական ուժը միշտ աչքի է ընկել ռեալ խոսքով, գործով, սա իշխանափոխության սկիզբ չի, ինստիտուցիոնալ ընդդիմության ձեւավորման սկիզբն է, մեկ ընդդիմության ձեւավորման սկիզբ է, լուրջ հայտ է, ապացույց է, որ մեր բոլոր ասածներն իրագործելու ենք, իշխանափոխություն բառը մենք օգտագործելու ենք մեկ անգամ եւ ասելու ենք այն ժամանակ, երբ վստահ կլինենք, որ 15, 30 օր հետո իշխանափոխություն կանենք, որովհետեւ ե՛ւ հանրահավաքը, ե՛ւ ռեժիմը խուճապի մեջ է, տեսեք էսա ինչ ենք անելու, իրենց արժեքը կորցրել են մեր երկրում»,- ասաց Ալեն Սիմոնյանը:

Գարիկ Սարգսյանն էլ հավելեց.

«Սա առաջին դեպքն էր, որ իսկապես ռեժիմը խուճապի մեջ էր, դա իրենց ցույց էին տալիս իրենց գործողություններով»: