Ապերը անկառավարելի՞ է դարձել. չնախատեսված ընդմիջում Նաղդալյանի գործով

Տպագրվել է «Հայկական Ժամանակ» օրաթերթի՝ 2003 թվականի սեպտեմբերի 26-ի համարում

Երեկ, կարելի է ասել, Տ. Նաղդալյանի սպանության գործով կուլմինացիոն նիստն էր. ցուցմունք էր տալու Ապերը՝ Հովհ. Հարությունյանը, որը մեղադրվում է 17-99 (սպանության օժանդակող) եւ 232 (ապօրինի զենք) հոդվածներով: Նա Արմեն Սարգսյանի մորաքրոջ տղան է, ավելի ստույգ՝ նրանք քույր եւ եղբոր թոռներ են: Այս բարեկամական կապն էլ դրվել է մեղադրանքի հիմքում:

Բացի այդ, Ապերը միակ մարդն է, որն ուղղակի ցուցմունք է տվել Արմեն Սարգսյանի դեմ: «Դեկտեմբերի սկզբին Գեղամ Շահբազյանից իմանալով, որ Արմեն Սարգսյանը Լյովա Հարությունյանի միջոցով 30 հազար դոլարով պատվիրել է Տիգրան Նաղդալյանի սպանությունը, նա համաձայնել է նրա առաջարկին եւ միջոցներ ձեռնարկել Ա.Սարգսյանից ճշտելու պատվերի իսկությունը՝ միաժամանակ փորձելով մեծացնել վարձավճարը»,- գրված է մեղադրական եզրակացության մեջ:

Նախաքննական ցուցմունքում Ապերը պատմել է, որ դեկտեմբերի 15-ին Գրիգոր Պետրոսյանի հետ մեկնել է Արարատ եւ հանդիպել Արմեն Սարգսյանին, հենց այդ օրն էլ, ըստ Ապերի, Սպարապետի եղբայրը հայտնել է, որ իրոք պատվիրել է Նաղդալյանի սպանությունը՝ «նրա հեռուստահաղորդումներից դժգոհ լինելու, ինչպես նաեւ ԱԺ-ում հոկտեմբերի 27-ին տեղի ունեցած տեռորիստական ակտին ու Վազգեն Սարգսյանի սպանությանը նրա մասնակցության մեջ կասկածներ ունենալու դրդապատճառներով»:

Ապա Ա.Սարգսյանը Ապերի հետ պայմանավորվել է սպանության համար վճարել 60 հազար դոլար (չնայած մի քանի ամսում նրան է տվել 75 հազար դոլար, այսինքն, պայմանավորվածությունից 15 հազար ավելի). այս խոսակցությունից հետո Ապերը կատարողներին է փոխանցել պատվերը: Եթե հաշվի առնենք, որ ոչ կատարողները, ոչ էլ անգամ Լյովա Հարությունյանը իրենց ցուցմունքներով չհաստատեցին Արմեն Սարգսյանի պատվիրատու լինելու հանգամանքը, ապա մեղադրանքի հույսը փաստորեն մնացել է Ապերը, որի ցուցմունքի հիման վրա էլ Արմեն Սարգսյանի նկատմամբ մեղադրական դատավճիռ կարձակվի:

Սա էր պատճառը, որ երեկ դատարանի դահլիճը լեփլեցուն էր, բոլորն անհամբերությամբ սպասում էին Հովհաննես Հարությունյանի ցուցմունքին: Մանավանդ որ, նախորդ օրը դատարանն ուզում էր սկսել նրա հարցաքննությունը, սակայն արդեն ժամը 4-ն էր, եւ Ապերը խնդրեց հետաձգել նիստը, որ իր գրառումները մեկուսարանից բերի, նոր միայն ցուցմունք տա: Երեկ առավոտից ինչ-որ տարօրինակ բաներ էին կատարվում դատարանում: Նախ տեղեկացանք, որ չնայած նախորդ օրը դատարանից գրություն էր ուղարկվել մեկուսարան, եւ Արմեն Սարգսյանի հարազատներին ասել էին, որ նրա համար աշնանային հագուստ բերեն, քանի որ նրան դատի են տանելու, Արմեն Սարգսյանին այդպես էլ դատարան չէին բերել:

Այսինքն, նախապես մշակված սցենարը ինչ-ինչ պատճառներով անսպասելիորեն փոխվել էր: Նիստն սկսվելուց առաջ նկատեցինք, որ ուղեկցող զինվորներից մեկը, մոտենալով Ապերին, նրան ինչ-որ բան հարցրեց, ապա լսածը գնաց փոխանցելու մեղադրողներին, որոնք զինվորին անմիջապես դուրս ուղարկեցին: Քիչ անց նիստը սկսվեց եւ պարզվեց՝ Ապերի պաշտպան Հոկտեմբեր Քարամյանն իրեն վատ է զգում: Դատավորի հորդորներին, թե՝ գուցե բժի՞շկ հրավիրենք, նա չհամաձայնեց: Ստիպված եղան կես ժամ ընդմիջում հայտարարել, որի ընթացքում պարզ կդառնար՝ Քարամյանի ինքնազգացողությունը կարգավորվում է, թե ոչ:

Ընդմիջման ժամանակ պաշտպան Քարամյանը ակտիվ դես-դեն էր գնում, ամբաստանյալների հարազատների հետ զրուցում, իսկ երբ լրագրողները նրան մի քանի տարբեր դեղեր առաջարկեցին՝ կատեգորիկ հրաժարվեց ընդունել դրանք: Կեսժամյա ընդմիջման ժամանակ բակում կանգնածները նկատել էին, որ կողքի դարպասից մի «31» է մտնում դատարանի բակ. պարզվեց՝ ՀԿԳ քննիչ Հեկտոր Սարդարյանի «31»-ն է, որին շտապ օգնության էին կանչել, թեեւ օրենքն ասում է, որ մեղադրական եզրակացություն կազմելուց հետո քննիչն այլեւս որեւէ ձեւով չի կարող առնչվել դատական վարույթին:

Ընդմիջման ժամանակ լուր տարածվեց, թե որոշվել է նիստը հետաձգել, քանի որ Ապերն ինչ-որ բան է ծրագրել, որը մեղադրանքի կողմին ձեռնտու չէ: Նիստը սկսվելուն պես մեր ուշադրությունը գրավեց շփոթահար ու անելիքը չիմացող դատավորի տեսքը, եւ՝ որ Ապերը ինչ-որ թաշկինակ է դեմքի մոտ պահում:

Ամբաստանյալին ավելի մոտ նստողներից իմացանք, որ թաշկինակով նա սրբում էր շրթունքից հոսող արյունը, որը, կարծում ենք, անմիջական կապ ուներ Հեկտոր Սարդարյանի անսպասելի հայտնության հետ: Ապերի պաշտպանը դատարանին տեղեկացրեց, որ ինքը դեռ վատ է զգում եւ խնդրեց հետաձգել նիստը: Մինչ այդ պահը վայրկյանները հաշվող մեղադրողները Զելիմ Թադեւոսյանի ղեկավարությամբ պատրաստակամությամբ հավանություն տվեցին ընդմիջում հայտարարելու առաջարկին:

Թվում էր՝ հիվանդի տեսք չունեցող պաշտպանին առողջանալու համար 1 օրը բավական կլիներ, բայց դատավոր Սարո Արամյանը նիստը շռայլորեն ընդմիջեց մինչեւ երեքշաբթի: Ընդմիջում հայտարարելով ամբաստանյալներին մշակելու ավանդույթը, որ հոկտեմբերի 27-ի դատավարությունից է սկիզբ առել, դեռ չի եղել դեպք, որ այս արատավոր մեթոդը կիրառողներին հուսախաբ անի: Համոզված ենք, որ այս անգամ էլ արդյունք կտա:

Արմինե Օհանյան