Ո՞վ է խայտառակում ռեսպուբլիկան. ԵԽԽՎ-ն կքննարկի ՀՀ պատվիրակության լիազորությունների հարցը

Տպագրվել է «Հայկական Ժամանակ» օրաթերթի՝ 2003 թվականի սեպտեմբերի 26-ի համարում

Երեկ սկսվեց ԵԽԽՎ աշնանային նստաշրջանը, իսկ այսօր ԵԽԽՎ բյուրոյում քննարկվելու է ԵԽԽՎ-ում հայաստանյան պատվիրակության լիազորությունների հարցը: Ինչպես մեզ տեղեկացրել էր ԵԽԽՎ քարտուղարի հատուկ ներկայացուցիչ Նատալյա Վուտովան, եթե բյուրոն դրական եզրակացություն տա այդ հարցին, ապա հայաստանյան պատվիրակության մանդատները վավերացնել-չվավերացնելու հարցը մտնելու է սեպտեմբերի 29-ի ԵԽԽՎ լիագումար նիստի օրակարգ:

Երեկ արդեն մեր պատվիրակությունը մեկնել է Ստրասբուրգ՝ մասնակցելու լիագումար նիստին: Ուստի, խորհրդարանական ճեպազրույցների ժամանակ, մենք փորձեցինք խումբ-խմբակցություններից պարզել, թե իրենք հնարավոր համարո՞ւմ են, որ ԵԽԽՎ-ում նման հարց բարձրանա: Եւ արդյո՞ք իսկապես Հայաստանում տեղի ունեցած խորհրդարանական ընտրությունները եվրոպացիներին իրավունք տալիս են՝ դիմելու նման պատժամիջոցների:

Բնականաբար, այս հարցում մեր խորհրդարանականների կարծիքները բաժանվեցին երկու խմբի. մեծամասնությունը, հանձինս իշխանական կուսակցությունների, կարծում էր, որ 2003-ին տեղի ունեցած թե՛ նախագահական, եւ թե՛ խորհրդարանական ընտրություններն այնքան էլ սարսափելի չէին, ու նրանք ոչ միայն հույս ունեն, որ ԵԽԽՎ-ում նման հարց չի բարձրանա, այլ նաեւ խորհուրդ էին տալիս ԵԽ-ին՝ նման քայլի չդիմել: Մասնավորապես, ՄԱԿ խմբակցության նախագահ Գուրգեն Արսենյանի կարծիքով՝ թե՛ նախագահական եւ թե՛ խորհրդարանական ընտրություններն անթերի չէին, եւ այդտեղ կա լուրջ աշխատելու դաշտ:

Իսկ թե ի՞նչ է սպասվում մեր պատվիրակությանը սեպտեմբերի 29-ին, Գուրգեն Արսենյանը կանխատեսել չի կարող: Միայն վստահ է, որ սեպտեմբերի 28-ին արդեն պարզ կլինի, թե ինչ է տեղի ունենալու 29-ի լիագումար նիստում: Եւ եթե ՄԱԿ-ը կանխատեսումներ անել չցանկացավ, ապա ՀՅԴ խմբակցության ղեկավար Լեւոն Մկրտչյանը գրեթե վստահ է, որ ԵԽԽՎ-ում նման խիստ հարցադրում չի դրվի, չնայած, ըստ ՀՅԴ-ի, որոշ հիմնավոր մտահոգություններ կան:

«Ի դեպ, ԵԽ-ի կողմից ճիշտ չի լինի նման քայլ անելը, եթե նա իսկապես ունի իր կոնցեպցիոն ծրագիրը՝ եվրոընդլայնման եւ սահմանակից երկրներին եվրոպական արժեքներին մասնակից դարձնելու առումով»,- ԵԽ-ին մեր պատվիրակության հանդեպ որեւէ սանկցիա չկիրառելու խորհուրդ է տալիս դաշնակցության ներկայացուցիչը: ՕԵԿ ներկայացուցիչ Մհեր Շահգելդյանը եւս չի կարող եվրոպացիների փոխարեն պատասխանել, սակայն կանխատեսում է, որ ԵԽ-ն հակված է ողջ տարածաշրջանում իրականացնել միատեսակ քաղաքականություն:

Ինչ վերաբերում է խորհրդարանական ընդդիմությանը, ապա, ի տարբերություն «Արդարություն» դաշինքի, որի ներկայացուցիչ Շավարշ Քոչարյանը Ստրասբուրգ է մեկնել, որպեսզի նպաստի մեր պատվիրակության մանդատները չհաստատելու գործին, «Ազգային միաբանությունը», չնայած 2003-ին տեղի ունեցած բոլոր համապետական ընտրությունները համարում է կլասիկ խայտառակություն, սակայն, ինչպես ասաց կուսակցության փոխնախագահ Ալեքսան Կարապետյանը, իրենք չեն ցանկանա, որ մեր պատվիրակության մանդատները չհաստատվեն:

«Մեր երկրի շահերից չի բխում զրկվել եվրոպական կառույցներին ինտեգրվելուց»,- մեր հարցին ի պատասխան ասաց «ԱՄ» փոխնախագահը: Իսկ «Արդարություն» դաշինքը, պարզվում է, Ստրասբուրգի համար հատուկ ակցիա է նախապատրաստել՝ այն դեպքում, եթե ԵԽԽՎ լիագումար նիստում քննարկվի մեր պատվիրակության լիազորությունների հարցը: «Ինչ որ կլինի, մենք հիմա չենք ցանկանում ասել:

Ես ուղղակի կարող եմ հավելել՝ մեր պայմանավորվածությունը խմբակցությունում հետեւյալն է. եթե կքննարկվի պատվիրակությունների լիազորությունների հարցը, մեր ներկայացուցիչը ԵԽ-ից կխնդրի նրանց աջակցությունը՝ «Հանրաքվեի մասին» օրենքում համապատասխան փոփոխություններ կատարելու եւ վստահության հանրաքվե անցկացնելու համար: Դրանից հետո մենք կանդրադառնանք լիազորությունների ճանաչման հարցին: Պատվիրակության լիազորությունների ճանաչման հարցն ուղղակի կապված է խորհրդարանական ընտրությունների հետ, եւ այդ կոնտեքստում միանգամայն տրամաբանական է, որ չճանաչեն անօրինական ընտրված խորհրդարանի պատվիրակության լիազորությունները»,- մեր հարցին ի պատասխան ասաց խմբակցության քարտուղար Վիկտոր Դալլաքյանը:

Ինչ վերաբերում է խորհրդարանական մեծամասնություն ՀՀԿ-ին, ապա խմբակցության ղեկավար Գալուստ Սահակյանը կարծում է, որ հարցը պետք չէ այդքան դրամատիզացնել: Իսկ Շավարշ Քոչարյանն էլ, ըստ Գալուստ Սահակյանի, շատ վատ բան կանի, եթե հանկարծ Ստրասբուրգում խայտառակ անի ռեսպուբլիկան:  

Նաիրա Զոհրաբյան