Երրորդմասցի Լյովիկի ուղղությամբ արձակված կրակոցների հետեւանքով 10 մեքենա է վնասվել

Քրեական հեղինակություն Երրորդմասցի Լյովիկի եւ նրա երկու ընկերների սպանության գործով այսօր տեղի ուենցած դատական նիստին հետազոտվեցին սույն գործում առկա գրավոր ապացույցները:

Էրեբունի եւ Նուբարաշեն վարչական շրջանների ընդհանուր իրավասության դատարանը Արտուշ Գաբրիելյանի նախագահությամբ այսօր նախատեսում էր հրապարակել տուժողների իրավահաջորդների նախաքննական ցուցմունքները, քանի որ վերջիններս դեռեւս ամիսներ առաջ հրաժարվում էին դատարան ներկայանալ եւ ցուցմունք տալ:

Սակայն մեղադրող դատախազ Արամ Արամյանն առաջարկեց եւս մեկ անգամ ծանուցել տուժողների իրավահաջորդներին` դատարան ներկայանալու եւ հարցաքննվելու համար, իսկ մինչ այդ փոխել ապացույցների հետազոտման հաջորդականությունը եւ հետազոտել գործում առկա գրավոր ապացույցները: Դատավարության կողմերը չառարկեցին, դատարանն անցավ գրավոր ապացույցների հետազոտմանը:

Մասնավորապես, այսօրվա նիստին հետազոտվեցին նախաքննական մարմնի կողմից նշանակված մի շարք փորձաքննությունների՝ այդ թվում դատաձգաբանական, մատնադրոշմային, դատագենետիկ, դատաբժշկական, դատահոգեբուժական, դատաձեռագրաբանական, դատաապրանքագիտական, դիակի դատաբժշկական փորձաքննությունների եզրակացությունները: Սպանված Երրորդմասցի Լյովիկի, նրա ընկերների՝ Դրաստամատ Թադեւոսյանի (մականունը Դրո) եւ Մեսրոպ Նազարյանցի (մականունը՝ Մոսո) դիակների դատաբժշկական փորձաքննությունների համաձայն, վերջիններս ստացել էին մի քանի հրազենային վիրավորումներ մարմնի տարբեր մասերում՝ կրծքավանդակի, գլխի, ստորին վերջույթների, ձեռքերի շրջաններում: Գլխի շրջանում հրազենային վնասվածք ստացել էր միայն Մեսրոպ Նազարյանցը: Ըստ այդ փորձաքննությունների եզրակացությունների՝ նրանց բոլորի վնասվածքները պատճառվել էր կենդանության օրոք, մահվանից կարճ ժամանակ առաջ, իսկ դատաքիմիական փորձաքննությամբ՝ տուժողների՝ Լյովիկի, Դրոյի ու Մոսոյի արյան մեջ չեն եղել ո՛չ ալկոհոլ, ո՛չ թմրանյութ կամ հոգեմետ միջոցներ:

Գործով կատարվել են բազմաթիվ դատագենետիկական փորձաքննություններ՝ ամբաստանյալների եւ տուժողների արյան նմուշների ու դեպքի վայրից առգրավված իրեղեն ապացույցների մոլեկուլային համեմատական փորձաքննություններ: Ընդ որում՝ առգրավված ինքնաձիգների վրա արձանագրվել է ամբաստանյալների ԴՆԹ նմուշների առկայություն:

Այսպես՝ դատագենետիկական փորձաքննության արդյունքների համաձայն՝ դեպքի վայրում հայտնաբերված զենքերի վրա հայտնաբերված ԴՆԹ-ները հիմնականում չեն համընկել գործով տուժողների եւ ամբաստանյալների արյունից անջատված ԴՆԹ-ներին: Ըստ փորձագիտական եզրակացության՝ միայն զենքերից մեկի վրայից անջատված ԴՆԹ-ի հետքն է 99,9 տոկոսով համընկել գործով ամբաստանյալ Վահան Հակոբյանի (Մականունը՝ Գաստիկ) ԴՆԹ-ին: Փորձաքննության է ենթարկվել նաեւ կալանավայրի ավտոկայանատեղիում կայանված «Վազ 2107» մակնիշի ավտոմքենան, որի մեջ ՝ըստ նախաքննության տվյալների՝ դարանակալել են զինված անձինք եւ սպասել Լեւոն Ղազարյանի ժամանելուն: Ըստ քննության տվյալների՝ գործով ամբաստանյալներ Վահան Հակոբյանը, Սարգիս Գրիգորյանը եւ Սարգիս Հախանումյանը ձեռք են բերել անհայտ անձի կողմից Րաֆֆու փողոցում գտնվող շենքի բակից գաղտնի հափշտակված «Վազ 2107» մակնիշի, սպիտակ գույնի ավտոմեքենան, որի վրա տեղադրվել է գողացված համարանիշ։ Ավտոմեքենան պարբերաբար տեղափոխվել եւ կայանվել է առանձնատան ավտոտնակում, որտեղ այն վերանորոգվել եւ մինչեւ հանցագործության օրը սարքին վիճակի է բերվել։ Համաձայն փորձաքննության եզրակացության՝ հիշյալ մեքենայի միջից հայտնաբերվել են իրեր՝ այդ թվում սպոտային պայուսակ, որոնց վրայից հայտնաբերված ԴՆԹ հետքերը հնարավոր չի եղել նույնացնել գործով ամբաստանյալների արյունից անջատված ԴՆԹ-ներին:

Կատարվել է նաեւ դատաձեռագրաբանական փորձաքննություն՝ Երրորդմասցի Լյովիկի շրջապատի մեքենաների համարանիշերի ձեռագիր գրառումների, որոնք հայտնաբերվել են Հախանումյանի վարձակալած բնակարանում: Ըստ եզրակացության՝ համարները գրի է առել ինքը՝ Սարգիս Հախանումյանը՝ (Մականունը Տլե):

Դատահոգեբուժական փորձաքննության եզրակացությամբ՝ Սարգիս Գրիգորյանը՝ (Ծգըլը), ճանաչվել է մեղսունակ: Իսկ Վահան Հակոբյանի (Գաստիկ) մոտ հայտնաբերվել է միայն «Անձի հիստերիկ խանգարում», որը հոգեկան հիվանդություն չէ: Դատավորի ճշտող հարցին, թե ճի՞շտ է, որ մեղսունակ ես ճանաչվել, կարող է հիվանդ ե՞ս, Ծըգըլը ժպտալով պատասխանեց. «Հա, հա ճիշտ ա, նորմալ ա»: Փորձաքննությունների եզրակացությունների հրապարակումն իրականում ձանձրացրել էր ամբաստանյալներին: Իսկ երբ դատարանը սկսեց հրապարակել դատագենետիկական փորձաքննության արդյունքները, որը նույնաբովանդակ էր ինչ մյուս եզրակացությունը, պաշտպանական կողմը դժգոհություն հայտնեց: Լուսինե Սահակյանը, երբ նկատեց, որ դրանք նույնաբովանդակ են եւ անհրաժեշտություն չկա հրապարակելու, միջադեպ տեղի ունեցավ նրա եւ Երրորդմասցի Լյովիկի հոր միջեւ. տուժողի իրավահաջորդը պդնեց, որ դրանք պետք է հրապարակվեն: Այնուամենայնիվ, դրանք դատարանը հրապարակեց:

Հրապարակվեց նաեւ դատաապրանքագիտական փորձաքննության եզրակացությունը: Այս եզրակացությունից պարզ դարձավ, որ 2015թ. մարտի 4-ին «Նուբարաշեն» ՔԿՀ-ի մոտ քրեական հեղինակություն Երրորդմասցի Լյովիկի եւ նրա երկու ընկերների ուղղությամբ արձակված կրակահերթի հետեւանքով վնասվել է այդ պահին ՔԿՀ-ի ավտոկայանատեղիում կայանված տարբեր մակնիշների շուրջ 10 մեքենա:

Սույն գործով հաջորդ դատական նիստը տեղի կունենա հոկտեմբերի 4-ին, որի ժամանակ դատարանը կշարունակի փաստաթղթերի հրապարակումն ու հետազոտումը: