Հունանյանը զայրացած է. նա սպառնում է ճզմել գործող իշխանություններին

Տպագրվել է «Հայկական Ժամանակ» օրաթերթի՝ 2003 թվականի սեպտեմբերի 27-ի համարում

Մեր զրույցը Նաիրի Հունանյանի պաշտպան, ՀՀ փաստաբանների միության անդամ Սամվել Մարտիրոսյանի հետ նրա խնդրանքով էր: Նախորդ օրը նա խմբագրություն էր բերել Հունանյանի «ուղերձը» հայ ժողովրդին եւ ցանկություն էր հայտնել հարցազրույց տալ մեր թերթին:

Մեկ շաբաթ առաջ նա արդեն հանդես էր եկել մամուլով եւ գրեթե նույնությամբ կրկնել իր պաշտպանյալի դատարանում հնչեցրած մտքերն այն մասին, որ մեղադրանքների մի մասն անհիմն է, մյուս մասը սխալ է առաջադրվել, որ նրանք սպանելու մտադրություն չեն ունեցել, այլ մտադիր են եղել վարչապետի հրաժարականը պահանջել ու նոր կառավարություն կազմել: Նախ, մեր զրույցում փորձեցինք հասկանալ, թե ինչով է պայմանավորված մամուլի հետ ինտենսիվ շփվելու պաշտպանի որոշումը:

Մարտիրոսյանը նշեց, որ ինքը չէր կարող չհարգել իր միության կանոնադրությունը եւ հրաժարվել պետպաշտպանության կարգով այս գործը ստանձնելուց, սակայն խոստովանեց, որ այն պրոֆեսիոնալ առումով իրեն հետաքրքիր է: Ինչ վերաբերում է հարցազրույցներ տալուն, ապա թեեւ դրանք չեն մտնում իր պարտականությունների մեջ, սակայն ինքը համաձայնել է դա անել իր պաշտպանյալի խնդրանքով:

Ընդհանրապես իր եւ Հունանյանի միջեւ «փոխադարձ վստահություն» կա, եւ պրն Մարտիրոսյանը համոզված է, որ ինքը Ն.Հունանյանի չորրորդ եւ վերջին պաշտպանն է լինելու, քանի որ իրենց մեջ «զուտ պաշտոնական հարաբերություններ չեն, այլ գաղափարական խոսակցություններ են ունենում», որոնց ժամանակ խոսում են պատմությունից, ազգի ճակատագրից, եւ այդ ժամանակ Նաիրին լիովին վստահում է իրեն: Եվ քանի որ պաշտպանն արդեն ձեւակերպել էր իր առաքելության իմաստը՝ «պարզել իրականում ինչ է կատարվել հոկտեմբերի 27-ին», ուստի մենք հույս հայտնեցինք, որ թերեւս այդ խոսակցությունների ընթացքում նրան դա հաջողվի:

Պրն Մարտիրոսյանը ժխտեց այդ հնարավորությունը այն պատճառով, որ ԱԱՆ մեկուսարանում ճանճի տզզոցն անգամ ձայնագրվում է, եւ Նաիրին այդ մասին գիտի: Եվ ասաց, որ մեկ ամսում իրեն չի հաջողվել իմանալ որեւէ փաստ, որը չի ասվել նախաքննության եւ դատաքննության ժամանակ: Ընդհակառակը, իր պաշտպանյալը կրկնել է, որ ինքն է ահաբեկչության կազմակերպիչը: Մենք հետաքրքվեցինք, թե ինչով է զբաղվել պաշտպանն այս 20 օրում:

«Ոչ մի փաստաբան չի կարող գլուխ գովել, որ 20 օրում կարող է 50 հատորի ծանոթանալ»,- ասաց Ս. Մարտիրոսյանը, բայց շաբաթը 4 օր հանդիպելով Ն.Հունանյանին՝ նա հասցրել է բավական ուսումնասիրել գործը եւ իրեն այսօր իրավունք է վերապահում հայտնել, որ համաձայն չէ մեղադրանքի հետ: Նախ, նա անհիմն է համարում պատգամավորներին պատանդ պահելու եւ ԱԺ գույքը վնասելու մեղադրանքները: Նա ասում է, որ Հունանյանը բարձրախոսով հայտարարել է. «Ով ուզում է՝ կարող է գնալ, մենք ԱԺ նիստ ենք ուզում հրավիրել, ով ուզում է՝ կարող է մասնակցել»:

Պատգամավորները նախընտրել են մնալ: Ինչ վերաբերում է սպանություններին, ապա ըստ պաշտպանի՝ դրանք նախապես պլանավորված չեն եղել, քանի որ Հունանյանների տանը հայտնաբերված գրությունների մեջ վարչապետի հրաժարականի տեքստն է եղել, այսինքն՝ «նպատակը ազգային ուժերից նոր կառավարություն կազմելն էր», ինչը չի հաջողվել, քանի որ երբ մտել են դահլիճ՝ խառնաշփոթ է ստեղծվել: Անգամ պաշտպանը նշեց, թե վարչապետը հայհոյել է, դրանից հետո են սկսվել կրակոցները: Ըստ պաշտպանի, պրոֆեսիոնալ քիլերը իր գործն արագ կաներ ու կհեռանար: Բացի այդ, իշխանություն գրավել, ըստ Ս. Մարտիրոսյանի, նշանակում է՝ գրավել իշխանության 3 թեւերը, «չորրորդն էլ հետը», այսինքն՝ Հունանյանը պետք է սպաներ վարչապետին, ԱԺ նախագահին եւ հանրապետության նախագահին, մինչդեռ, ինչպես հայտնի է, վերջինիս ոչ միայն չի սպանել, այլեւ հանդիպելով նրա հետ՝ համաձայնել է առանց որեւէ պայմանի կամավոր հանձնվել:

«Եթե մի ինքնաթիռ պահանջեր ու Թուրքիա թռչեր, մենք Թուրքիայի հետ տեռորիստներին հանձնելու պայմանագիր չունենք, այնպես որ ամեն ինչ կվերջանար»,- ասում է Ս. Մարտիրոսյանը: Իրենց գաղափարական զրույցների ժամանակ Ն.Հունանյանը հայտնել է, որ զղջում է անմեղ զոհերի համար (անմեղ է համարում զոհված պատգամավորներին), հասկացել է, որ «կազմակերպչական առումով սխալ է արել»՝ կարող էին զոհեր չլինել, նաեւ փոշմանել է, որ Կարենին իր հետ տարել է:

Սակայն ամբաստանյալը համոզված է, որ ինքը Վազգեն Սարգսյանին սպանելով՝ գործել է մի դեպքում ծայրահեղ անհրաժեշտությունից ելնելով (անգամ պաշտպանին ասել է, որ եթե Վազգեն Սարգսյանը հրաժարվեր հրաժարական տալ, միայն այդ դեպքում ինքը նրան կսպաներ), մյուս դեպքերում՝ հոգեկան հուզմունքի ազդեցության տակ, ուստի պետք է իր մեղադրանքը վերաորակվի: Ըստ ամբաստանյալի հաշվարկների, ինքը նստած է 4 տարի, որը նոր օրենսգրքով 1 օրը մեկուկես հաշվարկելու դեպքում կազմում է 6 տարի, ուստի վերաորակումից հետո կստացվի, որ ինքն արդեն իր պատիժը կրել է եւ դատավարության ավարտին պետք է ազատ արձակվի: 

Պաշտպանի ասելով՝ Հունանյանն այսօր զայրացած ու հիասթափված է նաեւ գործող իշխանությունից: Այսօր էլ նա պաշտպանի հետ քննարկում է թշվառ թոշակառուների, սպառողական զամբյուղի եւ այլ համապետական խնդիրներ: Նաեւ հայտարարում է, թե կստիպի, որ այս իշխանությունը հեռանա, հակառակ դեպքում՝ «կճզմի ու կոչնչացնի նրանց»: Ըստ պաշտպանի, «նրանց» ասելով նկատի ունի նախագահին, կառավարությանը եւ Ազգային ժողովին, ու համոզված է, որ ժողովուրդը կկանգնի իր թիկունքին:

Արմինե Օհանյան