Լոռու մարզի գյուղերին առանձին-առանձին շտապօգնության ծառայություն հատկացնել հնարավոր չէ

23.08 ամսաթվով հրապարակված «Գոնե հիվանդանոցում մահանար, ոչ թե շտապօգնության պատճառով». կես ժամ հետո են տեղ հասել» վերնագրով հոդվածում Armtimes.com-ն անդրադարձել էր Լոռու մարզի մի քանի համայնքների Շտապօգնության խնդրին. համաձայն մեր զրուցակցի խոսքերի՝ իր եղբայրը վթարի հետեւանքով կարող էր չմահանալ, եթե գյուղում Շտապօգնության ծառայություն լիներ:

Հիշեցնենք, որ օգոստոսի 1-ին Վանաձոր-Դիլիջան ավտոճանապարհին՝ Մարգահովիտ գյուղի մոտակայքում տեղի ունեցած ավտովթարի հետեւանքով  մահացել է 3 երիտասարդ:

Մեր գրավոր հարցումը Առողջապահության նախարարությունը վերահասցեագրել է Լոռու մարզպետարան, որտեղից էլ ստացել ենք հարցերի պատասխանները:

Մեր զրուցակիցը հայտարարել էր, որ Լոռու մարզի Անտառաշեն, Ֆիոլետովո, Լերմոնտոնովո եւ Մարգահովիտ գյուղերին ընդամենը մեկ պոլիկլինիկա է սպասարկում, այն էլ՝ ոչ բարվոք վիճակում: Այս հարցի առնչությամբ Լոռու Մարզպետարանի պատասխանում ասված է, որ  վերոնշյալ համայնքների ազգաբնակչությանը սպասարկում է «Մարգահովիտի առողջության կենտրոն» ՊՈԱԿ-ը, որտեղ աշխատում են երկու ընտանեկան բժիշկներ:

Ահազանգ էինք ստացել նաեւ, որ Շտապօգնության աշխատակիցները կանչի դեպքում ստիպված են լինում ավտոբուսով գնալ մյուս գյուղ, այլ ոչ թե շտապօգնության մեքենայով: Այս հարցի հետ կապված Լոռու մարզպետարանից պատասխանել են.

«Մարգահովիտի առողջության կենտրոն» ՊՈԱԿ-ի սպասարկման տարածքի ազգաբնակչության միայն տնային կանչերը իրականացվում են «Մարգահովիտի առողջության կենտրոն» ՊՈԱԿ-ի ընտանեկան բժիշկների կողմից՝ մինչև ժամը 18.00-ն, իսկ շտապբուժօգնության ծառայությունը իրականացվում է «Վանաձորի բժշկական կենտրոն» ՓԲԸ-ի շտապ բուժօգնության ծառայության միջոցով՝ բացառապես Շտապբուժօգնության մեքենաներով»:

Վթարի հետեւանքով մահացած Էմիլ Խուդինյանի մորեղբոր աղջկա՝ Մարիամ Ղումաշյանի պնդմամբ՝ 2 տուժած ոչ թե տեղում են մահացել, այլ շտապօգնության մեքենայի ուշ հասնելու հետեւանքով, քանի որ գյուղում համապատասխան ծառայություն չկա, եւ ստիպված են եղել սպասել Վանաձորից եկող շտապօգնության մեքենայի: Մեր այս հարցի առնչությամբ պատասխանում գրված է, որ Լոռու մարզի գյուղերին առանձին-առանձին շտապօգնության ծառայություն հատկացնել հնարավոր չէ, քանի որ շտապօգնության ծառայությունը ենթադրում է ոչ միայն ավտոմեքենա, այլ նաեւ շուրջօրյա, հերթափոխով աշխատող բժշկական եւ ոչ բժշկական անձնակազմ: Նման ֆինանսական հնարավորություն գյուղական բժշկական ամբուլատորիան չունի:

Հարց էինք ուղղել նաեւ վթարի կանչի մասին, թե ե՞րբ է այն գրանցվել եւ քանիսի՞ն է մեքենան տեղում եղել: Ինչպես տեղեկանում ենք պատասխանից՝ կանչը գրանցվել է օգոստոսի 1-ին, ժամը 19:41-ին:

«Ըստ Locator ծառայության՝ մեքենան տեղ է հասել 15 րոպե հետո՝ շարժվելով 79կմ/ժ միջին արագությամբ, շարժման սկիզբը՝ ժամը 19:41:48: Շտապօգնության բրիգադը տեսել է երկու դիակ, մյուս տուժածներն արդեն տեղափոխված են եղել այլ մեքենաներով»,-ասված է պատասխանում:

Հիշեցնենք, որ Մարիամ Ղումաշյանի խոսքերով՝ ականատեսները հավաստիացրել են, որ ե՛ւ Էմիլ Խուդինյանը, ե՛ւ Դավիթ Սարգսյանը տեղում չեն մահացել. Դավիթն անգամ ուշքի է եկել, եւ բոլորի մոտ տպավորություն է ստեղծվել, որ նա լավ է: Այնինչ, մինչ Շտապօգնության մեքենայի տեղ հասնելը՝ երկուսն էլ մահացել են:

Խնդրել էինք նաեւ ներկայացնել, թե Շտապօգնության որքա՞ն մեքենա է նախատեսված յուրաքանչյուր մարզում եւ ի՞նչ սկզբունքով է կատարվել այդ բաժանումը, սակայն ստացել ենք միայն Լոռու մարզի տվյալները. ներկայացնում ենք ստորեւ.

«Լոռու մարզի շտապ բուժօգնություն իրականացնող առողջապահական ընկերություններում հաշվառված են թվով 28 հատուկ նշանակության շտապօգնության մեքենաներ, որից՝

«Վանաձորի բժշկական կենտրոն» ՓԲԸ- 8

«Սպիտակի բժշկական կենտրոն» ՓԲԸ- 4

«Ստեփանավանի բժշկական կենտրոն» ՓԲԸ- 5

«Ալավերդու բժշկական կենտրոն» ՓԲԸ- 5

«Տաշիրի բժշկական կենտրոն» ՓԲԸ- 3

«Մեծ Պարնիի առողջության կենտրոն» ՓԲԸ- 2

«Մեծավանի առողջության կենտրոն» ՓԲԸ- 1»:

Հիշեցնենք, որ Լոռու մարզի Գուգարքի քննչական բաժնում քրեական գործ է հարուցվել Քրեական օրենսգրքի 242 հոդվածի երրորդ մասի հատկանիշներով` 2 եւ ավելի անձանց մահվան պատճառ հանդիսացած ավտովթարի դեպքի առթիվ: