Կառավարական նոր համալիրը կառուցեցին 2.5 տարում, գյուղական դպրոցը 5 տարի անց էլ պատրաստ չէ

Հայաստանի իշխանությունները շատ արագաշարժ ու օպերատիվ են, անհրաժեշտ բոլոր միջոցները կարողանում են գտնել եւ խանգարող հանգամանքներ էլ չեն առաջանում, երբ խնդիրը վերաբերում է իրենց համար ճոխություններին ու հարմարավետությանը, իսկ ահա շարքային քաղաքացուն վերաբերող հարցերում դանդաղելու, գործին մատների արանքով նայելու հազարումի պատճառներ են հայտնվում: 

Ասվածի վկայությունն է Արագածոտնի մարզի Վարդենիս գյուղի դպրոցի հետ կապված պատմությունը: «hetq.am»-ի փոխանցմամբ, «դպրոցականները դասադուլ են հայտարարել, քանի որ չեն ցանկանում դասի գնալ 4-րդ կարգի վթարային շենքում, իսկ նոր դպրոցը, որի հիմքերը փորել են 2012 թվականից, դեռ վերջնական կառուցված չէ»: «Էս դպրոցում նորմալ պատեր էլ չկան, որ մենք նստենք, «սկվազիտ» չանի: Սաղ պատերը ծակ են», «դասի ենք նստում զոնտիկներով», «գաջը պոկվում, ընկնում ա գլխիս», «բայց ոչի՞նչ, որ մենք էն դարում ենք ապրում, որ պետք չի սենց վատ դպրոց ունենանք»,- մարզպետարանից ժամանած պաշտոնյաներին պահանջատիրական տոնով իրավիճակի անհեթեթությունն էին բացատրում երեխաները` հայտարարելով, իրենց առողջությունը դասերից կարեւոր են համարում ու դպրոց չեն հաճախելու:

«Նախագահին զեկուցվել է էս ամեն ինչը, ու իր խնդրանքը, իր հորդորն է, որ 10 օր համբերեք, մինչեւ վերջացնեն: Հիմա ես էլ, որպես ուսուցիչների, ձեզ եմ խնդրում, եկեք հարգենք մեր վերադասի խոսքը: Դուք կարող եք. երեխան ի՞նչ է, երեխան պլաստիլինի պես բան է, ուզենաս` ջրի կաթիլ կսարքես, ուզենաս` սուր»,- արդեն դպրոցի աշխատակազմին դիմելով` ասում էր մարզպետարանի քաղաքաշինության վարչության պետ Աշոտ Դավայանը:

Այս գյուղի դպրոցի կառուցման նպատակով բյուջեից հատկացվել է շուրջ 430 միլիոն 700 հազար դրամ կամ ներկայիս փոխարժեքով` մոտ 1 միլիոն դոլար: Կառուցման աշխատանքների ձեռքբերման իրավունքի մրցույթում հաղթող է ճանաչվել «Սպիտակ կամար» ՍՊԸ-ն, որի հիմնադիրը ԱԺ պատգամավոր Արագած Ախոյանն է: Շինաշխատանքները պետք է ավարտվեին 2 տարում: Այսինքն՝ նոր շենքը շահագործվելու էր 2014-ից, բայց 2016-ի կեսն էլ անցել է, իսկ այն դեռ ավարտուն տեսք չունի:

Նկատենք, որ այդ նույն ժամանակամիջոցում, ինչ ձեռնարկվել էր դպրոցի շինարարությունը, Արագած Ախոյանի հիմնադրած մեկ այլ ընկերություն` «Սպիտակ տնակը» զբաղված էր Երեւանում կառավարական վարչական համալիրի կառուցմամբ, որի արժեքը շուրջ 30 միլիոն դոլար էր: Այդ աշխատանքները սկսվեցին 2013-ի ապրիլին, իսկ 2015-ի դեկտեմբերին տեղի ունեցավ համալիրի հանդիսավոր բացումը: Ասել է թե` եթե Վարդենիսի դպրոցը 5 տարի անց էլ դեռ պատրաստ չէ եւ աշակերտների դասապրոցեսն այդ ողջ ընթացքում կազմակերպվում էր սահմռկեցուցիչ պայմաններում, ապա կառավարության 9  հարկանի շքեղ համալիրը շահագործման հանձնվեց 2.5 տարի անց:

Ենթադրվում է, որ ԱԺ պատգամավորի հիմնադրած ընկերությունների ռեսուրսները չեն բավարարել միաժամանակ տարբեր շինաշխատանքներով զբաղվելու համար: Իսկ թե ո՞ր շենքը կառուցել ու ավարտել առաջին հերթին, այս երկընտրանքը, բնականաբար, լուծվել է հօգուտ կառավարական համալիրի ու պաշտոնյաների հարմարավետության:

Երեկ մեզ չհաջողվեց կապ հաստատել Արագած Ախոյանի հետ: Իսկ Վարդենիս համայնքի ղեկավար Կամո Պետրոսյանը, խոսելով դպրոցի շինաշխատանքների ձգձգման մասին` ասաց, որ պատճառը նախագծային որոշակի սխալներն են` չբացառելով, սակայն, որ եղել են նաեւ այլ գործոններ: «Կարող է էլի ազդակներ կան, ես այդքան խորը տեղյակ չեմ»,- ասաց նա:

Պետրոսյանը կարծիք հայտնեց, որ բարձրացված աղմուկն ուղղակիորեն կապ ունի նախորդ շաբաթ տեղի ունեցած գյուղապետի ընտրությունների հետ, որտեղ պարտված թեկնածուն էլ հրահրել է այս ամենը: «Սա հետընտրական կուտակված բացասական էներգիան է, որը պիտի ժայթքեր ինչ-որ առիթով, եւ ժայթքեց մեկ-երկու «աբիժնիկների» կողմից` ջահելների լեզվով ասած (էս բառը չեմ սիրում, բայց տեղին է արտահայտել)»,-  նշեց նա:

Բայց եթե նույնիսկ ինչ-որ մարդիկ շահադիտական նպատակներով են խնդիրն առաջ քաշել, փաստն այն է, որ դպրոցի կառուցման գործը տարիներ շարունակ գլուխ չի եկել: Գյուղապետից հետաքրքրվեցինք՝ երբ կառավարական շենքն, ի տարբերություն դպրոցի, արագ ու անխոչընդոտ կառուցվում է, արդյոք դա չի՞ խոսում իշխանավորների սահմանած առաջնահերթությունների մասին:

«Ոնց որ ասեք` Գագիկ Ծառուկյանը իր շենքը սարքեց, ավարտեց, ձեր գեղացի Համբոն դեռ չի ավարտել: Կառավարությունը իր շենքը պիտի սարքեր: Այստեղ` այս ծայրամասային գյուղում կառուցվողը Հանրապետության հրապարակի վրա կառուցվող շենքի հետ ոնց եք համեմատում: Կառավարության շենքը ՀՀ կառավարությանն է, այսօրվա գործող անձինը չի, որն էսօր կա, վաղը չկա: Եթե պատվիրակություն է գալիս Մոսկվայից կամ Սինգապուրից, պիտի մտնեն այդ շենքը: Այդ շենքը պիտի լինի, որ ասեն` այ մարդ, սա պետությո՞ւն է, թե ինչ է»,- պատասխանեց Պետրոսյանը:

Դիտարկմանը՝ երբ գյուղի դպրոցի վիճակն են տեսնում, արդյոք պետության մասին պատկերացումը հենց դրանո՞վ չեն կազմում, գյուղապետը արձագանքեց. «Ձեզ չթվա ես պաշտպանում եմ իշխանություններին, մեր պետության մեջ շատ խնդիրներ կան, սկսած բանակից, ծայրամասային գյուղեր կան, որտեղ կոմունալ ոչ մի հարմարություն չկա: Մենք քաղաքից 50 կմ ենք հեռու, համայնքը գազիֆիկացված է, ասֆալտապատված է, ջրի բոլոր խողովակները փոխված են: Դպրոցն էլ մտել է ծրագրի մեջ, կառուցում են, մի միլիոն դոլար են ներդնում: Որոշակի խնդիրներ կան, որ այս ընթացքում կավարտեն»:

Դպրոցի լուսանկարները` «hetq.am» կայքից