Կոալիցիան այս անգամ էլ փրկվեց. առաջիկայում կունենանք քսան նոր փոխնախարար

Տպագրվել է «Հայկական Ժամանակ» օրաթերթի՝ 2003 թվականի հոկտեմբերի 2-ի համարում

Իշխանական կոալիցիայի ներսում փոխնախարարների պաշտոնների բաժանման շուրջ  մեկամսյա բազարը մոտենում է ավարտին: Հայտնի է, որ հանրապետականները կտրականապես դեմ էին հայեցողական պաշտոնները կոալիցիոն սկզբունքով բաժանելու ՀՅԴ-ի պահանջին: Այդ մասին բազմիցս հայտարարել էր ՀՀԿ խորհրդի անդամ Գալուստ Սահակյանը՝ ասելով, որ կուսակցական պետություն սարքելը լուրջ հարված է երկրի անվտանգությանը:

Իսկ վերջերս, դարձյալ հանրապետական տարածքային կառավարման նախարարն ասել էր, որ պարզապես անթույլատրելի է  նախարարությունները վերածել կուսակցությունների մասնաճյուղերի: Այդուհանդերձ, հանրապետականների դիմադրությունը կոտրելու համար դաշնակները մոտ երկու շաբաթ առաջ SOS հանդիպում էին խնդրել Ռոբերտ Քոչարյանից, որն էլ դրեց այս պատմության վերջակետը: Քոչարյանի հետ հանդիպումից հետո ՀՅԴ ԳՄ ներկայացուցիչ Արմեն Ռուստամյանը մեզ տեղեկացրել էր, որ հարցը լուծված է, եւ նախագահն ամեն ինչ կդնի իր տեղը:

Դրանից հետո արդեն վարչապետը եւս հաստատեց, թե՝ համաձայն ձեռք բերված բանավոր պայմանավորվածության, որոշ փոխնախարարների պաշտոններ կբաժանվեն կոալիցիոն սկզբունքով: Ինչպես վկայում են մեր աղբյուրները, կոալիցիայի ներսում այդ հարցի վերաբերյալ արդեն ձեռք է բերվել պայմանավորվածություն: Ըստ այդմ, բացի ՊՆ-ից, ՀՀ ոստիկանությունից ու ԱԱԾ-ից, ԱԳ եւ արդարադատության նախարարությունններից, որոնց վրա չի տարածվելու կոալիցիայի ներսում ձեռք բերված նշյալ համաձայնությունը, մնացած ոլորտներում փոխնախարարների նոր նշանակումներ կլինեն:

Եթե հանում ենք ՊՆ, ԱԳՆ եւ արդարադատության փոխնախարարներին, ապա մնում է 45  փոխնախարարի պաշտոն, որոնցից ընդամենը 20-ը պետք է բաժանվեն կոալիցիոն սկզբունքով: Կոալիցիայի ներսում ձեռք է բերվել համաձայնություն, որ առնվազն 25 փոխնախարարներ, որոնք պրոֆեսիոնալներ են եւ որոնց վրա, ըստ էության, հենված է տվյալ ոլորտը, կմնան իրենց տեղերում: Սակայն, դարձյալ ըստ պայմանավորվածության, չի բացառվում, որ որոշ անկուսակցական փոխնախարարների ստիպեն «գրվել» դաշնակ, ՕԵԿ, կամ՝ նրանք այսուհետ հանդիսանան նշյալ կուսակցությունների կադրերը:

Իսկ մնացած 20 փոխնախարարական տեղերն առաջիկա մեկ-երկու շաբաթվա ընթացքում կբաժանվեն կոալիցիայի ուժերի միջեւ: Հանրապետականները պնդում են, որ իրենց կուսակցության կողմից որեւէ նոր նշանակում չի արվելու: Մինչդեռ երեկ դաշնակցական մեր մի զրուցակիցը ՀՀԿ-ի «զիջումը» համարեց խիստ միամիտ, քանզի, ըստ նրա, առանց դրա էլ ներկա փոխնախարարների մեծ մասը եթե ՀՀԿ անդամ չեն, ապա ներկայացված են ՀՀԿ-ի կողմից:

Այսպիսով, դաշնակցությունը հավակնում է առնվազն 13-15 փոխնախարարի աթոռի, եւ ինչպես մեր զրույցի ընթացքում հայտնել էր ՀՅԴ խմբակցության ղեկավար Լեւոն Մկրտչյանը, իրենք ունեն կադրային հարուստ բանկ եւ գրեթե բոլոր ոլորտների համար կարող են առաջարկել թեկնածուներ ու կրել քաղաքական պատասխանատվություն: Ստացվում է, որ բացի սոցիալական, գյուղատնտեսության եւ առողջապահության նախարարություններից, որոնք ղեկավարում են դաշնակցական նախարարներ, մնացած բոլոր նախարարություններում ՀՅԴ-ն ուզում է ունենալ իր ներկայացուցիչ փոխնախարարին: ՀՅԴ-ի ակնկալիքներից պակաս չէ նաեւ «Օրինաց երկրի» ախորժակը. նրանք եւս դեմ չեն գրեթե բոլոր նախարարություններում ունենալ փոխնախարարներ:

Ինչպես երեկ մեր զրույցի ընթացքում ասաց ՕԵԿ մի անդամ. «Քանի որ կոալիցիայի ուժերը միասնական պատասխանատվություն են կրում կառավարության գործունեության համար, ճիշտ կլինի, որ այն նախարարություններում, որի նախարարը կոալիցիայի մեկ ուժի անդամ է, փոխնախարար նշանակվի կոալիցիայի հակառակ ուժի ներկայացուցիչը: Այս կերպ, ոլորտի համար պատասխանատվությունը կլինի լիարժեք եւ ամբողջական: Ճիշտ չի լինի, որ տվյալ ոլորտի ողջ պատասխանատվությունն ընկնի կոնկրետ մեկ կուսակցության վրա»:

Փոխնախարարների մասով եւս պատասխանատվությունը կիսելու պատրաստակամությունն այսպես հայտնեց ՕԵԿ անդամը: Իսկ ՕԵԿ փոխնախագահ Մհեր Շահգելդյանը մեր հարցին ի պատասխան հաստատեց, որ իրենք եւս կադրերի պակաս չունեն: Այդուհանդերձ, ակնհայտ է, որ խոսքը ոչ թե խմբակային պատասխանատվության, այլ ընդամենը տվյալ ոլորտում սեփական կուսակցությամբ «փայ» մտնելու մասին է: Այսինքն, դաշնակցությունը հայեցողական պաշտոնները եւս «մեջ-մեջ» անելով, ըստ էության, պահանջում է, որ կոալիցիայի երեք ուժերը հավասարապես «փայ» ունենան բոլոր նախարարություններում՝ փոխնախարարների մակարդակով:

 Նկատելի է, որ դաշնակցությունն իր համար կադրային լուրջ բանկ է նախապատրաստում՝ անհրաժեշտության կամ պատեհ առիթի դեպքում տվյալ ոլորտի ողջ պատասխանատվությունը ստանձնելու համար: Սա, թերեւս, պետք է լրջորեն մտահոգի հանրապետական վարչապետին: Այսպիսով, ինչպես մեզ տեղեկացրեց ՀՅԴ մի ներկայացուցիչ, հարցերն, ըստ էության, լուծված են, ու բոլորը սպասում են Մոսկվայում գտնվող ԱԺ նախագահ Արթուր Բաղդասարյանին եւ Ստրասբուրգում գտնվող ՀՅԴ ԳՄ ներկայացուցիչ Արմեն Ռուստամյանին, որոնք կոալիցիայի խորհրդի անդամներ են: Նրանք կգան, առաջիկա շաբաթվա սկզբին կոալիցիայի նիստում վերջնականապես կճշտվեն բաժանման ենթակա ոլորտներն ու թեկնածուները, եւ առնվազն 15 օրից մենք կունենանք առնվազն 19-20 նոր փոխնախարար:       

Նաիրա Զոհրաբյան