Էդվարդ Նալբանդյանը սկի պոնչիկի բուտկա չունի. Աշոտ Աղաբաբյան

Աշխատանքային այցով Ամերիկայի Միացյալ Նահանգներում գտնվող Սերժ Սարգսյանը «Հայաստան. ներդրումային համաժողով 2016»-ի շրջանակներում հայտարարել է, որ Հայաստանում առկա է գործարարության համար կարեւորագույն նախապայման հանդիսացող կայուն մակրոտնտեսական միջավայր:

Այս մասին Armtimes.com-ը զրուցել է ՀՀԿ խմբակցության գործարար, պատգամավոր Աշոտ Աղաբաբյանի հետ.

- Պարոն Աղաբաբյան, Սերժ Սարգսյանը հայտարարում է, որ գործարարության գլխավոր նախապայմանը՝ կայուն մակրոտնտեսական միջավայրը ՀՀ-ում առկա է, համաձա՞յն եք:

- Կարծում եմ՝ նոր վարչապետի նշանակվելուց հետո ավելի կընդլայնվեն այդ պայմանները:

- Նախկին վարչապե՞տն էր խոչընդոտում միջավայրի ընդլայնմանը:

- Խոչընդոտելու խնդիր չի, ընդամենը պայմաններ ստեղծելու խնդիր է, թե նոր վարչապետն ինչ փոփոխություններ կառաջարկի, նաեւ  օրենսդրական փոփոխություններ:

- Ըստ Ձեզ՝ այդ ամենն ինչո՞ւ չէր անում Հովիկ Աբրահամյանը:

- Դա փորձի հետ կապ ունի, պրոֆեսիոնալ խորհրդականների:

- Նախկին վարչապետի մոտ պրոֆեսիոնալիզմի բացակայությո՞ւնն էր պատճառը:

- Դե գիտեք, ով գնում է, սկսում են քննադատել: Եկեք փորձենք լավ բան էլ տեսնել, ես մի անգամ արդեն ասել եմ, որ նոր վարչապետն ահագին փոփոխություններ է արել: Եկեք, լավատես լինենք:

- Սերժ Սարգսյանի հայտարարության հետ համաձա՞յն եք:

- Միջավայրը միշտ էլ եղել է, ուղղակի որոշակի սահմանափակումներ են եղել, նախկին նախարարների մեծ մասը, եթե անմիջական չէ, ապա գոնե բոլորը գիտեն Գագիկ Խաչատրյանից սկսած մինչեւ չգիտեմ ումով վերջացրած բիզնեսմեններ են: Մի անգամ արդեն ասել եմ, որ գնահատում եմ նոր վարչապետի փոփոխությունները, կարծում եմ՝ նա ամեն ինչ կդնի իր տեղը:

- Բարեփոխո՞ւմ եք համարում կառավարության փոփոխությունը, քանի որ շատերը պնդում են, որ մի քանի անձանց փոփոխությունից արմատական փոփոխություն պետք չի սպասել:

- Մի մարդու փոփոխությունից էլ շատ բան է կախված: Նորից եմ ասում, եթե նախկին նախարարների մեծ մասը ոչ ուղղակի բիզնեսներ են ունեցել, բնական է, որ այդ դաշտը պետք է մոնոպոլիզացված լինի: Ոնց որ ասում են՝ նոր արշալույս է, կապրենք, կտեսնենք, հավատանք:

- Պարոն Աղաբաբյան, ինչո՞ւ չեք խորհրդարան գալիս, դեռ նեղսրտա՞ծ եք ՀՀԿ-ից:

- Խորհրդարան չգալս կուսակցության հետ որեւէ կապ չունի, եթե տեսնեմ՝ օրենքներ են բերում, որով փորձելու են խթանել մեր տնտեսությունը, անպայման կգամ:

- Հարկային օրենսգիրքը բավական բուռն քննարկվեց, որոշ ընդդիմադիր պատգամավորներ պնդում էին, որ այն խոչընդոտելու է ՓՄՁ-ներին: Հարկայինն այդքան կարեւոր չէ՞ր, ինչո՞ւ այնտեղ չէիք:

- Ուզում եմ հասկանալ՝ հիմա հարցաքննության մե՞ջ եմ:

- Չէ հարցաքննություն չի, ասում եք կարեւոր նախագծեր պետք է բերվեն, հետաքրքրվում եմ՝ ինչո՞ւ հարկային օրենսգրքի քննարկումների ժամանակ էնտեղ չէիք:

- Ուրիշ գործերով եմ զբաղված եղել:

- Առաջիկայում կլինե՞ք:

- Ասում ա՝ երբ գալիս է սեպտեմբերը...(ծիծաղում է) Իմ կարծիքով՝ լավ կլինի:

- Ներքաղաքական զարգացումներին ի՞նչ գնահատական կարող եք տալ, մասնավորապես՝ Վանաձորի եւ Գյումրու քաղաքապետի ընտրություններին, երբ ՀՀԿ-ն, այսպես ասած, նորից հաղթեց:

- Պայքարում հաղթող պետք է լինի, հաղթեց ՀՀԿ-ն, ի՞նչ վատ է որ: Երկրորդը՝ շատ տեղերում չենք հաղթել: Պարտադի՞ր է, որ 60-70 տոկոս ունենանք: Ինձ այսօր ավելի շատ հետաքրքրում է տարածաշրջանային իրավիճակը: Կարծում եմ՝ Ադրբեջանի ԵՏՄ չմտնելուց շատ բան փոխվեց, օգտակար գործողության գործակիցն ավելի բարձրացավ տարածաշրջանում:

- Քանի որ հետաքրքրվում եք արտաքին քաղաքականությամբ,  կարծում եք՝ լավ արտաքին քաղաքականության համա՞ր էր, որ կրկին Էդվարդ Նալբանդյանը վերանշանակվեց:

- Կադրային քաղաքականության մասին չեմ ուզում խոսել, որովհետեւ հեռու եմ այդ ամենից:

- Չե՞ք ուզում գնահատական տալ նրա վերանշանակմանը:

- Բայց ի՞նչ գնահատական պետք է տամ, ասեմ՝ սխա՞լ են նշանակել կամ ճի՞շտ են նշանակել, ո՛չ ընդդիմություն եմ, ո՛չ էլ ընդդիմադիր տեսք ունեմ: Ընդամենը, ճշմարտությունն եմ ասում:

- Բայց հետաքրքիրն այն է, որ երբ հեռացված նախարարների մասին խոսեցիք, չասեցիք, որ կադրային քաղաքականությունից չեք հասկանում: Բայց վերանշանակված Նալբանդյանի պարագայում, արդեն կադրային քաղաքականությունից տեղյակ չեք, ինչպե՞ս է ստացվում:

- Համոզված եմ, որ Էդվարդ Նալբանդյանը սկի պոնչիկի բուտկա չունի, նորմալ ինտելիգենտ մարդ է, աշխատում է: Հիմա ի՞նչ ասեմ, որ տրիկոտաժի ֆաբրիկա ունենար, կասեի, էդ մարդը նորմալ մարդ է:

- Գո՞հ եք արտաքին  քաղաքականությունից, մասնավորապես, ԼՂ բանակցություններից:

-ԼՂ հարցը հայ ժողովրդի հարցն է, եւ այն հարցը չի, որ ինչ-որ մարդ որոշում կայացնի, որովհետեւ ժողովրդի կամքը նման հարցերում պետք է հաշվի առնվի: Իմ կարծիքով, այդ ամենը հաշվի առնվել եւ առնվում է: