Պապան ե՞րբ տուն կգա. Սարի թաղի բնակիչները պահանջում են ազատել իրենց հարազատներին

Արդեն մի քանի օր է՝ նախագահական նստավայրի մոտ Սարի թաղի բնակիչները ցույց են անում՝ պահանջելով ազատ արձակել իրենց հարազատներին:

Հուլիսի 19-ին՝ ոստիկանության Էրեբունու պարեկապահակային գնդի տարածքի գրավման օրերին ոստիկանների ու սարիթաղցիների միջեւ տեղի ունեցած բախումներից հետո ոստիկանի նկատմամբ բռնություն կիրառելու մեղադրանքով 9 անձ կալանավորվեց: Ըստ Քննչական կոմիտեի, այս գործով 9 մեղադրյալից չորսի գործերն ուղարկվել են դատարան, իսկ մնացած 5-ինը դեռեւս նախաքննության փուլում են:

Կալանավորված 9 սարիթաղցիների հարազատները, պարբերաբար, բողոքի ցույցեր են անցկացնում պետական գրեթե բոլոր գերատեսչությունների առջեւ, սակայն մինչ այժմ որեւէ կոնկրետ պատասխան չեն ստացել: Նրանք վստահեցնում էին, որ հուլիսի 19-ին կալանավորված տղաները որեւէ կապ չունեն «Սասնա ծռեր» խմբի հետ, պարզապես ոստիկաններին մոտեցել են` բողոքելու, որ գազ, լույս, ջուր չունեն: 

Մեղադրյալներից Էդուարդ Զեյթունյանի կինը՝ Լալա Բեռնեցյանը, Սերժ Սարգսյանից խնդրում է վերանայել 9 հոգուն առաջադրված մեղադրանքները, կիրառել համաներում եւ ազատ արձակել նրանց: Թե ինչ էր անում Էդուարդ Զեյթունյանն այդ գիշերը Սարի թաղում` կինը պատասխանեց. «Գնացել էր լույսի, գազի, ճանապարհների համար բողոքելու: Ավտոբուս չէր աշխատում, գազ չկար, ջուր չկար այդ շոգ եղանակին, լույսն էլ պարբերաբար անջատում-միացնում էին: Իմ ամուսինն ու մյուս 8 հոգին կապ չեն ունեցել «Սասնա ծռերի» հետ: 9 հոգուց ոչ մեկը հանցագործ չի եղել, լավ բնութագրեր ունեն թաղայինների կողմից:

2 ամսվա կալանքի ժամկետն անցել է, ո՛չ ազատ են արձակում, ո՛չ էլ դատական նիստն է շարունակվում: Մեր գործով դատախազը` Գարիկ Մանուկյանը, չի գալիս նիստերին: Առաջին անգամ պատճառաբանել է, որ վերապատրաստման դասընթացների է, երկրորդ անգամ՝ դատարանը մեզ ոչինչ չասաց»: Մեր հարցին, թե գործով քանի տուժող ոստիկան կա, Լալա Բեռնեցյանը վստահեցրեց, որ Սարի թաղի կալանավորված 9 տղաների գործողություններից ոչ մի ոստիկան չի տուժել, ներկայացնում են, իբր տուժողները 6-ն են, բայց դատարանի դահլիճում 11-12 հոգուց ավելի նստած են. «Դատարանում նստած են առողջ, դատարանի դահլիճից դուրս գալուց հետո 3 վայրկյանում անհետանում են, որպեսզի հարց չտանք: Հարց ենք տալիս` դու կարո՞ղ ես որպես վկա մատնանշել մի մարդ, որ քեզ քարով հարվածել է` չկա նման մարդ: Չկա տուժած, ոչ էլ վկա: Տղաները հանցագործություն չեն կատարել»:

Հարցին` ինչի՞ համար պետք է իշխանություններն ուզենան ճաղերի ետեւում պահել, երբ ոչ մի քաղաքական դրդապատճառ չկա դրա ետեւում` նա պատասխանեց. «Ես չգիտեմ ինչն է պատճառը, որ կենտրոնացել են պատկան մարմինները հենց այս 9 հոգու վրա»: Նա վստահեցրեց, որ որքան էլ տեսանյութում երեւում է, որ քարեր են նետվում ոստիկանների ուղղությամբ, իր ամուսինը քար չի նետել. «Պահանջում ենք համաներում լինի, մեր ամուսիններին ազատ արձակեն: Երեկ նախագահի ելույթը տեսանք, որ հպարտանում է հայ երեխաներով: Բայց այդ նույն 9 կալանավորված մարդկանց ընտանիքներում էլ կան անչափահասներ: Պարո՛ն նախագահ, ի՞նչ հիմքեր ունեք, որ վաղը նույն ձեւով մեր երեխաները Հայաստանի պատիվը բարձր չեն պահելու: Բայց այդ երեխաները, եթե չմեծանան առողջ ընտանիքում, չենք կարծում, որ հասարակության նորմալ մարդ կլինեն: Մեր երեխաները հայրիկների դաստիարակություն չեն ստանում»:

Մեր հարցին, թե հնարավորություն ունեցե՞լ է տեսակցելու ամուսնուն, նա ասաց, որ երբ տեսակցություն են ունենում քրեակատարողականում, հոգեկան ծանր ապրումներով դուրս են գալիս երեխաները. «Դրա համար մտածում ենք՝ ավելի լավ է չտեսնի հորը, քան թե այդպիսի ապրումների մեջ ընկնի: Հարցնում է՝ երբ է պապան տուն գալու, ի՞նչ պատասխանեմ: Նրանք ունեն առողջական լուրջ խնդիրներ, իմ ամուսինը կոնկրետ ունի ճնշման խնդիր, սրտի խնդիր, ողնաշարի խնդիր: Մինչեւ չեմ ահազանգում Մարդու իրավունքների պաշտպանի գրասենյակ` բժիշկ չեն ուղարկում»,- հուզված նշեց կինը:

Էդուարդ Զեյթունյանը մինչ կալանավորումը շինարարական աշխատանքներ է կատարել: Սարի թաղի բնակիչների խոսքով՝ 9 կալանավորվածներն էլ լուրջ առողջական խնդիրներ ունեն:

Մեր զրույցում նրա պաշտպան Լիպարիտ Սիմոնյանն ասաց, որ Զեյթունյանն իրեն առաջադրված մեղադրանքը չի ընդունում, տուժող ոստիկանների թիվը հասնում է մոտ 20-ի: «Փորձագետի եզրակացության մեջ նշված է, որ որոշ ոստիկաններ ունեն թեթեւ հատկանիշներ պարունակող, կամ չպարունակող վնասվածքներ»,- ասաց Սիմոնյանը: Վերջինս նկատեց, որ 20 ոստիկանն էլ գործով ե՛ւ որպես վկա են ներգրավված, ե՛ւ որպես տուժող: Խոսելով մեղադրանքի մասին, Սիմոնյանն ասաց, որ մեղադրանքը չափազանց անորոշ է. «Այն լղոզված է, կոնկրետացված չէ, թե կոնկրետ ով, ինչ գործողություն է կատարել»,- եզրափակեց էդուարդ Զեյթունյանի պաշտպանը:

Հիշեցնենք, որ հուլիսի 19-ին Սարի թաղում ոստիկանները փակել էին ոստիկանության ՊՊԾ գունդ տանող ճանապարհը։ Մի քանի ժամ բանակցություններից հետո ոստիկանների ու բնակիչների միջեւ տեղի ունեցան բախումներ: Համացանցում տարածված տեսանյութում երեւում է, որ սարիթաղցի մի խումբ երիտասարդներ, նաեւ՝ տարեցներ, սկզբում բանավեճի, ապա՝ քաշքշուկի մեջ են մտնում ոստիկանների հետ: Գործով կալանավորված 9 անձանց մեղադրանք է առաջադրվել ՀՀ քրեական օրենսգրքի 316 հոդվածի 2-րդ մասի հատկանիշներով (իշխանության ներկայացուցչի նկատմամբ վտանգավոր բռնություն գործադրելը): Մեղադրանքը հաստատվելու դեպքում նրանց սպառնում է 5-ից 10 տարվա ազատազրկում: