Սերժ Սարգսյանը պետք է մանրից իրերը հավաքի՞. Փաշինյանը՝ վարչապետին

ԱԺ պատգամավոր Նիկոլ Փաշինյանը Կառավարության ծրագրի քննարկման ժամանակ վարչապետ Կարեն Կարապետյանից հետաքրքրվեց, թե վերջինս ինչպես է վերաբերվում Սերժ Սարգսյանին:

«Մենք սովոր ենք, որ այստեղ վարչապետները Կառավարության ծրագրերը ներկայացնելիս հղում են անում Սերժ Սարգսյանի նախընտրական ծրագրին: Միգուցե դուք մտածում եք, որ Սերժ Սարգսյանը գլխովին ձախողե՞լ է իր նախընտրական ծրագիրը, թե՞ մտածում եք, որ ձեր եւ իր անունների կապվելը կարող է վարկաբեկիչ նշանակություն ունենալ ձեր կառավարության վրա: Ընդհանրապես, ի՞նչ եք մտածում, քանի որ Սերժ Սարգսյանի պաշտոնավարման ժամկետը լրանում է, պետք է մանրից իրերը հավաքի՞ եւ իշխանության ժառանգականության հարցերը լուծի՝ այդ կոնտեքստում ձեր դերակատարումն ինչպե՞ս եք պատկերացնում»,- հարցրեց նա:

Հիշեցնենք, որ Կարեն Կարապետյանը ՀՀԿ անդամ չէ:

Փաշինյանը հետաքրքրվեց՝ կառավարության անդամներն ո՞ւմ են համարում իրենց առաջնորդ՝ վարչապետին, թե՞ Սերժ Սարգսյանին:

Նիկոլ Փաշինյանը հիշեցրեց ԱԺ-Կառավարություն հարց ու պատասխանի ժամանակ վարչապետի կողմից արված այն հայտարարությունը, որ մոնոպոլիաները միշտ չէ, որ վատն են.

«Դուք ասում եք՝ կարեւոր է, թե ինչպես են դրանք ձեւավորվել: Հիմա օրինակ՝ Սամվել Ալեքսանյանի շաքարային մոնոպոլիան օրինակա՞ն է ձեւավորվել, թե՞ ոչ օրինական»,- հարցեց պատգամավորը՝ ձեռքով ցույց տալով դեպի Սամվել Ալեքսանյանի կողմ, ով այդ պահին նստած էր նիստերի դահլիճում, ապա հիշատակեց ԴԱՀԿ նախկին պետ Միհրան Պողոսյանի անվան հետ առնչվող մոնոպոլիաները:

«Բանանի մոնոպոլիան օրինակա՞ն է, թե՞ ոչ: Սերժ Սարգսյանի փեսա Միքայել Մինասյանը հեռուստատեսային դաշտում ունի գերիշխող դիրք, այն օրինակա՞ն է, թե՞ ոչ, այնտեղ անելիք տեսնո՞ւմ եք, թե՞ ոչ»,- հարցրեց նա:

Պատգամավորի մյուս հարցը վերաբերում էր ՀՀԿ-ականների բնորոշումներին՝ նորանշանակ վարչապետի մասին:

«Երբ դուք նշանակվել էիք վարչապետ, ես կարդում էի, որ պատգամավորներն ասում էին՝ Կարեն Կարապետյանը լավ կառավարիչ է, լավ մենեջեր է: Վարչապետի կապակցությամբ նենց ասում են՝ մենեջեր, մենեջեր, տպավորություն է՝ Երեւան-սիթիի տնօրեն են նշանակում: Բայց ամեն դեպքում, ես նայեցի Հայռուսգազարդի՝ ձեր պաշտոնավարման ժամանակ 2009 թվականին ունեցել է 2 տոկոսից ավելի գերնորմատիվային կորուստ, տարին 4 միլիարդ դոլարի գազ անհետ կորել է, ու ոչ մեկ չգիտի դրա տեղը: Հիմա սա լավ կառավարման մասին է վկայո՞ւմ , թե՞ չէ»,-հարցրեց նա:

Պատասխանելով պատգամավորի հարցադրումներին վարչապետն ասաց.

«Հարցին, թե ինչպես եմ վերաբերվում Սերժ Սարգսյանին՝ շատ հարգալից, թե Կառավարության անդամներն ինձ ոնց են վերաբերվում իրենցից հարցրեք: Շարունակակա՞ն է, թե՞ չէ Սերժ Սարգսյանի ծրագիրը, այո, ինձ հրավիրել է վարչապետ աշխատելու Սերժ Սարգսյանը»:

Վարչապետը, ըստ էության, չպատասխանեց պատգամավորի այն հարցադրմանը, թե Կառավարության անդամների առաջնորդն ինքն է, թե՝ Սերժ Սարգսյանը:

Անդրադառնալով մոնոպոլիաների դեմ պայքարին, վարչապետն ասաց.

«Ինչպես ենք պայքարելու Սամվել Ալեքսանյանի, Միհրան Պողոսյանի եւ այլոց մոնոպոլիաների դեմ. շատ պարզ: Խաղի կանոնները բոլորի համար լինելու են նույն ձեւի: Թե ոնց են իրենց մոնոպոլիաներն առաջացել, այս պահին ես համարում եմ, միգուցե ձեւակերպումս մի քիչ կոռեկտ չէ՝ հետաքրքիր չի ինձ բառը, բայց լինելու է բաց դաշտ, ով կլինի ավելի հաջողակ՝ ժամանակը ցույց կտա»:

Ինչ վերաբերում է Գազպրոմ Արմենիայի հետ կապված պատգամավորի դիտարկմանը, Կարեն Կարապետյանն ասաց.

«Հպարտ եմ, որ կառավարել եմ այդ ընկերությունը, պարոն Փաշինյան, եւ համարում եմ ամենակայացած ընկերություններից մեկը: Այդ ընկերությունը մեկ միլիարդ դոլարի ներդրում է արել ՀՀ-ում: Աշխարհում ամենագազիֆիկացված երկիրն է աշխարհում, ինչ վերաբերում է գերնորմատիվային կորուստներին, այդ ընկերությունը եւ մեր ռեգուլյատորն ունեն կոնֆլիկտ: Այն նորմատիվը, որով հաշվարկվում է, Գազպրոմ Արմենիայի կորուստը դրանից ցածր է, բայց այն տոկոսը, որ դրված է սակագնում, դրանից բարձր է»:

Նիկոլ Փաշինյանն արձագանքելով վարչապետի պատասխանին ասաց.

«Ասացիք, որ Սերժ Սարգսյանին վերաբերվում եք շատ հարգալից, ինչի իշխանության մեջ մարդիկ կան, որոնց ոչ հարգալի՞ց եք վերաբերվում»:

Վարչապետը փորձեց ընդհատել, Փաշինյանը հիշեցրեց, որ «հիմա պետք է լուռ լսի, իր պատասխանելու հերթն էլ կգա»:

«Այսինքն՝ Սերժ Սարգսյանին վերաբերվում եք որպես միջին վիճակագրական իշխանավորի՞, թե՞ ավելի բարձր կամ ցածր»,- հարցրեց նա:

Խոսելով մոնոպոլիաների դեմ պայքարի վարչապետի հայտարարության մասին, պատգամավորն ասաց.

«Հիմա ասում եք, որ Սերժ Սարգսյանի, Հովիկ Աբրահամյանի իշխանության տարիներին շաքարի, բանանի դաշտը փա՞կ է եղել»:

Փաշինյանը նաեւ հիշեցրեց, որ ԱԺ համապատասխան հանձնաժողովի եզրակացության համաձայն՝ Գազպրոմը կորուստները նվազեցնելու ուղղությամբ ներդրումներ չի արել:

Վարչապետը պատասխանեց, որ հարց է հնչել ինչպես է վերաբերվում Սերժ Սարգսյանին, ինքն էլ պատասխանել է: