Ոչ մեկից նեղացած չեմ. հայտարարում է Ռոբերտ Նազարյանը

Տպագրվել է «Հայկական Ժամանակ» օրաթերթի՝ 2003 թվականի հոկտեմբերի 22-ի համարում

«Ֆիվթի-Ֆիվթի»,- այսպես գնահատեց գազի սակագնի բարձրանալու հավանականությունը ՀՀ բնական մենաշնորհների կարգավորման հանձնաժողովի նախագահ Ռոբերտ Նազարյանը, որն այդ պաշտոնում առաջին անգամ երեկ մամուլի ասուլիս էր հրավիրել: 

Գազի սակագների բարձրացման շուրջ սակագինը որոշող հանձնաժողովի նման գնահատականը ենթադրում է, որ իշխանություններն առայժմ քաղաքական որոշում չեն կայացրել՝ բարձրանալու է սակագինը, թե ոչ: Կամ եթե կայացրել են, ապա Ռոբերտ Նազարյանը դրանից դեռ տեղյակ չէ: Մի կողմից վարչապետը հայտարարել է, թե բարձրանալու է, մյուս կողմից համառ լուրեր են շրջում, թե Քոչարյանն ամենավերջին պահին հայտարարելու է, թե իր շնորհիվ սակագինը չի բարձրանա, եւ լավամարդ է դառնալու: Իսկ քանի դեռ պատկերը չի հստակեցվել, Ռ.Նազարյանը, բնականաբար, հեռու կմնա վերջնական խոսք ասելուց:

Այսինքն, նրա վերջնական խոսքը անպայման կհաջորդի Ռ. Քոչարյանի խոսքին եւ, իհարկե, չի հակասի դրան: Այդուհանդերձ, Նազարյանը երեկ մի քանի հիմնավորումներ ներկայացրեց, որոնք կարող են արգելակել սակագնի աճը: Նախ հնարավոր է, որ բարձրանա Հայաստանում գազի սպառման ծավալը: Այդ ծավալի նվազումը այն հիմքերից մեկն է, որ ստիպել է «Հայռուսգազարդին»՝ գազի սակագինը բարձրացնելու հայտ ներկայացնել: Քանի որ հանրապետություն ներմուծվող գազի դիմաց վճարումը կարող է կատարվել մասամբ ապրանքներով, ապա դա էլ, ըստ Նազարյանի, կարող է բարձրացնել գազի չթանկանալու հավանականությունը:

Եւ ի վերջո, քանի որ «Հայռուսգազարդի» բաժնետոմսերի 45 տոկոսը ՀՀ կառավարության սեփականությունն է, ապա վերջինս, ինչպես ակնարկեց Նազարյանը, կարող է հրաժարվել իր շահույթից: Կարող է: Սակայն այս ամենը հավանականությունների դաշտից է: Իրականությունը կարող է եւ այլ լինել: «Չեմ ուզում որեւէ թիվ ասել, հետո իմ ասած թվի ձեռքը կրակն ընկնել»,- գազի ապագա սակագնի շուրջ լրագրողների խաչաձեւ հարցերին ի պատասխան հայտարարեց Նազարյանը եւ խոստացավ այդ «թիվն» ասել մինչեւ նոյեմբերի վերջ: Իսկ որպես Երեւանի նախկին քաղաքապետ՝ Ռոբերտ Նազարյանի վիճակը պակաս շահեկան է:

Մամուլը հեղեղված է նրա պաշտոնավարման ընթացքում մայրաքաղաքի այգիներից հատկացված տարածքների եւ դրանց կառուցապատման տխուր օրինակներով: Նազարյանը պնդում է, օրինակ, որ Օղակաձեւ զբոսայգում իր որոշումների արդյունքում պետք է կառուցվեին միայն թեթեւ կոնստրուկցիաներով սրճարաններ՝ դրանց կից մանկական խաղահրապարակներով, եւ յուրաքանչյուր 1000 ք/մ հատկացված մակերեսի վրա կառուցապատումը չպետք է գերազանցեր 150 ք/մ-ից: Սակայն իրականում կառուցապատվում էր կապիտալ ձեւով եւ 150 ք/մ-ից ակնհայտորեն շատ:

Այս տեղեկատվությունից հետո Նազարյանը մի տեքստ ներկայացրեց, որի բովանդակությունն այդպես էլ չհասկացվեց: «Ինձ կարող են մեղադրել, թե ինչու ես չկարողացա այդ ապօրինությունների դեմ պայքարել: Այո, չկարողացա: Բոլոր գործողությունները, որոնք սկզբունքային դիրքորոշում էին պահանջում, ցավոք սրտի, ավարտվում էին նրանով, որ տուժում էին հիմնականում այն մարդիկ, որոնք միշտ էլ տուժվել էին: Պաշտոնից իմ հեռանալու պատճառներից մեկն էլ հենց դա էր»,- հայտարարեց Նազարյանը եւ դրա շուրջ համառորեն հրաժարվեց հավելյալ պարզաբանումներ տալուց:

Նախկին քաղաքապետին հանձնաժողովի նախագահ նշանակելը պաշտոնի բարձրացո՞ւմ է, թե իջեցում: Մեր այս հարցին Նազարյանի տված պատասխանը հստակ էր. «Միանշանակ, քաղաքապետի պաշտոնը բարձր է, քան սա՝ անվտանգության խորհրդի անդամ ես, քաղաքապետ ես... Լուրջ պաշտոն է քաղաքապետի պաշտոնը»,- ասաց նախկին քաղաքապետը, որի խոսքում նոստալգիայի տարրեր էին զգացվում: «Ես ոչ մեկից նեղացած չեմ»,- հավելեց պաշտոնի ցածրացում ստացած Նազարյանը:

Ի դեպ, Ռ.Նազարյանը նեղացած չէ անգամ մեր թերթից, որը, իր ասելով, անընդհատ անդրադառնում է հանրահայտ «Պեժոյին»: Տպավորություն ստեղծվեց, թե նա ուզում է, որ իրեն հարց տան այդ «Պեժոյի» մասին: Հարց չտվեցին. այդուհանդերձ, Նազարյանը հայտարարեց, թե իր կալիբրի պաշտոնյայի համար այդ մեքենան շատ էժան է՝ ընդամենը 8 հազար 500 դոլար: Բայց սա անցած էտապ է. նախկին քաղաքապետի ծառայողական «Պեժոյի» փայլը լրիվ խամրել է նոր քաղաքապետ Ե.Զախարյանի «Մերսեդեսի» ստվերում:

Հայկ Գեւորգյան