Շոտլանդիան հրաժարվել է մասնակցել Եվրամիությունից դուրս գալու շուրջ բանակցություններին

Շոտլանդիան պաշտոնապես հրաժարվել է մասնակցել Եվրամիությունից Մեծ Բրիտանիայի դուրս գալու շուրջ Եվրահանձնաժողովի հետ առաջիկա բանակցություններին: Դրա փոխարեն Շոտլանդիան պատրաստվում է Եվրամիության հետ առանձին բանակցություններ սկսել՝ նպատակ ունենալով Մեծ Բրիտանիայի հեռանալուց հետո մնալ կառույցի մաս: Այդ մասին Շոտլանդիայի վարչապետ Նիկոլա Սթերջենը հայտնել է երեկ Մեծ Բրիտանիայի վարչապետ Թերեզա Մեյի գլխավորությամբ հրավիրված հատուկ խորհրդակցությունից հետո: Եվրամիությունից Մեծ Բրիտանիայի դուրս գալու շուրջ խորհրդակցությանը հրավիրված են եղել Շոտլանդիայի, Ուելսի եւ Հյուսիսային Իռլանդիայի կառավարությունների ղեկավարները: Մեյը քննարկման ժամանակ, մասնավորապես, պնդել է, որ Շոտլանդիայի, Ուելսի, եւ Հյուսիսային Իռլանդիայի ներկայացուցիչներն անպայման մասնակցեն Եվրամիությունից դուրս գալու շուրջ Եվրահանձնաժողովի հետ առաջիկա բանակցություններին:

Սա նշանակում է, որ Լոնդոնը Շոտլանդիային, Ուելսին ու Հյուսիսային Իռլանդիային զգուշացնում է, որ վերջիններս իբրեւ Միացյալ Թագավության մասեր, եւս պետք է լքեն Եվրամիությունը:

Շոտլանդիայում իշխող ազգայնականներն անընդունելի են համարել այդ պահանջը եւ զգուշացնում են, որ եթե Լոնդոնը շարունակի համառել, երկրամասը, իր հերթին, կլքի Միացյալ Թագավորությունը: «Չեմ կարող չխոստովանել, որ հանդիպման մեծ մասն ինձ խորապես հիասթափեցրել է: Եթե մենք բանակցությունների ընթացքում մեր սպասելիքները լսված լինելու փոխարեն մեր քթի առաջ փակված դուռ ենք տեսնելու, Շոտլանդիան պետք է հնարավորություն ունենա ավելի լավ տարբերակ ընտրել: Ես բլեֆ չեմ անում, երբ խոսում եմ Շոտլանդիայի անկախության հարցով երկրորդ հանրաքվե անցկացնելու մասին: Ես չեմ պատրաստվում ձեռքերս ծալած նստել, թե ինչպես են Շոտլանդիան հրում Brexit-ի անդունդը»,- զգուշացրել է Սթերջենը, ապա հավելել, թե ժողովրդավարության տեսանկյունից անընդունելի է, որ անտեսվեն շոտլանդացիների 63 տոկոսի ձայները, որոնք այս տարվա հունիսի 23-ին կայացած հանրաքվեի ժամանակ դեմ են արտահայտվել Եվրամիությունը լքելուն:

Մերժելով Եվրամիությունից դուրս գալու շուրջ բանակցություններին մասնակցելուց՝ Սթերջենը հայտնել է, որ ինքը մոտակա օրերին ներկայացնելու է Brexit-ի սահուն տարբերակը, ինչը Շոտլանդիային թույլ կտա մնալ Եվրամիության մասնիկ:

Այսպիսով, հունիսի 23-ին Եվրամիությունը լքելու շուրջ Մեծ Բրիտանիայում կայացած հանրաքվեից հետո թագավորությունը հայտնվել է փլուզման շեմին: Հանրաքվեի արդյունքների հիման վրա Լոնդոնը պատրաստվում է 2017 թվականի մարտից Եվրամիությունը լքելու ընթացակարգ սկսել: Այնինչ, Շոտլանդիայի ազգաբնակչության 63 տոկոսը դեմ է արտահայտվել Եվրամիությունը լքելուն: Այժմ Եվրամիության մաս մնալու համար շոտլանդական կառավարությունը սպառնում է երկրամասի անկախության շուրջ նոր հանրաքվե նշանակել, եթե Լոնդոնը հաշվի չառնի շոտլանդացիների կամքը: Ակնհայտ է, որ ներկայիս բանակցությունները ի սկզբանե տանում են դեպի փակուղի. շոտլանդացի ազգայնականները դեմ են Եվրամիությունը լքելուն, իսկ Լոնդոնը՝ հաստատ չի համաձայնի այնպիսի մի հեռանկարի, որ Շոտլանդիան շարունակի մնալ Եվրամիության մաս, ինչը վերջինիս փաստացի անկախ կդարձնի:

Ակնհայտ է, որ Շոտլանդիայի կառավարությունը եւս չի պատկերացնում թագավորության մաս մնալով՝ զուգահեռաբար Եվրամիության մասնիկ մնալու տարբերակը: Ամենայն հավանականությամբ, ազգայնականները Եվրամիության կազմում մնալու շուրջ բանակցություններ նախաձեռնելով, ցանկանում են Մեծ Բրիտանիայի կազմից դուրս գալուն դեմ արտահայտվող ընտրազանգվածին գրավել իրենց կողմը՝ նպատակ ունենալով ապացուցել, թե իրենք ամեն ինչ արել են թագավորության կազմում մնալու համար: Ըստ էության, ազգայնականները նպատակ են դրել օգտագործել այն փաստը, որ երկրամասի ազգաբնակչության մեծ մասը ցանկանում է մնալ Եվրամիության կազմում եւ ներկա պահին կառույցում մնալը գլխավոր խնդիր հռչակելով՝ ջանում են պայմաններ ստեղծել անկախության շուրջ նոր հանրաքվեի ժամանակ հաղթանակ տանելու համար:

Այսինքն, Եվրամիության կազմում մնալու հարցը ազգայնականների ձեռքին դարձել է ծանրակշիռ գործիք անկախության հասնելու համար: Այնինչ, 2014 թվականի սեպտեմբերի 18-ին Շոտլանդիայի անկախության շուրջ հանրաքվեի ժամանակ ազգայնականներին այդքան էլ չէր հետաքրքրում, որ Միացյալ Թագավորությունից անջատվելու դեպքում երկրամասը դուրս կմնա նաեւ Եվրամիությունից: 2014 թվականի հանրաքվեի ժամանակ շոտլանդացիների 55 տոկոսը դեմ է արտահայտվել անկախությանը (կողմ էր արտահայտվել 45 տոկոսը): Ընդ որում, շատերը խոստովանել են, որ կողմ են անկախությանը, սակայն Եվրամիությունից եւս դուրս մնալու հեռանկարը հաշվի առնելով՝ նախընտրել են մնալ թագավորության կազմում:

Այժմ, երբ հունիսի 23-ի հանրաքվեից հետո Մեծ Բրիտանիան ինքն է որոշել լքել Եվրամիությունը, ազգայնականները հաջողությամբ օգտագործում են հենց այն նույն խաղաքարտը, որը ժամանակին իրենց դեմ օգտագործվեց: Կարելի է սպասել, որ երկրորդ հանրաքվեի դեպքում, որը կարող է կայանալ 2017 թվականի առաջին կեսին, անկախության օգտին կարտահայտվեն ոչ միայն նախորդ հանրաքվեի ժամանակ կողմ քվեարկած ընտրողների 45 տոկոսը, այլ նաեւ նրանք, ովքեր դեմ քվեարկեցին հանուն Եվրամիությունում մնալու: