«Մանվել Գրիգորյանին չեմ ծեծել». Էջմիածնի նախկին քաղաքապետն անդամագրվել է ՀՎԿ-ին

«Մանվել Գրիգորյանին չեմ ծեծել». ՀՀ Կառավության աշխատակազմի նախկին կառավարիչ, Էջմիածնի նախկին քաղաքապետ Հրաչիկ Աբգարյանի արձագանքն այսպիսինն էր, երբ իմացավ, որ լրագրող է զանգահարել:

Հետո պարզվեց, որ Աբգարյանը կատակում էր՝ հիշելով այս տարվա սկզբին մամուլում տարածված տեղեկությունները, որոնց համաձայն Մանվել Գրիգորյանը ծեծել է իրեն:

Մեր հարցին ի պատասխան Աբգարյանը տեղեկացրեց, որ մեկ շաբաթ առաջ Արթուր Բաղդասարյանի ղեկավարած «Հայկական վերածնունդ» (նախկին Օրինաց երկիր) կուսակցությանն է անդամագրվել: Ըստ մամուլում շրջանառվող տեղեկությունների՝ Աբգարյանը հանդիպել է Բաղդասարյանի հետ եւ առաջիկա խորհրդարանական ընտրություններում ՀՎԿ-ի համար ձայներ ապահովելու դիմաց ցանկացել է անցողիկ տեղ ունենալ կուսակցության ցուցակում:

Մեզ հետ զրույցում նախկին քաղաքապետը չհերքեց, որ հանդիպել է Արթուր Բաղդասարյանի հետ, սակայն վստահեցրեց, որ որեւէ պայմանավորվածություն, բացի կուսակցությանը անդամագրվելուց, չի ունեցել:

- էդքան էլ տենց չի, բայց հանդիպել ու խոսել ենք:

- Իսկ ի՞նչ եք պայմանավորվել:

- Պայմանավորվելու բան չկա, պայմանավորվել եմ, որ անդամակցեմ այդ կուսակցությանը, էդքան բան:

- Չե՞ք խոստացել Էջմիածնից ՀՎԿ-ի համար ձայներ ապահովել եւ փոխարենը պատգամավոր դառնալ:

- Տենց բան չկա, բացառված է: Ուղղակի էսօրվա մեր քաղաքական վիճակը տեսնելով չմասնակցել այդ ամենին, ոնց որ անտարբեր լինես ազգիդ նկատմամբ: Եթե էդ քաղաքում ապրում ես, պիտի մի բան անես: Քցեցինք-բռնեցինք, որ տեսնենք ինչով կարող ենք օգնել էս ճգնաժամից դուրս գալու համար, էդքան բան:

- Ի՞նչ եք կարծում՝ Արթուր Բաղդասարյանը որեւէ բան կարո՞ղ է անել այդ իմաստով:

- Դե կուսակցությունը էդքան մեծ ... ասենք Հայաստանի ժողովուրդ են, Հայաստանը սիրում են, Արթուր Բաղդասարյանն ի՞նչ անի, կուսակցությունը պետք է անի:

- Ինչո՞ւ որոշեցիք հենց Արթուր Բաղդասարյանի ղեկավարած կուսակցությանն անդամակցել:

- Որովհետեւ կայուն կուսակցություն է, չի փոխվում, ինչ կա, մնում է, ծայրահեղ չեն: Հասկանո՞ւմ եք ինչի մասին է խոսքը: Մարդիկ են, կարող է սխալներ են լինում, բայց բոլորը ժամանակի խնդիր է:

- Ընդամենն ամիսներ առաջ փոխվեց կուսակցության անունը: Ի՞նչ նկատի ունեք կայուն ասելով:

- Դե արդեն ժամանակը ցույց տվեց, որ ինչքան ժամանակ է այս կուսակցությունը կայացած կա: Նոր կուսակցությունների վրա հենվելը... Ես ընկերներ ունեմ այդ կուսակցությունում, Արթուր Բաղդասարյանը կարող է ինչ-որ բաներ է ասել, վրիպումներ ունի, բայց դա ամբողջ կուսակցության հետ կապ չունի:

- 2008-ի Մարտի 1-ից հետո, երբ ընդդիմությունը գրեթե հասնում էր հաջողության, Արթուր Բաղդասարյանը հետ կանգնեց՝ կոալիցիա կազմելով ՀՀԿ-ի հետ:

- Ես միայն կարող եմ ասել, որ առանց ծայրահեղության, հանգիստ, հանդարտ կուսակցություն է: Ես չեմ ուզում կռիվ անեմ, չգիտեմ ինչ անեմ, ինձ պետք է կուսակցություն, որը հանդարտ, երկխոսությունների միջոցով հարց լուծի: Մենք ճահիճի մեջ ենք մխրճված, քանի գնում, մխրճվում ենք, պետք է օգնենք՝ կամ հետ գնալ, կամ առաջ գնալ: Պետք է շատ բաներ մի կողմ դնենք, միասնական հարցեր լուծենք: Եթե Հայաստանում ես, էս երկիրը սիրում ես, պետք է շատ-շատ բաներ դնես մի կողմ ու փրկես ազգին: Եթե տնտեսություն չունենանք, եթե արտագաղթը շարունակվի, ո՞նց ենք Ղարաբաղ պահելու: Մենք այսօր ամեն ինչ պետք է մի կողմ դնենք ու միավորվենք, որովհետեւ մենք այսօր Հայաստան ենք կորցնում:

- Խորհրդարանական ընտրությունների ժամանակ «Հայկական վերածնունդի» ցուցակում կլինե՞ք:

- Կլինեմ, իհարկե, եթե բախտ վիճակվի, բայց իմ համար դա կարեւոր չի, ճիշտն ասած: Ես ուզում եմ, որ իմ ընկերները չգնան այստեղից: Բոլորը գնացել են, ես էլ հա փորձում եմ գնալ, գնում եմ, նորից հետ եմ գալիս:

- Պարոն Աբգարյան, Էջմիածնի քաղաքապետի ընտրությունների ժամանակ սատարում էիք գործող քաղաքապետի հակառակորդին՝ Արթուր Թումանյանին, ում ծեծի ենթարկեցին: Դուք հայտարարել էիք, որ պահանջում եք չեղյալ համարել ընտրությունները: Երեկ արդեն Կարեն Գրիգորյանը երդվել է ու ստանձնել պաշտոնը: Որեւէ քայլ չձեռնարկեցի՞ք:

- Երդվելուց ես տեղյակ չեմ: Բողոքարկման ժամկետն ավարտվել է:

- Կարեն Գրիգորյանի հետ հաշտվե՞լ եք այդ դեպքերից հետո, ձեր հորեղբոր տղային էին նաեւ ծեծել:

- (Լռում է:)

- Հաշտվե՞լ եք:

- Ու՞մ հետ հաշտվեմ, իմ հե՞տ: Բոլորի հետ հաշտվել եմ, բացի ինձնից, իմ հետ չեմ կարողանում:

- Կարեն Գրիգորյանի հետ հաշտվե՞լ եք:

- Ես նրան չեմ ճանաչում, ես նրանց հետ չեմ շփվում, որ հաշտվեմ կամ չհաշտվեմ: Ես բոլորի հետ հաշտվել եմ, բացի ինձնից, կարո՞ղ եք հաշտեցնել:

- Ի՞նչ խնդիր ունեք:

- Երբ իմանամ ինչ խնդիր ունեմ, լավ կլինի: Մարդ պիտի իմանա ինչ է ուզում եւ ուր է գնում: Դա շատ կարեւոր է: