Թմրանյութը «հիվանդին» էլ չի օգնի. 11 հեռուստաընկերություն փակման վտանգի առջեւ է

Հայաստանի թվային հեռարձակման անցնելու ու անալոգայինն անջատելու հետեւանքով Հայաստանի մարզային հեռուստաընկերությունները մնացել են առանց լսարանի եւ հայտնվել փակման եզրին: Երեկ նրանք հայտարարությամբ էին հանդես եկել՝ ՀՀ իշխանություններից պահանջելով խնդրին լուծում տալ:

Մեզ հետ զրույցում մարզային «Լոռի» հեռուստաընկերության գլխավոր խմբագիր Նարինե Ավետիսյանն ասաց, որ իշխանություններից արձագանք չստանալու դեպքում պատրաստ են անգամ հանրահավաքներ, բողոքի ակցիաներ անցկացնել:

- Տիկին Ավետիսյան, այս պահին ձեր հեռուստաընկերությունը շարունակո՞ւմ է գործել:

- Այո, դեռ գործում են, բայց լսարանը գնալով պակասում է:

- Ինչպե՞ս է դա լինում: Այսինքն՝ այն պահից, երբ որ հեռուստադիտողը թվային սարքը միացնում է իր հեռուստացույցին, այլեւս չի՞ կարողանում դիտել ձեր հետուստաընկերությունը:

- Այո, այո: Երբ որ թվային սարքը միացնում է, այլեւս «Լոռին» չկա ալիքների մեջ:

- Այս պայմաններում, երբ գովազդի քանակն է նաեւ նվազում, որքա՞ն ժամանակ կկարողանաք աշխատել:

- 2015 թվականի դեկտեմբերին մեր լիցենզիաների ժամկետները երկարաձգվել են. մինչեւ 2020 թվականը, համենայնդեպս մինչեւ նոր մրցույթների կազմակերպումը, մենք անալոգային հեռարձակման իրավունք ունենք: Այսինքն՝ դե յուրե մենք կարող ենք աշխատել: Մեր ռեսուրսները դեռ բավարար են, բայց եթե հեռուստադիտողները պակասում են, գովազդն էլ է պակասում: Եթե չունենանք եթեր, չենք ունենա գովազդ, չենք ունենա վճարովի այլ ծառայություններ: Չեմ կարող ասել դեռ որքան կկարողանանք աշխատել, գուցե մեկ ամիս, գուցե 6 ամիս: Չգիտեմ ինչ արագությամբ վանաձորցիները նոր սարքեր կտեղադրեն:

- Իսկ դուք լուծումը որտե՞ղ եք տեսնում:

- Մենք մեր հայտարարության մեջ նշել ենք, որ առաջին հերթին օրենսդրական լուրջ փոփոխություն է պետք: Մենք լրագրողական կազմակերպություններին մի քանի անգամ առաջարկություն ենք արել, նախագիծ նախապատրաստվել, ներկայացվել Ազգային ժողով: Որպեսզի աղմուկը մեծ չլինի, մի քանի անգամ ուղղակի լիցենզիաների ժամկետները երկարաձգվել են, բայց իրականում դա նման է նրան, որ հիվանդին թմրանյութ տան, ցավերն անցնի՝ մինչեւ հաջորդ ցավերը:

Հիմա օրենքով յուրաքանչյուր մարզում մեկ տեղական ալիք է նախատեսվում, մենք այդ օրենքի դեմ ենք բողոքում: Յուրաքանչյուր մարզում մեկ ալիք, սա արդեն խախտում է սպառողների այլընտրանքային լրատվություն ստանալու իրավունքները, ընտրության հնարավորոթյունը: Մենք գտնում ենք, որ իշխանությունները պետք է կամք ունենան եւ վերանայեն օրենքը: Համենայնդեպս, մենք լուծում ենք առաջարկել եւ գիտենք, որ մարզերում տեղակայված հանրային մուլտիպլեքսը հնարավորություն ունի մինչեւ 4 հեռուստաալիք հեռարձակելու: Առաջարկում ենք հնարավորություն տալ մեր հաղորդումները հեռարձակել հանրային մուլտիպլեքսով, մինչեւ Հեռուստատեսության եւ ռադիոյի մասին օրենքի փոփոխությունը: Սա միջանկյալ լուծում է: Մենք դրա համար պատրաստ ենք վճարել:

Այլապես ստացվում է, որ յուրաքանչյուր մարզում կա մեկ արտոնյալ հեռուստաընկերություն: Լոռու մարզում դա «Ֆորտունա» հեռուստաընկերությունն է, որը չէր էլ գործում մրցույթի պահին: Տնօրենը աշխատում էր Երեւանի «Շանթ» հեռուստաընկերությունում. դե պատկերացրեք, թե ինչքանով էր աշխատող այդ հեռուստաընկերությունը:

- Դուք որեւէ միտում տեսնո՞ւմ եք տեղի ունեցողի մեջ:

- Կարող եմ ասել, որ այս ամենից տուժում է ոլորտը: Թվային դարաշրջանում ոլորտը պիտի ավելի զարգանա: Այս պարագայում հետընթաց ենք արձանագրում: Բացի այդ, առջեւում ընտրություններ են եւ եթե մինչ ընտրություններն այս խնդիրը չլուծվի՝ մենք լուրջ խնդիր կունենանք նաեւ նախընտրական շրջանում այլակարծության, այլընտրանքային լրատվության հարցում: Շատ լավ գիտեք, որ մեր հեռուստաընկերությունը, ինչպես նաեւ այն հեռուստաընկերությունները, որոնք փակման եզրին են կանգնած, օբյեկտիվ լրատվություն են մատուցում, որեւէ օլիգարխի կամ քաղաքական ուժի չեն պատկանում: Եթե հանրապետության ղեկավարությունը իմիտացիա չի անում, իրոք բարեփոխումներ է անում, մենք ակնկալում ենք մեր առաջարկած միջանկյալ լուծման ընդունում: Սպասում ենք արձագանքին:

- Իշխանություններին ուղղված հայտարարության տակ 6 հեռուստաընկերություն է ստորագրել: Այսքա՞նն են փակման վտանգի առջեւ կանգնածները:

- 11 հեռուստաընկերություն է փակման վտանգի առջեւ: Նամակը կազմել են 6-ը, քանի որ աշխարհագրական առումով հնարավոր չէր մեկ օրում բոլորին ստորագրել տալ դիմումը:

- Եթե իշխանությունները չլսեն ձեր հորդորները եւ որեւէ քայլ չձեռնարկեն: Ի՞նչ եք պատրաստվում անել:

- Այսօր ինձ Վանաձորի ՀԿ-ները դիմել են, որ միանանք, ակցիաներ սկսենք, ստորագրահավաք, քայլերթ, որ իրենք էլ իրենց վերաբերմունքն արտահայտեն: Եթե մեր բաց նամակը լուրջ պատասխան չստանա, կգնանք քաղաքացիական հասարակության հետ այլ քայլերի: Հնարավոր է հանրահավաքներ լինեն Վանաձորում, Լոռու մարզում եւ այլն: Վստահ եմ, որ հանրությունը մեր կողքը կկանգնի, որովհետեւ այդ նույն հանրությունն այսօր արդեն արձագանքում է՝ զրկված լինելով այլընտրանքից: Այսինքն՝ այսօր իրենք միայն նայում են Հանրապետական կուսակցության մատուցած լրատվությունը: