Անդրիաս Ղուկասյանի գործով նոր «գործակալ» վկա է հայտնվել

«Ոտքի՛ Հայաստան» շարժման անդամ, Սարի թաղում զանգվածային անկարգություններ կազմակերպելու մեղադրանքով կալանավորված Անդրիաս Ղուկասյանի դեմ նոր ցուցմունք է հայտնվել:

Անազատության մեջ պահելու համար, իրավապահ մարմինները «հորինել են գործակալ Գեղամ Սարգսյանի գործոնը», որն իբրեւ թե ցուցմունք է տվել եւ ասել, որ Անդրիաս Ղուկասյանը հուլիսի 29-ին առաջնորդել է մարդկանց դեպի ՊՊԾ գունդ։

Այս մասին այսօր լրագրողների հետ զրույցում հայտարարեցին Ղուկասյանի պաշտպաններ Ինեսսա Պետրոսյանը եւ Կարեն Մեժլումյանը:

Մեժլումյանն ասաց, որ Անդրիաս Ղուկասյանի՝ Սարի թաղում զանգվածային անկարգություններ կազմակերպելու գործը տապալվել է, բայց որպեսզի շարունակեն նրան կալանքի տակ պահել, փորձ է արվում նրա գործը միացնել «Սասնա Ծռեր» խմբի անդամների դեմ հարուցված քրեական գործին:

Պաշտպանները ուսումնասիրել են վկայի անցյալը եւ պարզել, որ նա երկու անգամ դատված է եղել փաստաթղթեր կեղծելու եւ խարդախության համար, մեկ անգամ էլ նրան մեղադրանք է առաջադրվել խուլիգանության համար, որը հետագայում հանվել է՝ անձի պարանոյիդ հոգեկան խանգարում ունենալու պատճառով, եւ նա հարկադիր բուժման է ուղարկվել:

Ինեսսա Պետրոսյանի խոսքով, Գեղամ Սահակյանը Սարի թաղի դեպքերի ժամանակ երկու անգամ զանգահարել է Անդրիաս Ղուկասյանին, մեկ անգամ էլ՝ հանդիպել: «Նա ասել է, որ Սարի թաղում է բնակվում եւ անհանգստացած է, որ այնտեղ հոսանք չկա, եւ խնդրել է Անդրիաս Ղուկասյանին զբաղվել այդ հարցով, ասել է, որ սարիթաղցիները ցանկանում են հանդիպել նրան, Ղուկասյանն էլ, կասկածանքներ ունենալով, խնդրել է նրան իր հարցը գրավոր ուղղել: Անդրիաս Ղուկասյանը չի հերքել, որ ճանաչում է այդ մարդուն, բայց ասում է, որ երբեք չի զանգահարել նրան»,- ասաց պաշտպանը՝ հավելելով, որ դա օբյեկտիվ ապացույց է եւ նախաքննական մարմինը պետք է ուսումնասիրի հեռախոսային խոսակցությունների վերծանումները:

Ղուկասյանի պաշտպանները հիշեցրին, որ գլխավոր դատախազությունը հաղորդագրություն է տարածել՝ նշելով, թե ապացույցներ են ձեռք բերվել առ այն, որ Անդրիաս Ղուկասյանը նպատակ է ունեցել Սարի թաղից մարդկանց տանել ՊՊԾ գունդ, միանալ տղաներին եւ օժանդակել նրանց: Պաշտպաններ այդ հաղորդագրությունից են իմացել, որ գործը հանձնվել է Հատուկ քննչական ծառայություն, որեւէ մեկը նրանց մինչ օրս չի իրազեկել այդ մասին:

Կարեն Մեժլումյանն ասաց, որ Գեղամ Սահակյան անունով վկան «Առավոտ» օրաթերթին հարցազրույց է տվել ու քննչական գաղտնիք հայտնել՝ նշելով, որ առաջիկայում Անդրիաս Ղուկասյանի հետ առերեսում է լինելու:

Նա նշեց, որ քննչական գաղտնիությունից ելնելով՝ չեն կարող բացահայտել Գեղամ Սահակյանի ցուցմունքը, սակայն մի բան պարզ է, որ տպավորություն են փորձում ստեղծել, որ կան ապացույցներ, ձայնագրություններ, թե Անդրիաս Ղուկասյանը ցանկացել է մտնել ՊՊԾ գունդ:

Պաշտպանները հայտարարեցին, որ Անդրիաս Ղուկասյանին շարունակում են խոշտանգել: «Գործակալ» վկայի եւ Անդրիաս Ղուկասյանի առերես հարցաքննությունը տեղի է ունեցել տարօրինակ պայմաններում: «Ոչ թե մեկուսարանում, ինչպես ընդունված է, այլ քննչական կոմիտեի շենքում: Այդ օրը առավոտյան՝ ժամը 10-ին, Անդրիաս Ղուկասյանին իր խցից տեղափոխում են հատուկ խուց, պահում այնտեղ, հետո ժամը 13:00-ին տեղափոխում են Արաբկիրի դատարան, այնուհետեւ ժամը 15:00-ին բերում Կոմիտե: Առերես հարցաքննությունը տեւեց մինչեւ գիշերը 01:30»,- պատմեց Ինեսսա Պետրոսյանը՝ հավելելով, որ հարցաքննության ժամանակ Անդրիաս Ղուկասյանի ինքնազգացողությունը վատացել է, շտապօգնություն են կանչել, որից հետո կրկին հարցաքննությունը շարունակվել է:

Ղուկասյանի պաշտպան Կարեն Մեժլումյանի խոսքով` խախտվել են իր պաշտպանյալի իրավունքները, քանի որ Ղուկասյանը ցուցմունք երբեւէ չի տվել, իսկ առերեսման պետք է գնան նրանք, ում տված ցուցմունքներում կան անհամապատասխանություններ: Նա նշեց, որ սա արվում է` միայն ընտրություններից առաջ Ղուկասյանին անազատության մեջ պահելու համար: 

Անդրիաս Ղուկասյանի դեմ ցուցմունք տված, ՀԽ համակիր Գեղամ Սահակյանը, այսօր մեր հարցին ի պատասխան ասաց, որ ոչ թե ինքն է գնացել ցուցմունք տալու, այլ իրեն հրավիրել են: Մեր հարցին ի պատասխան նա ասաց, թե Անդրիաս Ղուկասյանի հետ լավ հարաբերությունների մեջ է եղել: Մեր ճշտող հարցին, թե այդ դեպքում ինչո՞ւ է իր դեմ ցուցմունք տվել, վկան պատասխանեց. «Ես ճիշտն եմ ասել: Թույլ չեմ տա սուտ ասել, ես ինձ հարգում եմ, սիրում եմ, պաշտում եմ»:

Մյուս հարցին, թե իրեն որեւէ մեկն ուղղորդե՞լ է, որպեսզի Ղուկասյանի դեմ ցուցմունք տա, վկան ասաց, թե նման բան չի եղել: «Ո՛չ ուղղորդել են, ո՛չ էլ հոգեբանական ճնշման են ենթարկել, ոնց որ իրենք էին անում»,- ասաց Սահակյանը: Ճշտող հարցին, թե ովքե՞ր են իրեն ճնշել, վկան ասաց, թե Անդրիաս Ղուկասյանի պաշտպանները, հարցին՝ ինչպե՞ս, Սահակյանն պատասխանեց, թե առերեսման ժամանակ տարբեր հարցեր էին տալիս: «Փորձում էին ինձ սարքել քաղաքական գործիչ»,- ասաց նա: Վերջինս հրաժարվեց պատասխանել մեր մյուս հարցերին՝ ասելով, որ առերես հարցաքննությունը շարունակվելու է, չի ուզում ո՛չ իրեն վնասել, ո՛չ Անդրիաս Ղուկասյանին:

Նշենք, որ Գեղամ Սահակյանը մի քանի ամիս առաջ ներկայացել էր որպես «Նոր Հայաստան» շարժման առաջնորդ Ժիրայր Սեֆիլյանի թիկնապահ եւ ապուշություն  համարել ՊՊԾ գունդը գրավելը: Սեֆիլյանի կինը՝ Նանոր Սեֆիլյանը, սակայն հերքել է, որ ամուսինը թիկնապահ է ունեցել: