Նոր՝ «Չինական դերբի» եվրոպական ֆուտբոլում

Առաջիկա հանգստյան օրերին կայանալու են ֆուտբոլային աշխարհում ահռելի հետաքրքրություն առաջացնող 2 դերբիներ. Իտալիայում մրցելու են միլանյան թիմերը՝ «Ինտերը» եւ «Միլանը», Իսպանիայում էլ հանդիպելու են մադրիդյան գերակումբները՝ «Ատլետիկոն» եւ «Ռեալը»: Բայց մինչ այս խաղերին անցնելը նշեմ, որ վաղը Անգլիայում եւ Գերմանիայում կայանալու են 2 ոչ պակաս մեծ հետաքրքրություն առաջացնող հանդիպումներ, որոնք ուղղակիորեն կապված են Հենրիխ Մխիթարյանի հետ: Վաղը Անգլիայի առաջնության շրջանակներում «Մանչեսթեր Յունայթեդը» հյուրընկալելու է Լոնդոնի Արսենալին, իսկ Գերմանիայի առաջնության հերթական տուրում մրցելու են երկրի փոխչեմպիոնը եւ չեմպիոնը՝ Դորտմունդի «Բորուսիան» եւ Մյունխենի «Բավարիան»:

Դորտմունդի «Բորուսիան» հայ ֆուտբոլիստի նախկին, իսկ «Մանչեսթեր Յունայթեդը»՝ ներկա թիմերն են: Չնայած Մխիթարյանը այլեւս չի խաղում «Բորուսիայում», ամեն դեպքում հայ ֆուտբոլասեր հասարակության զգալի հատված դեռ շարունակում է երկրպագել «Բորուսիային», եւ հաշվի առնելով, որ «Բավարիան» Հայաստանում ունի աջակիցների բավական ստվար զանգված, կարելի է վստահաբար նշել, որ վաղը Դորտմունդում կայանալիք «Բորուսիա» - «Բավարիա» հանդիպումը մեծ հետաքրքրություն է առաջացնելու նաեւ մեր երկրում: Նշեմ, որ հանդիպումը մեկնարկելու է Երեւանի ժամանակով 21:30-ին:

Իսկ մինչ այս Երեւանի ժամանակով 16:30-ին սկսվելու է Անգլիայի առաջնության «Մանչեսթեր Յունայթեդ»- «Արսենալ» հանդիպումը: Մեծ հաշվով այս խաղը Մխիթարյանի համար կարող է դառնալ վճռորոշ «Մանչեսթեր Յունայթեդի» կազմում: Անգլիական մամուլը պարբերաբար անդրադառնում է Մխիթարյանին, նշելով, որ Մոուրինյոն մեծ սխալ է գործում՝ չխաղացնելով հայ ֆուտբոլիստին: Բայց պորտուգալացի մարզչին ուշադիր հետեւողները հաստատապես գիտեն, որ Մոուրինյոն երբեք չի ընկրկում մամուլի առաջ եւ մշտապես փորձում է ապացուցել իր ճշմարտացիությունը: Այնպես որ, այնքան էլ մեծ չէ հավանականությունը, թե «Արսենալի» դեմ խաղում Մխիթարյանը խաղադաշտ դուրս կգա: Շատ ավելի հավանական է, որ արդեն ձմեռային տրանսֆերային պատուհանի ընթացքում հայ ֆուտբոլիստը կտեղափոխվի մեկ այլ թիմ:

Իսկ հիմա անցնենք ակումբային ֆուտբոլին համ ու հոտ տվող մեծագույն դիմակայություններից «դերբիներին»՝ նույն քաղաքում գոյություն ունեցող թիմերի հանդիպումներին: Վաղը Իսպանիայի առաջնության շրջանակներում կայանալու է մադրիդյան «դերբին»՝ «Ատլետիկո» - «Ռեալ» հանդիպումը, իսկ կիրակի օրը Իտալիայի առաջնության շրջանակներում կայանալու է միլանյան «դերբին»՝ «Ինտեր» - «Միլան»:

Մադրիդ

«El Derbi madrileño»՝ այսպես են անվանում Իսպանիայում Մադրիդյան գերակումբների՝ «Ռեալի» եւ «Ատլետիկոյի» հանդիպումները: 110 տարվա պատմություն ունեցող այս «դերբին» մինչեւ վերջերս իր նշանակությամբ զիջում էր իսպանական դասական «կլասիկոներին»՝ Մադրիդի «Ռեալի», Բիլբաոյի «Ատլետիկի» եւ կատալոնական «Բարսելոնայի» միջեւ հանդիպումներին: Բայց վերջին տարիներին Մադրիդի «Ատլետիկոն» իր խաղով եւ արդյունքներով բավական առաջ է անցել Բիլբաոյի թիմից եւ նրա խաղերը իսպանական մյուս 2 գրանդների հետ համարվում են համաեվրոպական նշանակության խաղեր: Հատկապես «Մադրիդի «Ռեալի» հետ «Ատլետիկոն» վերջին տարիներին լրջագույն պայքարի մեջ է մտել բոլոր առումներով: Հայտնի է, որ «Ռեալին» երկրպագում են Իսպանիայի մայրաքաղաքի միջին եւ բարձր խավի ներկայացուցիչները, իսկ «Ատլետիկոյի» երկրպագուները բանվոր դասակարգի ներկայացուցիչներն են: Երկար տարիներ «Ռեալի» առավելությունը «Ատլետիկոյի» նկատմամբ ակնհայտ էր եւ կարծես սոցիալական այս տարբեր խմբերն արդեն սովորական էին համարում իրերի նման դասավարությունը անգամ ֆուտբոլում:

Բայց վերջին 3-4 տարիների ընթացքում «Ատլետիկոն» խաղային առումով լրջագույն առաջընթաց է ապրել եւ «Ռեալի» հետ արդեն գրեթե նույն հարթության վրա է կանգնած: 3,5 տարի «Ռեալը» չի կարողանում հաղթել «Ատլետիկոյին» Իսպանիայի առաջնության շրջանակներում: Ընդ որում, Զինեդին Զիդանի գլխավորությամբ «Ռեալը» Իսպանիայի առաջնությունում անցկացրած 31 խաղերում կրել է ընդամենը 1 պարտություն, հասկանալի է՝ «Ատլետիկոյից»: Միեւնույն ժամանակ, 3 տարի շարունակ «Ատլետիկոն» չի կարողանում հաղթահարել «Ռեալի» արգելքը Չեմպիոնների լիգայի խաղարկությունում. 2014-ին պարտվել է եզրափակիչում, 2015-ին՝ քառորդ եզրափակիչում, 2016-ին՝ կրկին եզրափակիչում: Վերջին անգամ այս թիմերը հանդիպեցին այս տարի մայիսի 28-ին. Միլանի «Սան Սիրո» ստադիոնում կայացած Չեմպիոնների լիգայի եզրափակիչը ավարտվեց «Ռեալի» հաղթանակով: Վաղը, Երեւանի ժամանակով 23:45-ին «Ատլետիկոն» սեփական խաղադաշտում իր խելահեղ երկրպագուների աջակցությամբ փորձելու է ռեւանշի հասնել Չեմպիոնների լիգայում կրած պարտության համար:

Միլան

Երկար տարիներ միլանյան «դերբին»՝ «Միլան» ու «Ինտեր» դիմակայությունները, համարվում էին ամենակատաղիներից մեկը աշխարհում, այս թիմերի միջեւ թշնամության մասին գրքեր էին գրվում: Բավական հետաքրքիր է, ընդ որում, այդ թշնամության նախապատմությունը: 1899թ. Միլանի բուրժուական խաղերի ներկայացուցիչների ստեղծած «Միլան» ակումբից 1908թ.՝ համաշխարհային պրոլետարիատի ծաղկման տարիներին, առանձնացան ակումբի հեղափոխական, պրոլետարական գաղափարախոսությանը հարող անդամները եւ ի հակակշիռ իրենց նախկին, բուրժուական համարվող ակումբին, ստեղծեցին «Ինտերնացիոնալե»՝ ժամանակի ոգուն համարժեք անունով ակումբ: Դարասկզբին այս թիմերի պայքարի հիմքում ընկած էր ե՛ւ գաղափարախոսություն, ե՛ւ քաղաքական իրարամերժ հայացքներ:  

Հետագայում այս թիմերի գաղափարական առանձնահատկությունները վերացան, բայց թշնամանքը մնաց, էլ ավելի մեծացավ, եւ մինչ վերջերս այս թիմերի հանդիպումները ավելի շատ հոգս են պատճառում բժիշկներին, քան թե հաճույք՝ ֆուտբոլասերներին: «Derby della Madonnina»՝ այսպես են անվանում իտալացիները «Ինտերի» եւ «Միլանի» հանդիպումները, որոնք երկար տարիներ համարվել են ոչ միայն իտալական, այլ համաշխարհային ակումբային ֆուտբոլի ամենահամեղ «ուտեստներից» մեկը: 20-րդ դարի 80-ական թվականներից միլանյան դերբին վերածվեց իտալական 2 հարուստ՝ «Միլանի» եւ «Ինտերի» սեփականատերեր Բեռլուսկոնիների եւ Մորատիների ընտանիքների միջեւ պայքարի: Բայց հիմա արդեն բոլորովին այլ իրավիճակ է՝ 2 թիմերն էլ վաճառվել են չինացի մեծահարուստների եւ «Միլանյան դերբին» նոր անուն է ձեռք բերում՝ «չինական դերբի»: Նոյեմբերի 20-ին, Երեւանի ժամանակով 23:45-ին մեկնարկելու է առաջին «չինական դերբին»՝ «Ինտեր» - «Միլան» հանդիպումը: