Կոնսերվատորիայի ռեկտորին, ի հեճուկս, կարգի, ընտրեցին բաց քվեարկությամբ

Երեւանի Կոմիտասի անվան պետական կոնսերվատորիայում այսօր ռեկտոր ընտրեցին: Թերեւս ավելորդ է ասել, որ թեկնածուն մեկն էր` գործող ռեկտոր Շահեն Շահինյանը, եւ նա վերընտրվեց միաձայն:

Բուհի խորհրդի 24 անդամից նիստին ներկա էին 23-ը, եւ բոլորը իրենց քվեով, ըստ էության, փաստեցին, որ Շահինյանը պաշտոնավարման նախորդ 5 տարիներին լավ է աշխատել ու ճիշտ կլինի, որ բուհը ղեկավարի եւս 5 տարի: Սահմանված կարգով քվեարկությունը պետք է անցկացվեր փակ-գաղտնի:

Խորհրդի նախագահ Արմեն Սմբատյանը հենց այդպես էլ հայտարարեց: Բայց դրանից անմիջապես հետո քվեաթերթիկները բաժանվեցին սեղանի շուրջ նստած խորհրդի անդամներին, եւ նրանք անմիջապես քվեարկեցին` մեկը մյուսի աչքի առաջ: Այդ գործողության համար առանձին պայմաններ ստեղծված չէին, ու եթե որեւէ մեկը ինչ-որ անկյուն փնտրեր` քվեաթերթիկի վրայի նշումը գաղտնի պահելու նպատակով, դա հավասարազոր էր լինելու հայտարարելու, թե ինքը դեմ է քվեարկում:

«Դա իրենց գործն է, ես չգիտեմ, մենք փակ քվեարկություն ենք արել: Կարող էին մոտենալ... Դժվար չէ ինչ-որ բանով ծածկել քվեաթերթիկը: Դա իրենց խնդիրն է: Եթե մեկը ուզում է «դեմ» կամ «կողմ» քվեարկել, կարող է առանձնանալ, որ ոչ մեկը չտեսնի: Եթե հիմա դուք ուզենաք գաղտնի մի բան գրել, չեք կարո՞ղ անել»,- մեր հարցին պատասխանելով` ասաց Արմեն Սմբատյանը:  

Ինչեւէ: Մինչ կկայանար ներկաներից թերեւս բոլորին հայտնի ելքով քվեարկությունը` Շահեն Շահինյանը հաշվետվության ձեւով ներկայացրեց պաշտոնավարման նախորդ ժամկետում կատարած աշխատանքները: Ասաց, որ այդ ընթացքում բուհը ձեռք է բերել հավատարմագրում, ինչի բացակայությունը կնշանակեր, որ կոնսերվատորիայում պետպատվերով տեղեր չէին լինելու, ուսանողների թիվը նվազելու էր եւ այլն, վերանայվել են ուսումնական պլանները` ըստ եվրոպական չափանիշների:

Որակի ապահովման նպատակով նաեւ դասախոսների համար կազմակերպվել են անգլերենի անվճար դասընթացներ: Կոնսերվատորիայի նախկին ու ապագա ռեկտորը գոհունակությամբ նշեց, որ անցած հինգ տարիների ընթացքում իրենց հաջողվել է ունենալ 150 արտասահմանցի ուսանող, եւ այդ ուղղությամբ աշխատանքները պետք է շարունակական լինեն: Ասաց նաեւ, որ իր պաշտոնավարման ընթացքում աշխատավարձի բյուջեն ամսական 37 միլիոն դրամից հասցվել է 51 միլիոնի, նաեւ կարողացել են աշխատակիցներին վճարել 13-րդ աշխատավարձ:

Իսկ թե որքան է Կոնսերվատորիայում աշխատող դասախոսի նվազագույն եւ առավելագույն աշխատավարձը, ռեկտորը հստակ թիվ չհայտնեց: Նիստի ավարտին, պատասխանելով մեր հարցին, տեղեկացրեց, որ դասախոսները վճարվում են ըստ ժամաքանակի: Մեկ դասաժամի համար նախատեսված է 1 000-2 000 հազար դրամ` կախված դասախոսի կոչումից եւ այլն: Տարեկան առավելագույնը հնարավոր է ունենալ 1 080 դասաժամ: Ամբողջ ծանրաբեռնվածությամբ աշխատելու դեպքում, ըստ նրա, ամսական աշխատավարձը կարող է հասնել 200 հազար դրամի: Շահինյանը վստահեցրեց, որ այդ պայմաններով աշխատողների թիվը փոքր չէ:  

Կոնսերվատորիայի խորհրդին ներկայացվող հաշվետվության ընթացքում ռեկտորը շրջանցեց ուսման վարձերի թեման ու չնշեց, որ վարձավճարները նույնպես այդ ընթացքում բարձրացվել են` տարեկան 600 հազար դրամից դառնալով 700-800 հազար դրամ:

Շահեն Շահինյանի պաշտոնավարման տարիներին նաեւ բազմաթիվ մարդիկ ազատվել են աշխատանքից: Թե որքան է նրանց թիվը, ռեկտորը չնշեց, բայց հավաստիացրեց, որ դրանում չկա սուբյեկտիվ գործոն: «Ադմինիստրացիայից եւ պրոֆեսորադասախոսական կազմից շատ մարդիկ դուրս են մնացել, բայց դա այնքան օբյեկտիվ է եղել, որ նույնիսկ մեկ բանավոր բողոք չենք ստացել»,- իր հաշվետվության ընթացքում նշեց նա:

Կադրային կրճատումները կոնսերվատորիայում շարունակական են լինելու: Շահեն Շահինյանի տեղեկացմամբ, դասախոսների թիվն անհամապատասխան է ուսանողների թվին: Ընդ որում, ոչ թե այս ընթացքում սովորողների թիվն է նվազել, այլ դասախոսների քանակն ի սկզբանե անհրաժեշտից ավելին է եղել: Ռեկտորը կարծում է, որ բուհը սոցիալական խնդիր լուծելու գործառույթ չպետք է ունենա: Նաեւ ընդամենը եկամուտ ստանալու ակնկալիքով չպետք է ընդունի բավարար նախնական կրթություն չունեցող ուսանողների:

«Հետագա հինգ տարիներին ստիպված ենք լինելու ընդունելության շեմը բարձրացնել, հակառակ դեպքում բուհը դատապարտված է: Չպետք է առաջնորդվել «ինչքան շատ ուսանող, այնքան շատ գումար» սկզբունքով: Դա մեզ վնասում է: Նաեւ ուսումնական ծրագրերի լուրջ վերանայում է սպասվում: Կան բազմաթիվ կրկնվող առարկաներ տարբեր դասախոսների կատարմամբ, որը կարծում եմ ժամեր ապահովելու համար է»,- հայտարարեց ռեկտորը:

Նա, ի դեպ, կողմ արտահայտվեց Կոնսերվատորիայի` Գյումրիում գործող մասնաճյուղը Թատրոնի եւ կինոյի պետական ինստիտուտի, ինչպես նաեւ Գեղարվեստի պետական ակադեմիայի մասնաճյուղերի հետ միավորման ճանապարհով Գյումրու արվեստի ակադեմիա ստեղծելու կառավարության մտադրությանը: Կոնսերվատորիայի մասնաճյուղի տնօրեն Կարինե Ավդալյանը, որն ակնհայտորեն դեմ էր այդ միավորմանը, իր խոսքում ընդգծեց, որ 20 տարի առաջ մասնաճյուղը ստեղծվել է հենց Արմեն Սմբատյանի առաջարկությամբ: Վերջինս նույնպես այսօր կողմնակից է միավորմանը:

Սմբատյանից հետաքրքրվեցինք, թե ինչ փոխվեց նախորդ տարիների ընթացքում: «90-ական թվականներին պետք էր համախմբել ուսանողությանը, ժողովրդին, եւ քանի որ դժվար էր գալ, Երեւան հասնել, հնարավորություն ստեղծեցինք, որպեսզի Գյուրիում շենք տան, գործիքներ տան: Լավ բան էր դա: Ամեն ժամանակ իր խորհուրդն ունի: Հիմա էլ է լավ, հիմա լավ աշխատում է, բայց մենք կարծում ենք, որ եթե ստեղծվի ակադեմիա, որտեղ լինեն բոլոր մասնագիտությունները, դա ավելի ճիշտ կլինի: Պետք է իրենք կարողանան ղեկավարել եւ իրենք էլ պատասխան տալ: Մասնաճյուղը մի քիչ կարծես երկրորդական լինի, իսկ լավ պահել մասնաճյուղը շատ դժվար է»,- պատասխանեց բուհի խորհրդի նախագահը: