Սերժ Սարգսյանը խախտել է «Սասնա ծռերի» անմեղության կանխավարկածը. նա կգա՞ դատարան

Սույն թվականի հուլիսի 17-ին ոստիկանության ՊՊԾ գունդը գրաված «Սասնա ծռեր» խմբի անդամների գործը բաղկացած է շուրջ 65 հատորից:

Այս մասին երեկ մեր զրույցում ասաց Արամ եւ Պավել Մանուկյանների պաշտպան Հարություն Բաղդասարյանը: Ինչպես տեղեկացրել ենք, այս գործով խմբի 14 անդամի մասով նախաքննության ավարտ է հայտարարվել:

Մասնավորապես, խոսքն այն անդամների մասին է, որոնց մեղադրանքներն օրեր առաջ խստացվեցին, լրացվեցին: Սույն թեմայի վերաբերյալ մեր մի քանի հարցերին պատասխանել է Պավել Մանուկյանի պաշտպան Հարություն Բաղդասարյանը:

- Պարոն Բաղդասարյան, Դուք արդեն ստացե՞լ եք գործի նյութերը, դրանք քանի՞ հատոր են կազմում:

- 64-65 հատոր է, ամբողջությամբ քրեական գործի նյութերը դեռեւս մեզ չեն տրամադրվել:

- Պաշտպանական կողմը որքա՞ն ժամանակ է խնդրել՝ գործի նյութերին ծանոթանալու համար:

- Գործը ծավալուն է, պաշտպանական կողմը միջնորդել է ոչ պակաս, քան 2 ամիս ժամանակ: Նախաքննության մարմինը դեռ մտածում է՝ ինչքան ժամանակ կարող է տրամադրել, ենթադրում եմ, որ միջնորդությունը կբավարարվի, որովհետեւ պաշտպանությունը պետք է հիմնված լինի նյութերի վրա:

- 14-ի մասով անջատվել է գործը, իսկ կարո՞ղ եք ասել, թե մյուսների մասով ՀՔԾ-ն ինչն է քննում:

- Արամ Մանուկյանի մասով գործի քննությունը շարունակվում է, իսկ Պավել Մանուկյանի մասով ավարտվել է: Նախաքննությունը դեռ շարունակվում է, որովհետեւ, քննիչների ասելով, որոշ հանգամանքներ կան, որոնք պետք է պարզեն կոնկրետ անձանց կոնկրետ գործողություններն այս գործի հետ կապված: Պետք է բոլորն էլ միասին քննեին, բայց դե օրենքը իրենց չի արգելում մաս անջատելը:

- Պավել Մանուկյանի մասով նախաքննության ընթացքը դուք ինչպե՞ս եք գնահատում, բացթողումներ կա՞ն:

- Կարող եմ ասել, որ քաղաքական պատվերը կատարված է եւ ենթադրում եմ, որ գործն անջատել, դատարան տանելը էլի քաղաքական պատվերի շրջանակներում է: Երեւի իրենք ուզում են որոշակի կառույցների ինչ-որ բաներ ապացուցել, թե ինչ՝ երեւի գործի նյութերը ուսումնասիրելուց հետո ավելի հստակ կարող եմ ասել:

- 14-ի մասով նախաքննությունը տեւեց մոտ 4 ամիս: Ի՞նչ եք կարծում՝ սա որեւէ նպատակ հետապնդո՞ւմ է:

- Իմ ենթադրությունների շրջանակը հանգում է հետեւյալին, որ որոշ կառույցների Հայաստանի քաղաքական իշխանությունը ինչ-որ խոստումներ է տվել, թե կապացուցի՝ ինչ է տեղի ունեցել, որի դիմաց այդ կառույցները երեւի իշխանությանը ինչ-որ բան են խոստացել:

- Հնարավո՞ր է իշխանությունները փորձում են մինչ խորհրդարանական ընտրությունները գործը վերջնականապես ավարտին հասցնել:

- Հայաստանը կախված է արտաքին քաղաքական ուժերի ազդեցությունից: Իշխանությունը պետք է կարողանա ինչ-որ կառույցների ցույց տալ, որ ինքը լեգիտիմ է եւ վաղվա ընտրությունների համար հանկարծ այդ դրսի կառույցները իր համար խոչընդոտ չլինի: Իշխանությունն ուզում է շատ արագ այս ամենը վերջացնել, որպեսզի ընտրությունների ժամանակ խոչընդոտների չհանդիպի: Բայց իմ պարզ պատկերացմամբ՝ ճիշտ հակառակն է լինելու, քանի որ նախաքննական մարմինը հենց քաղաքական աշխատանք է տարել, իսկ դրանից Հայաստանի քաղաքական իշխանությունը հաստատ չի շահելու: Սասնա ծռերը պարզ ընդունում են, որ իրենց արածը ինչ-որ մի ձեւով քաղաքական իշխանության ոչ ադեկվատ գործողությունների պատասխանն է: Ժամանակին եթե ամեն ինչ ճիշտ անեին, ժողովրդին այս թշվառ վիճակին չհասցնեին, բնականաբար չէր լինի ոչ «Սասնա ծռեր», ոչ էլ այս գործը, բայց կյանքը ցույց է տալիս, որ իշխանության թերացումների, իշխանության ոչ ադեկվատ գործողությունների արդյունքն է, որ այսօր գոյություն ունեն «Սասնա ծռեր»:

- Բայց դուք տեսականորեն հնարավոր համարո՞ւմ եք մինչ ապրիլ դատական պրոցեսի ավարտ:

- Տեսականորեն՝ ոչ: Ես չգիտեմ ուղղակի՝ երբ գործը ամբողջությամբ կուղարկեն դատարան, հետո դատարանն ինքն էլ առանձին-առանձին մասեր կանջատի՞, թե՝ ոչ,  ոնց որ «7-ի գործով» արեցին: Եթե ամբողջական են քննելու, ապա դա տեսականորեն  չեմ պատկերացնում, առանձին-առանձին քննելն էլ նշանակում է, որ բոլոր դատավորները, այսինքն, 14 դատավոր զբաղված են լինելու այս գործով:

- «Սասնա ծռեր» խմբի կողմից ՊՊԾ գունդը գրավելուց հետո ԱԱԾ-ն իր հայտարարություններում նրանց ահաբեկիչներ անվանեց, ինչը խախտեց նրանց անմեղության կանխավարկածը: Դուք որեւէ քայլեր այդ մասով ձեռնարկե՞լ եք:

- Քանի որ ընդամենը հայտարարություններ են արել, եւ դրանք որեւէ իրավական հետեւանք չեն առաջացրել, այս առումով ձեռնպահ ենք մնացել: Բայց այդ հայտարարությունների ենթատեքստում եղել է, որ ահաբեկիչները պետք է նաեւ պատասխանատվություն կրեն, այդ առումով մենք գտնում ենք, որ անմեղության կանխավարկածը խախտվել է: Դեռեւս մեկ ամիս առաջ Սերժ Սարգսյանը Նիդերլանդներում հայտարարեց, որ «Սասնա ծռերը» հանցագործներ են, պետք է դատվեն: Այստեղ եւս խախտվեց անմեղության կանխավարկածը: Այսպիսով՝ ուղիղ մեսիջը ուղարկվում է դատավորներին, որ այս մարդկանց անպայման պետք է դատել, հանկարծ չփորձեք արդարացնել: Բայց Հայաստանում ի՞նչ չի խախտվել, որ անմեղության կանխավարկածը չխախտվի:

- Պարոն Բաղդասարյան, հնարավո՞ր է, որ այդ հայտարարության հետ կապված միջնորդեք, որպեսզի Սարգսյանը գա դատարան եւ հարցաքննվի:

- Չի բացառվում, ժամանակը ցույց կտա:

- Նախաքննության սկզբում ՀՔԾ-ն հայտարարեց, որ կոտրվել է ՊՊԾ գնդում տեղադրված «Ակբա-Կրեդիտ Ագրիկոլի» բանկոմատը եւ հափշտակվել է դրանում առկա շուրջ 14 միլիոն դրամը: Այս առեղծվածը պարզվե՞լ է:

-  Պավել Մանուկյանի մեղադրանքում նման հանգամանք չկա: Կարծում եմ, ռեալ բան չկա այստեղ: