Սպորտի պատմության ամենահարուստ մարզիկը բասկետբոլիստ Մայքլ Ջորդանն է

«Forbes» ամսագիրը մարզաշխարհի ուշադրությունը կրկին բեւեռել է սպորտում պտտվող ահռելի գումարներին. ներկայացրել է պատմության մեջ մարզական կարիերայի ընթացքում ամենաշատ գումարներ վաստակած մարզիկների ցանկը: Ուսումնասիրության մեջ «Forbes»-ի մասնագետները հաշվի են առել հնարավոր բոլոր եկամուտները՝ աշխատավարձեր, պարգեւավճարներ, հովանավորներից, գովազդներից ստացված եկամուտներ, բրենդային պայմանագրեր եւ այլն: Ընդ որում, հաշվի է առնվել նաեւ ինֆլյացիան՝ բոլոր հաշվարկները համապատասխանեցվել են 2016 թվականին արձանագրված ԱՄՆ դոլարի համարժեքին:

 Ըստ «Forbes»-ի մասնագետների, պատմության մեջ ամենամեծ գումարն աշխատած մարզիկն ամերիկացի բասկետբոլիստ 53-ամյա Մայքլ Ջորդանն է: Բոլոր ժամանակների լավագույն բասկետբոլիստներից մեկը համարվող Ջորդանն արդեն վաստակել է 1,7 միլիարդ ԱՄՆ դոլար եւ այդ թիվը շարունակում է աճել «Nike» ֆիրմայի հետ կնքված ցմահ պայմանագրի շնորհիվ: Հետաքրքիր է, որ Ջորդանը կարիերայի ընթացքում՝ 1984-2003 թվականներին, ընդհանուր առմամբ, ստացել է «ընդամենը» 93 միլիոն աշխատավարձ, իսկ ահա պարգեւավճարների եւ հատկապես գովազդներից եւ հովանավորներից ստացված գումարների շնորհիվ դարձել է պատմության մեջ ամենամեծ գումարը վաստակած մարզիկը:

Մայքլ Ջորդանի անունով «MJ» կոչվող «Nike»-ի արտադրության բասկետբոլային խաղակոշիկները գրավում են այս բնագավառի շուկայի մոտ կեսը՝ ֆիրմային բերելով ահռելի եկամուտներ, որից անձամբ բասկետբոլիստը ստանում է իր փայաբաժինը: Միայն 2015 թվականին «Nike»-ը Ջորդանին վճարել է 100 միլիոն ԱՄՆ դոլար:

Պատմության մեջ ամենամեծ եկամուտներ ստացած մարզիկների լավագույն եռյակում է նաեւ բոլոր ժամանակների մեծագույն գոլֆիստներից մեկը՝ ամերիկացի 41-ամյա Թայգեր Վուդսը՝ 1,65 միլիարդ ԱՄՆ դոլար: Վուդսն իր եկամուտների առյուծի բաժինը՝ մոտ 90 տոկոսը, ստացել է տարբեր հովանավորչական եւ գովազդային պայմանագրերից, թեեւ 11 տարի շարունակ համարվում էր աշխարհում ամենաբարձր աշխատավարձ ստացող մարզիկը: Ներկայումս Վուդսը մեծ գումարներ է աշխատում՝ օգտագործելով իր անունը համացանցի միջոցով. մասնավորապես, տարիներ առաջ ինտերնետ-աուկցիոնով «Վուդսի հետ գոլֆի 1 պարտիան» վաճառվել է 425 հազար ԱՄՆ դոլարով:

Բոլոր ժամանակների ամենամեծ եկամուտներ ունեցող մարզիկների լավագույն եռյակը եզրափակում է մեկ այլ գոլֆիստ՝ ամերիկացի Առնոլդ Պալմերը, որը իր մահկանացուն կնքեց այս տարվա սեպտեմբերին՝ 87 տարեկանում:  Պալմերի մարզական կարիերան շարունակվել է ուղիղ 52 տարի, որի ընթացքում տարբեր մրցաշարերում տոնած հաղթանակների համար ստացել է ահռելի եկամուտներ: Պալմերը դեռ 1967 թվականին դարձել է 1 միլիոն դոլար վաստակած առաջին գոլֆիստը: Մոտ 6 տասնամյակ Պալմերը ամենահամակրելի գոլֆիստներից մեկն էր աշխարհում, որի խաղին հետեւում էին միլիոնավոր երկրպագուներ՝ կրելով Պալմերի կողմից հիմնադրված իր անունով բրենդային հագուստը, մշտապես օգտագործելով Պալմերին պատկանող «AriZona» գազավորված ըմպելիքը: Պալմերի եկամուտները «Forbes»-ի մասնագետները գնահատել են՝ հաշվի առնելով նաեւ ինֆլյացիան, 1,35 միլիարդ ԱՄՆ դոլար:

Աղյուսակում նշված են պատմության ընթացքում ամենամեծ գումարներ աշխատած մարզիկների լավագույն տասնյակում տեղ գտած անձանց եւ նրանց եկամուտների (միլիոն ԱՄՆ դոլար) մասին տվյալները:

       անուն               մարզաձեւ           գումար             

1. Մայքլ Ջորդան          բասկետբոլ        1,7         
2. Թայգեր Վուդս           գոլֆ                  1,65       
3. Առնոլդ Պալմեր         գոլֆ                  1,35       
4. Ջեկ Նիկլաուս            գոլֆ                 1,15       
5. Միխայել Շումախեր  ֆորմուլա 1        1,0         
6. Կոբե Բրայանտ         բասկետբոլ        0,77       
7. Ֆլոյդ Մեյվեզեր          բռնցքամարտ   0,76       
8. Ֆիլ Միկելսոն             գոլֆ                  0,76       
9. Դեւիդ Բեքհեմ            ֆուտբոլ            0,73       
10. Շաքիլ Օ Նիլ              բասկետբոլ        0,70    

Ընդհանուր առմամբ, «Forbes»-ը ներկայացրել է 20 անձանց  ցուցակ՝ 490 միլիոն եկամուտով վերջին տեղում է ֆիլիպինցի բռնցքամարտիկ Մանի Պակյանոն: Ընդհանուր առմամբ, այդ 20 մարզիկի ցուցակում տեղ են գտել գոլֆ մարզաձեւի 5 ներկայացուցիչ, 4-ական բասկետբոլիստ եւ բռնցքամարտիկ, 3 ֆուտբոլիստ, 2 ավտոարշավորդ, 1-ական թենիսիստ (Ռոջեր Ֆեդերեր՝ 600 միլիոն) եւ բեյսբոլիստ:

Ամենաերիտասարդն այդ ցանկում արգենտինացի ֆուտբոլիստ Լիոնել Մեսին է. «Բարսելոնայի» 29-ամյա առաջատարն արդեն վաստակել է 520 միլիոն ԱՄՆ դոլար եւ ցուցակում զբաղեցնում է 17-րդ տեղը: Մադրիդի «Ռեալի» ֆուտբոլիստ Կրիշտիանու Ռոնալդուն վաստակած 620 միլիոն եկամտով զբաղեցնում է 14-րդ տեղը, բայց, ըստ «Forbes»-ի մասնագետների հաշվարկների, պորտուգալացու եկամուտները շատ արագ աճում են՝  շնորհիվ «Nike»-ի հետ կնքած ցմահ, ինչպես նաեւ բազմաթիվ գովազդային այլ պայմանագրերի, եւ առաջիկա տարիներին նա կհայտնվի բոլոր ժամանակներում ամենամեծ գումարներ վաստակած մարզիկների առաջին տասնյակում: