Անդրիաս Ղուկասյանի գործով եւս մեկ վկա է հայտնվել. կրկին նախկինում դատապարտված

«Ոտքի՛, Հայաստան» շարժման անդամ, Սարի թաղում զանգվածային անկարգություններ կազմակերպելու մեղադրանքով կալանավորված Անդրիաս Ղուկասյանի դեմ եւս մեկ ցուցմունք է հայտնվել:

Ցուցմունք տված անձն այս անգամ էլ ոմն Արտակ Մկրտչյան է, որը եւս նախկինում դատապարտված է եղել:

Հիշեցնենք, որ մոտ մեկ ամիս առաջ Ղուկասյանի պաշտպաններն ասուլիս հրավիրեցին եւ տեղեկացրին, որ գործով նոր «գործակալ» վկա՝ Գեղամ Սահակյանն է հայտնվել, որը Անդրիաս Ղուկասյանի դեմ ցուցմունք է տվել՝ ասելով, որ նա իբրեւ թե հուլիսի 29-ին առաջնորդել է մարդկանց դեպի ոստիկանության ՊՊԾ գունդ։

Պաշտպաններն ուսումնասիրել էին վկայի անցյալը եւ պարզել, որ նա նախկինում մի քանի անգամ դատապարտված է եղել:

Փաստորեն գործով նոր վկա է հայտնվել՝ կրկին նախկինում դատապարտված: Այս մասին երեկ մեր զրույցում տեղեկացրեց Անդրիաս Ղուկասյանի պաշտպան Կարեն Մեժլումյանը: Այս վկայի անցյալը Մեժլումյանը նույնպես ուսումնասիրել է եւ պարզել, որ Արտակ Մկրտչյանը տարբեր դրվագներով գողության համար նախկինում դատապարտված է եղել: «Գողություն է կատարել ե՛ւ իր հարեւանից, ե՛ւ իր գործատուից...»,-ասաց նա:

Հարցին՝ իսկ այս վկան ի՞նչ ցուցմունք է տվել, Կարեն Մեժլումյանն ասաց. «Չբացելով նախաքննական գաղտնիքը, միայն կասեմ, որ նրա ցուցմունքի իմաստն այն է, որ իբր Անդրիաս Ղուկասյանն է ասել, թե պետք է քարեր հավաքենք, գնանք ՊՊԾ գունդը գրավենք, ինչը ըստ էության գրված էր դատախազության հայտարարության մեջ, որտեղ նշել էին, թե ինչ նպատակով են այս գործը միացրել «Սասնա ծռերի» գործին: Այսինքն, դա կատարվել է նախկինում երեք անգամ դատված վկա Գեղամ Սահակյանի եւ մեկ անգամ դատված Արտակ Մկրտչյանի ցուցմունքների հիման վրա: Ոստիկանական գործսարքոցի է, նախկինում դատապարտվածներին «հայտնաբերում» են, որպեսզի սուտ ցուցմունքներ տան իմ պաշտպանյալի դեմ»:

Պաշտպանը տեղեկացրեց, որ նոր վկայի եւ Անդրիաս Ղուկասյանի մասնակցությամբ առերես հարցաքննություն է կատարվել: Հենց այդ առերեսման ժամանակ էլ պաշտպանական կողմի համար ակնհայտ է դարձել, որ վկա Արտակ Մկրտչյանը սուտ ցուցմունք է տալիս: Վերջինս միայն կարողացել է «լավ հիշել», որ Անդրիաս Ղուկասյանը կոչ է արել քարեր հավաքել ՊՊԾ գունդը գրավելու համար, իսկ պաշտպանական կողմի մյուս հարցերին վկան պատասխանել է, որ տեղյակ չի, ոչինչ չի հիշում, հետո բարկացել է հարցերից եւ ընդմիջում խնդրել. «Առերես հարցաքննությունը տեղի է ունեցել մեկուսարանում (նախկին վկայի հետ առերես հարցաքննությունը տեղի էր ունեցել Քննչական կոմիտեում,- Տ.Խ).: Առաջին անգամ, երբ մասնակցեցինք հարցաքննությանը, այդ վկան լրիվ ուրիշ բաներ էր պատասխանում, մեր կարծիքով՝ ինքը մոռացել էր, թե ինչ վկայություն պետք է տա, հետո, երբ զգաց՝ ինչ է անում, ընդմիջում խնդրեց, ասաց՝ ես գնում եմ, հիստերիկություն արեց, դուրս եկավ, գնաց: Երկրորդ անգամ որ եկավ առերես հարցաքննության, արդեն ուղղված էր ցուցմունքը: Ամեն առերես հարցաքննության ժամանակ մենք հայտարարություն ենք անում, որ ակնհայտ սուտ ցուցմունքներ են տալիս, վարույթն իրականացնող մարմինը կամ ոստիկաններն են նրանց «հայտնաբերում», որպեսզի նման ցուցմունք տան»:

Մեր հարցին ի պատասխան՝ Կարեն Մեժլումյանն ասաց, որ Անդրիաս Ղուկասյանը այս նոր վկային մեկ անգամ հանրահավաքի ժամանակ է տեսել, անձամբ չի ճանաչում: Ղուկասյանը նույնպես այն կարծիքն է, որ վկան սուտ ցուցմունք է տվել իր դեմ: Պաշտպանն ասաց, որ դեռ նախաքննության ավարտի հետ կապված տեղեկություններ չունեն: «Հույս ունենք, որ ՀՔԾ-ն-ում գոնե օբյեկտիվ քննություն կլինի: Քննչական կոմիտեում կեղծ ապացույցներ էին սարքում, որից կարծես քննիչները հաճույք էին ստանում»,- նկատեց մեր զրուցակիցը:

Մեր հարցին, թե հնարավո՞ր է, մինչ ավարտը վարույթն իրականացնող մարմինը խստացնի Ղուկասյանի մեղադրանքը, պաշտպանն ըստ էության չբացառեց: «Այդ ակնարկը կա դատախազության հայտարարության մեջ, որտեղ մանրամասն նշում են, թե ինչու են միացրել գործը: Խստացնելու ակնարկ կար նաեւ իմ պաշտպանյալի կալանքը երկարաձգելու միջնորդության մեջ: Թեեւ պաշտպանական կողմը գտնում է, որ խստացնելու հիմք ընդհանրապես չկա, ավելին՝ պետք է գործը օր առաջ կարճվի: Սա պայթած, փուչիկ գործ է»: Ճշտող հարցին, թե այնուամենայնիվ ո՞ր ակնարկի մասին է խոսքը, Մեժլումյանն ասաց. «Հայտարարության մեջ նշվում է՝ օժանդակել է «Սասնա ծռերին» եւ փորձել մտնել ՊՊԾ գունդ»: Այսինքն՝ չի բացառվում, որ Անդրիաս Ղուկասյանի մեղադրանքը լրացվի նաեւ «Սասնա ծռեր» խմբին օժանդակելու հոդվածով:

Ինչ վերաբերում է Ղուկասյանի կալանքը երկարաձգելու որոշման դեմ ներկայացված վերաքննիչ բողոքին, ապա Կարեն Մեժլումյանն ասաց, որ երկու շաբաթ առաջ են ներկայացրել բողոքը, եւ պետք է արդեն թե՛ նիստի օրը լիներ նշանակված, եւ թե՛ որոշում հրապարակված, սակայն դրա ճակատագրի մասին պաշտպանական կողմը դեռ տեղեկություններ չունի:

Հիշեցնենք, որ Անդրիաս Ղուկասյանին մեղադրանք է առաջադրվել ՀՀ քրեական օրենսգրքի 225 հոդվածի 1-ին մասով (զանգվածային անկարգություններ կազմակերպելը՝ պատժվում է ազատազրկմամբ՝ չորսից տասը տարի ժամկետով): Նա ձերբակալվեց Սարի թաղում հուլիսի 29-ին ոստիկանների եւ ցուցարարների միջեւ տեղի ունեցած բախումներից հետո: Ղուկասյանը կալանավորվել է օգոստոսի 2-ին: