Հակոբ Սերոբյան. մարմնամարզիկների համար տարին հաջող էր

Հայաստանի մարմնամարզության հավաքականի գլխավոր մարզիչ Հակոբ Սերոբյանը գոհ է 2016 թվականի ընթացքում իր մարզիկների ունեցած ելույթներից եւ գրանցած արդյունքներից: Միջազգային մրցաշարերից նրա սաները մշտապես վերադարձել են մեդալներով: Այսօր՝ դեկտեմբերի 12-ին, լրագրողների հետ հանդիպման ժամանակ նա նշեց, որ միակ բանը, որի համար ցավում է, Ռիո 2016-ից առանց մեդալի վերադառնալն էր:

«Հավաքականի համար շատ հաջող տարի էր՝ չհաշված Օլիմպիական խաղերը: Տարին սկսվեց աշխարհի գավաթի խաղարկությամբ, որտեղ շատ հաջող հանդես եկանք. Հարություն Մերդինյանը դարձավ չեմպիոն, տղաները, բոլորը մեդալներ նվաճեցին: Եվրոպայի առաջնությունը շատ հաջող ստացվեց: Սպասում էինք 2 մեդալի, սակայն 4-ն ունեցանք: Միջազգային մրցումներում միշտ հաղթողներ ունեցել ենք: Միայն Օլիմպիական խաղերը... մենք մեդալի ակնկալիք ունեինք, չէինք գնում՝ ուղղակի մասնակցելու: Մեծ հաջողություն էր, որ Հարությունը մասնակցեց եզրափակչին, բայց եզրափակչում մինչեւ վերջ չկատարեց վարժությունը: Նա պատրաստ էր: Մինչեւ այսօր վերլուծում ենք, թե ինչ եղավ: Հուսով եմ՝ դասեր կքաղենք մեր սխալներից: Ընդհանուր առմամբ, շատ հաջող տարի էր»,- ասաց Սերոբյանը:

Նա նաեւ ավելացրեց, որ տարվա ընթացքում մարմնամարզիկները տարբեր մրցաշարերում նվաճել են 15 ոսկե, 4 արծաթե, 3 բրոնզե մեդալ:

Այս տարի մնացել է միայն 1 մրցաշար, որին հայ մարզիկները պետք է մասնակցեն: Դա դեկտեմբերի 18-22-ը Մոսկվայում կայանալիք Միխայիլ Վորոնինի գավաթի խաղարկությունն է:

«Շատ լավ մրցաշար է, քանի որ 25-26 երկիր է մասնակցում, ուժեղ մրցակցություն է լինում, քանի որ մասնակցում են Ռուսաստանը, Ճապոնիան... մի շարք ուժեղ թիմեր: Հայաստանից մասնակցելու են 2 մեծահասակներ՝ Արթուր Դավթյանը եւ Վիգեն Խաչատրյանը եւ 1 երիտասարդ: Բավականին խոստումնալից երիտասարդ է՝ Գագիկ Խաչիկյանն է: Երիտասարդներից նաեւ 1 աղջիկ կմասնակցի՝ Աննա Գրիգորյանը: Հուռի Գեբեշյանն օգնեց, որ մտածենք միջազգային մրցաշարերում նաեւ աղջիկների մասնակցության մասին»,- ասաց նա:

Մասնագետը նշեց, որ երիտասարդներից մեծ ակնկալիքներ ունի, եւ բոլորին իրենց դրսեւորելու հնարավորություն կտրվի: Այս տարի պետության կողմից Մարմնամարզության ֆեդերացիային տրվող բյուջեն գրեթե կրկնապատկվել է. 21 մլն դրամից հասել է 41 մլն դրամի, հետեւաբար ավելի շատ մարզիկներ միջազգային մրցաշարերի մասնակցելու հնարավորություն կստանան:

Սերոբյանը խոսեց նաեւ առանձին մարզիկների մասին: Անդրադառնալով Եվրոպայի չեմպիոն, աշխարհի առաջնության բրոնզե մեդալակիր Հարություն Մերդինյանին նա ընդգծեց, որ թեեւ նա 32 տարեկան է, եւ նաեւ որոշ վնասվածքներ ունի, դեռ կարող է բարձր մակարդակով շարունակել կարիերան:

«Որոշումը միասին ենք կայացրել, նրա եւ նրա անձնական մարզչի՝ Սոս Սարգսյանի հետ: Հետազոտվել է, շատ լուրջ խնդիրներ չկան, նա կարող է: Վերջնական խոսքը եղել է նրանը: Նա որոշել է, որ կարող է մասնակցել: Ես համարում եմ, որ նա արժանի է, ուժերը բավականացնում են: Իր ցանկությունն է, որ օլիմպիական մեդալով ավարտի կարիերան: Հուսով եմ՝ կստացվի»,- ասաց Սերոբյանը:

Այս շրջանում վնասվածքից շարունակում է ապաքինվել Արթուր Թովմասյանը: Նա ծնկի վիրահատության էր ենթարկվել հուլիս ամսին՝ Եվրոպայի առաջնությունից հետո: Հակոբ Սերոբյանի խոսքով՝ վերականգնողական փուլը շատ լավ է ընթանում:

«Շատ լավ վիրահատություն են արել: Մարզվում է: 90%-ով վերականգնվել է: Նա կմասնակցի Հայաստանի առաջնությանը, Դոհայում մարտի վերջին կայանալիք աշխարհի գավաթի խաղարկությանը: Հուսով եմ՝ շատ լավ արդյունքներ ցույց կտա: Նա դեռ շատ բան ունի անելու: Վստահ եմ, որ կաշխատի, որովհետեւ դեռ 24 տարեկան է: Մինչեւ 30 տարեկան մի գործիքով կարող է աշխատել»,- ասաց նա:

Հակոբ Սերոբյանը նաեւ նշեց, որ աշխատանքներ են տարվում նոր գործիքներ ձեռք բերելու ուղղությամբ: Մարմնամարզության միջազգային ֆեդերացիան խոստացել է օգնել, եւ ՀՀ ֆեդերացիայից ճշտել է՝ թե առաջնահերթ ինչ գործիքներ են պետք: Հակոբ Սերոբյանն առաջին հերթին ազատ վարժության գործիք է խնդրել: Սակայն, եթե անգամ գործիքը տան, այն անմիջապես չի տեղադրվելու, քանի որ դահլիճը վերանորոգման կարիք ունի. փայտե հատակը փտել է:

2017 թ. ընթացքում մարմնամարզիկները նախ ուսումնամարզական հավաք կանցկացնեն Ծաղկաձորում, ապա տեղի կունենա Հայաստանի առաջնությունը, որի արդյունքների հիման վրա 4 հոգի կմեկնեն Դոհա՝ աշխարհի գավաթի խաղարկությանը: Այնուհետեւ կլինի հավաք: Ապրիլի 15-ից հետո կկայանա Եվրոպայի առաջնությունը, որին ՀՀ-ն կմասնակցի 6 հոգով: Մայիսին կրկին կմասանկցեն աշխարհի գավաթի խաղարկության (հավանաբար, Սլովենիայում կայանալիք աշխարհի գավաթին): Դրանից հետո մարմնամարզիկները կմեկնեն Սանկտ Պետերբուրգ՝ միջազգային մրցաշարի (կմասնակցի 3 հոգի): Oգոստոսի վերջին կկայանա ունիվերսիադան, հետո կլինի հավաք Թբիլիսիում, սեպտեմբերին աշխարհի գավաթի խաղարկություն, հետո աշխարհի առաջնություն, նոյեմբերին կրկին աշխարհի գավաթի խաղարկություն, դեկտեմբերին տարին կավարտեն Միխայիլ Վորոնինի գավաթի խաղարկությունով, ինչպես միշտ: