8 ամսական երկվորյակներին վրաերթի ենթարկելու մեջ մեղադրվողի կյանքին վտանգ է սպառնում

2015թ. փետրվարին 8 ամսական երկվորյակ եղբայրներին մահացու վրաերթի ենթարկելու մեջ մեղադրվող 50-ամյա Ռազմիկ Ավետիսյանի առողջական վիճակը ծայրահեղ ծանր է, նա կարող է մահանալ:

Ավետիսյանը տառապում է էպիլեպսիայով, ունի նաեւ սրտի հետ կապված խնդիրներ: Չնայած այս հիվանդություններին, նա 15 տարի մեքենա է վարում, ունի վարորդական իրավունք: Երեկ նման հայտարարություն արեց Ավետիսյանի ներկայացուցիչ Տիգրան Հայրապետյանը:

Դեպքը տեղի է ունեցել փետրվարի 19-ին՝ ժամը 11:30-ի սահմանում. Ռազմիկ Ավետիսյանը վրաերթի է ենթարկել 82-ամյա Անահիտ Կարապետյանին, ապա դուրս եկել երթեւեկելի գոտուց եւ բարձրանալով մայթին՝ վրաերթի ենթարկել 29-ամյա Աննա Հարությունյանին, նրա մանկահասակ երկվորյակ որդիներին, այնուհետեւ բախվել ցանկապատին: Երկվորյակները մահացել են, նրանց մայրն էլ ծանր մարմնական վնասվածքներ էր ստացել:

Ավետիսյանին մեղադրանք է առաջադրվել ՀՀ քր. օր. 242-րդ հոդվածի 3-րդ մասով (ճանապարհային երթեւեկության կանոնները խախտելը), ինչն անզգուշությամբ առաջացրել է երկու կամ ավելի անձանց մահ: Գործով նախաքննությունն ավարտվել է, Հայրապետյանի փոխանցմամբ` արդեն 9 ամիս է, Կենտրոն եւ Նորք-Մարաշ վարչական շրջանների ընդհանուր իրավասության դատարանը դատավոր Գագիկ Պողոսյանի նախագահությամբ տարբեր պատճառաբանություններով հետաձգում է դատական նիստերը. դատարանն անցել է վիճաբանությունների փուլին, եւ մեղադրող դատախազը պետք է հանդես գա մեղադրական ճառով:

Պաշտպանական կողմը պնդում է, որ մեքենան մի քանի հարյուր մետր ընթացել է վարորդի անգիտակից վիճակի պայմաններում, բախվել է մայթեզրին կանգնած մի խումբ մարդկանց, այդ թվում՝ մանկահասակ երկվորյակներին:

«Գործն աննախադեպ էր նրանով, որ մեկից ավելի մահ գրանցվեց եւ մեկից ավելի անձինք ստացան ծանր մարմնական վնասվածքներ. Այս առանձնահատկությունից ելնելով` բնականաբար միանգամից խափանման միջոց ընտրվեց կալանքը, հետագայում գործի քննության ընթացքում դատարանը եւ քննիչը փորձաքննություն նշանակեցին՝ պարզելու, թե վարորդն, ըստ էության, կարո՞ղ էր արդյոք կանխել վթարը, թե՝ ոչ, սակայն փորձագետը եզրակացություն էր տվել, որ Ռազմիկ Ավետիսյանը մինչեւ ավտովթարի պահը եւ մայթեզրին կանգնած մարդկանց բախվելը, կորցրել է գիտակցությունը»,- ասաց Հայրապետյանը` հավելելով, որ անգամ շտապ օգնության մեքենայի ժամանելու ընթացքում մեղադրյալը գտնվել է անգիտակից վիճակում:

«Փաստորեն, ունենք մի իրավիճակ, երբ վերջին 8-9 ամիսներին  դատական ակտ չի կայացվում, իսկ այս ընթացքում մեղադրյալի առողջական վիճակը բավականին ծանրացել է, քանի որ 2-3 ինֆարկտ է ստացել, անընդհատ գտնվել է հիվանդանոցներում»,- տեղեկացրեց փաստաբանը` ընդգծելով, որ գործի մյուս առանձնահատկություններից մեկն էլ այն է, որ դեռեւս մայիս ամսին, երբ Ռազմիկ Ավետիսյանը դարձյալ գտնվել է մահամերձ վիճակում, տեղափոխվել է հիվանդանոց, ենթարկվել վիրահատության, եւ այդ ժամանակ այս գործով պաշտպանը միջնորդություն է ներկայացրել դատավորին՝ կալանավորումը գրավով փոխարինելու մասին եւ դատավոր Գագիկ Պողոսյանը բավարարել է միջնորդությունը:

Տիգրան Հայրապետյանի տեղեկացմամբ` 5 ամիս ամբաստանյալը գտնվել է ազատության մեջ, սակայն դատախազն ու տուժող կողմն այս գործով գրավի դեմ բողոք է ներկայացրել, վերաքննիչ դատարանը քննել է բողոքը, եւ Ավետիսյանին տեղափոխել են դատապարտյալների հիվանդանոց, որտեղ նրա առողջական վիճակը ավելի է վատթարացել: Փաստաբանի պնդմամբ` Ռազմիկ Ավետիսյանի ներկայիս առողջական վիճակն անբուժելի է, ավելին` նման հիվանդությամբ տառապող մարդիկ պարզապես մահանում են կամ արտասահմանում ենթարկվում են վիրահատության` փորձելով ինչ-որ կերպ փրկել հիվանդի կյանքը:

Հայրապետյանը նշեց, որ Ռազմիկ Ավետիսյանի գործով չի կատարվում օրենսդրության պահանջը. «Անձը սրտի 4-րդ աստիճանի ծանր ինֆարկտ է տարել: Ունենք բոլոր բժշկական փաստաթղթերը: Մեր օրենսդրության համապատասխան հոդվածներով սահմանված է, որ անձի ծանր հիվանդության դեպքում ՔԿՀ պետը բժշկական եզրակացության հիման վրա միջնորդում է հարկադրանքի միջոցը վերացնելու կամ փոխելու վերաբերյալ: Քրեակատարողականի վարչակազմն ինքը վարույթ իրականացնող մարմնին պետք է հայտնի այս մասին: Մինչդեռ օրենքի այս պահանջը չի կատարվում»,- ասաց նա:

Վերջինս նշեց, որ դիմել են վարչապետին, քրեակատարողական հիմնարկի պետին եւ այլ մարմինների, սակայն ստացել են լղոզված պատասխաններ: Նա վստահեցրեց. «Քրեակատարողական վարչությունը», «Դատապարտյալների հիվանդանոցը», դատավոր Գագիկ Պողոսյանը եւ դատախազ Արթուր Չախոյանը չեն կատարում օրենքի հստակ պահանջները»: Հայրապետյանը նաեւ դժգոհեց ամբաստանյալի պահման խցի պայմաններից. «Խուցը պատժախցի է նմանվում. փոքրիկ տարածք է, հնարավոր չէ, որ մարդ մաքուր օդի դուրս գա»: Նա նշեց, որ եթե Ռազմիկ Ավետիսյանը մահանա, ապա ողջ պատասխանատվությունն ընկնելու է պետության վրա. «Պետությունն անձի իրավունքները խախտելու համար պարտավոր է լինելու վճարել հսկայական գումարներ»:

Երեկ Մարդու իրավունքների պաշտպանի գրասենյակից հետաքրքրվեցինք, թե ՄԻՊ աշխատակիցներն այցելե՞լ են Ռազմիկ Ավետիսյանին եւ նրա առողջական վիճակի վերաբերյալ ի՞նչ տեղեկություններ ունեն: Ի պատասխան մեր հարցին՝ ՄԻՊ մամուլի խոսնակ Զոհրապ Եգանյանն ասաց, որ ՄԻՊ-ը Ավետիսյանի հարազատներից դիմում է ստացել, այց է կատարվել նրան եւ նրանց կողմից հաստատվել է, որ Ռազմիկ Ավետիսյանն առողջական խնդիրներ ունի: Նա ասաց, որ ՄԻՊ-ն այս մասով քննություն է իրականացնում եւ լրացուցիչ տեղեկություններ կտրամադրվի:

Նշենք, որ մեղադրանքը հաստատվելու դեպքում Ռազմիկ Ավետիսյանին սպառնում է 4-10 տարի ազատազրկում: