Քաղաքական բեմահարթակ. հյուրախաղերն ավարտվեցին

Հայտնի օպերային երգիչ, Վրաստանի «Պետությունը ժողովրդի համար» կուսակցության հիմնադիր Պաատա Բուրճուլաձեն դեկտեմբերի 14-ին հայտարարեց, որ հեռանում է քաղաքականությունից:

Կուսակցության նիստի ժամանակ երգիչը տեղեկացրել է, որ մտադիր է մեկնել արտերկիր եւ վերադառնալ ստեղծագործական գործունեությանը: Ըստ նրա՝ իր կողմից հիմնված կուսակցությունը կշարունակի գործել, եւ նախագահ կնշանակվի քաղաքական գիտությունների փորձագետ Նիկա Մաչուտաձեն:

Պաատա Բուրճուլաձեն ծնվել է 1955 թվականին: Նա օպերային կարիերան սկսել է Թբիլիսիի Օպերայի եւ բալետի թատրոնից, դեբյուտը ներկայացրել է Լոնդոնի «Քովենթ Գարդեն» օպերայում (1984թ.), որին հաջորդել են հաջողությունները Միլանի «Լա Սկալա»-ում, Վիեննայի պետական օպերայում:

Բուրճուլաձեն քաղաքականություն էր մտել բոլորովին վերջերս: Ընթացիկ տարվա մայիսին նա հիմնեց «Պետությունը ժողովրդի համար» կուսակցությունը եւ հայտարարեց, որ մասնակցելու է խորհրդարանական ընտրություններին: Մինչ այդ, տարբեր ժամանակահատվածներում Վրաստանում իշխող կուսակցությունների առաջնորդները Բուրճուլաձեին առաջարկել են զբաղվել քաղաքականությամբ: Վրաստանի առաջին նախագահ Զվիադ Գամսախուրդիան 90-ականների սկզբին երիտասարդ երգչին առաջարկել է «Կլոր սեղան-ազատ Վրաստան»-ի (Գամսախուրդիայի շուրջ միավորված կուսակցությունների դաշինք) անդամ դառնալ, իսկ երկրորդ նախագահ Էդուարդ Շեւարդնաձեի կառավարման տարիներին, Բուրճուլաձեին խորհուրդ են տվել օրենսդիր գործունեությամբ զբաղվել՝ մուտք գործելով խորհրդարան:

Նախկին՝ «Միացյալ ազգային շարժում»-ը, Միխեիլ Սահակաշվիլիի՝ երկրորդ անգամ նախագահ ընտրվելու ժամանակ, Բուրճուլաձեին առաջարկել է համալրել կուսակցության շարքերը: Առաջարկություն է եղել նաեւ ներկայում իշխող՝ «Վրացական երազանք»-ի կողմից: Այս առիթով ուշագրավ է Վրաստանի նախկին վարչապետ Բիձինա Իվանիշվիլիի արձագանքը. «Մենք հանդիպել ենք 5-10 րոպեով, այդ ընթացքում Բուրճուլաձեի ձեռքին նկատեցի Ուգուլավայի (Սահակաշվիլիի կողմնակից, Թբիլիսիի նախկին քաղաքապետ) պարգեւը՝ ժամացույցը, ի՞նչ պիտի ասեի...»:

Ավելի ուշ Բուրճուլաձեն՝ «Միացյալ ազգային շարժում» կուսակցությունից հեռացած քաղաքական գործիչների հետ դաշինք կազմեց: Դաշինքի անդամների թվում էր նաեւ Գեորգի Վաշաձեն, որը 2012 թվականի խորհրդարանական ընտրությունների արդյունքում, ՄԱՇ-ի ընտրացուցակով մուտք էր գործել խորհրդարան: Դաշինքի մեկ այլ կուսակցություն՝ «Գիրչին», մինչ ընտրությունները հեռացավ դաշինքից:

Հոկտեմբերի 8-ի խորհրդարանական ընտրություններին Բուրճուլաձեն հանդես էր գալիս ընդդիմադիր դիրքերից: Վերջինս՝ ՄԱՇ-ի հետ միասին, քննադատում էր իշխանությանը՝ ընտրությունները կեղծելու մեջ: Վրաստանի 9-րդ գումարման խորհրդարանի ընտրությունների արդյունքում «Պետությունը ժողովրդի համար» դաշինքը արժանացավ ընտրողների 3.45%  ձայներին եւ այսպիսով մուտք չգործեց խորհրդարան: Ընտրությունների արդյունքների հրապարակումից հետո Օպերայի հայտնի երգիչը հայտարարեց, թե կշարունակի զբաղվել քաղաքականությամբ:

«Մենք ներկայացնում ենք մի խումբ, որը Վրաստանի ապագան է: Ոչ մեկը թող պատրանք չունենա, թե ես հեռանում եմ քաղաքականությունից»,-ասում էր երգիչը:

Մի քանի ամսվա ընթացքում Բուրճուլաձեի շուրջ տեղի ունեցան հակասական իրադարձություններ: Սեպտեմբերի 14-ին համացանցում տարածվեց ՄԱՇ-ին սատարող «Ռուսթավի 2» հեռուստաալիքի գլխավոր տնօրեն Նիկա Գվարամիայի եւ Պաատա Բուրճուլաձեի հեռախոսազրույցի ձայնագրությունը: Այն ժամանակ Գվարամիան իր դժգոհությունն էր հայտնել դաշինքի ընտրացուցակում որոշ անդամների զբաղեցրած դիրքերի մասին:  Խոսքը «Գիրչի« կուսակցության անդամների մասին է եղել:

Բուրճուլաձեի շուրջ հաճախ տեղի էին ունենում նաեւ ֆինանսական բնույթի սկանդալներ: «Գիրչի» կուսակցության առաջնորդները դաշինքը լքելուց հետո հայտարարել էին, որ «Բուրճուլաձեի գլխավորած դաշինքը ֆինանսական հարցերում խնդիրներ է առաջացնում»:

Ավելի ուշ «Գիրչի» կուսակցության առաջնորդ Զուրաբ Ջափարիձեն հայտարարեց. «Պաատա Բուրճուլաձեն ինձ շատնաժի է ենթարկել՝ եթե «Գիրչի»-ն չկարողանա որոշակի գումար վճարել, այդ դեպքում «Գիրչի»-ի անդամները դաշինքի ընտրացուցակից կհանվեն: Պաատա Բուրճուլաձեյի հետ առաջին խնդիրն առաջացավ ցուցակը կազմելու ժամանակ: Խնդիրը կարողացանք լուծել: Հիմա նա գումար է պահանջում, եւ ես, իհարկե, չհամաձայնեցի: Նա այդ գումարը ոչ թե դաշինքի, այս սեփական օգտագործման համար էր պահանջում»,-հայտարարել էր Ջափարիձեն:

Իր հերթին Բուրճուլաձեն ասել էր, թե «Գիրչի» կուսակցությունը ֆինանսավորվում է Բիձինա Իվանիշվիլիի կողմից:

Որոշ քաղաքական գործիչներ հայտարարում էին, որ Բուրճուլաձեն քաղաքականությամբ է զբաղվում միայն գումար աշխատելու համար: Այսպես՝ Վրաստանի նախկին վարչապետ Բիձինա Իվանիշվիլին հայտարարեց, թե Պաատա Բուրճուլաձեն «Վրացական երազանքի» աջակցության դիմաց մեծ գումար է պահանջել:

Բուրճուլաձեն միայն ընտրությունների օրը՝ հոկտեմբերի 8-ին, բացեիբաց աջակցեց ՄԱՇ-ին: Նրանք պահանջում էին չեղյալ համարել Մարնեուլիի շրջանի թիվ 48 ընտրատեղամասի ընտրությունները եւ հայտարարել էին, թե իշխանությունը կրկնաքվեարկություն է իրականացնում: Այդ ժամանակ Մարնեուլիում մոբիլիզացվեցին հատուկ նշանակության զորքեր: Ընտրատեղամասի աշխատակիցները դուրս բերվեցին ընտրատարածքից, իսկ արդյունքները չեղյալ հայտարարվեցին:

Այսպիսով՝ Պաատա Բուրճուլաձեն հեռացավ քաղաքականությունից: Վերլուծելով նրա «քաղաքական հյուրախաղեր»-ը, կարելի է ասել, որ օպերային աշխարհահռչակ երգիչը սատարում էր ՄԱՇ-ին: Այս եզրակացության հիմք կարող է հանդիսանալ ոչ միայն ընտրություններին Սահակաշվիլիի կուսակցությանը աջակցելը, այլ նաեւ Գվարամիայի հետ հեռախոսազրույցից հետո «Գիրչի» կուսակցությանը դաշինքից հանելու փաստը:

Նորայր Գասպարյան
Թբիլիսի