Շանսոն էր հնչում կորսված սիրո մասին. հասարակական տրանսպորտում դեռ երաժշտություն է հնչում

Երեւանում գործող հասարակական տրանսպորտում վերջին շրջանում բավականին քիչ է երաժշտություն լսվում: Այդ են վկայում թե՛ մեր դիտարկումները եւ թե՛ կանգառներում անցկացրած հարցումները:

Մեր շրջայցի ժամանակ երկու տասնյակի չափ երթուղայիններից միայն մեկում էր մագնիտոֆոն միացված: Բավական ցածր ձայնով ռուսական շանսոն էր հնչում միայնակ հոգու, կորսված սիրո մասին:

Ներքաղաքային երթուղիները սպասարկող մեքենաների մեծ մասում նույնիսկ մագնիտոֆոն չկար:

Տրանսպորտի սպասող ուղեւորներից ոմանք գոհունակություն էին հայտնում, որ երթեւեկում են խաղաղ մթնոլորտում, մյուսներն էլ երթուղայիններում հնչող երաժշտությանը սկզբունքորեն դեմ չէին՝ նշելով, որ այն հաճելի կամ տհաճ է՝ կախված այդ օրվա տրամադրությունից:

Ավելի վաղ հայտարարվել էր, որ Երեւանում գործող հասարակական տրանսպորտում որեւէ տեսակի երաժշտություն չպետք է հնչի:

Երեւանի ավագանու «Ելք» խմբակցության անդամ, կրթության, մշակույթի եւ սոցիալական հարցերի մշտական հանձնաժողովի նախագահ Արայիկ Հարությունյանն օգոստոսին գրությամբ դիմել էր Երեւանի քաղաքապետ Տարոն Մարգարյանին՝ հիշեցնելով, որ ներքաղաքային տրանսպորտում երաժշտությունն արգելվում է գործող օրենքով:

«2006 թվականի դեկտեմբերի 5-ին ընդունված «Ավտոմոբիլային տրանսպորտի մասին» ՀՀ օրենքի 14-րդ հոդվածի 12-րդ կետը սահմանում է, որ «Ավտմոբիլաբին կանոնավոր փոխադրումների ժամանակ արգելվում է ավտովարորդի եւ ուղեւորների կողմից ավտոբուսի ուղեսրահում երաժշտություն միացնելը ներքաղաքային եւ մերձքաղաքային փոխադրումներում...»,- մեջբերել էր ավագանու անդամը:

Քաղաքապետարանից ի պատասխան վստահեցրել էին, որ ուղեւորափոխադրումներ իրականացնող բոլոր տնտեսվարող սուբյեկտների տնօրեններին «Երեւանտրանս» ՓԲԸ ղեկավարության կողմից հանձնարարվել է վարորդական աձնակազմին հրահանգավորել տրանսպորտային միջոցներում բացառել երաժշտություն միացնելու դեպքերը: