Վերջին թարմացումներ
Բաժնում առկա է 76 հրապարակում

ՏԻԳՐԱՆՆ ԱԶԱՏ ԱՐՁԱԿՎԵՑ


Վերաքննիչ քրեական դատարանը նախագահող դատավոր Եվա Դարբինյանի նախագահությամբ  հրապարակեց ՀԱԿ ակտիվիստների` Սարգիս Գեւորգյանի, Դավիթ Քիրամիջյանի, Արտակ Կարապետյանի եւ երկու տարի անազատության մեջ գտնվող քաղբանտարկյալ Տիգրան Առաքելյանի դատավճիռը: Դատարանը Տիգրան Առաքելյանին 316 հոդվածի  (իշխանության  ներկայացուցչի նկատմամբ բռնություն գործադրելը ) 2-րդ մասի 2-րդ կետով առաջադրված մեղադրանքով անմեղ ճանաչեց եւ արդարացրեց, իսկ Քրեական օրենսգրքի 356 հոդվածով եւ 258 հոդվածի 3-րդ մասի առաջին կետով դատարանը վերջինիս մեղավոր ճանաչեց եւ վերջնական պատիժ նշանակեց` ազատազրկում 3 տարի ժամկետով: Միաժամանակ, կիրառելով հոկտեմբերի 3-ին Աժ-ի ընդունած համաներման որոշումը,  ազատ արձակեց քաղբանտարկյալին: Համաներմամբ ազատ արձակվեց նաեւ ՀԱԿ ակտիվիստ Արտակ Կարապետյանը, ում դատարանը մեղավոր ճանաչեց` դատապարտելով 3 տարվա ազատազրկման: Մյուս ակտիվիստներ Սարգիս Գեւորգյանը եւ Դավիթ Քիրամիջյանը եւս մեղավոր ճանաչվեցին, սակայն որոշվեց պատիժը պայմանականորեն չկիրառել:

Ի դեպ, նախորդ դատական նիստին Տիգրան Առաքելյանը անկախության տոնի առթիվ դատավոր Եվա Դարբինյանին Քրեական դատավարության  օրենսգիրք էր նվիրել, որը սակայն դատավորը չի ընդունել, երեկ այդ գիրքը նույնությամբ գտնվում էր «ամբաստանյալների» սեղանին:

«Առաջ Հայաստան»-ի հաղթանակը «պայքար, պայքար»-ի հանդեպ

ԵԽԽՎ նստաշրջանում «քաղբանտարկյալ» եզրույթի սահմանումից հետո ՀՀ իշխանությունները խնդիր ունեն «ցույց տալու», որ դա չի տարածվում 2-6 տարվա ազատազրկման դատապարտված Կոնգրեսի ակտիվիստների վրա: Երեկ Վերաքննիչ դատարանում երիտասարդների գործով նիստում դատախազ Հ. Մարտիրոսյանն ասել է, թե վարույթն իրականացնող մարմինն իր գործողությունները չի իրականացնում այն սկզբունքով, թե «ով որ խմբից է»: Սարգիս Գեւորգյանը, որը դատապարտվել է 2 տարվա ազատազրկման, հիշեցրել է, որ կարմիբերետավորների եւ իրենց միջեւ տեղի ունեցած դեպքի ժամանակ Երեւանի փոխոստիկանապետ, Բազազ մականունով հայտնի Ռոբերտ Մելքոնյանը, «Ա1+»-ին տված հարցազրույցում ասել էր, որ իր կարգախոսը «Առաջ Հայաստան»-ն է, եւ ինքն ամեն ինչ անելու է, որ իր կարգախոսը հաղթի «Պայքար, պայքար մինչեւ վերջ» կարգախոսին: «Էլ ի՞նչ կարելի էր սպասել նման հրամանատարական կազմից»,- հարցրել է Գեւորգյանը եւ պնդել, որ ինչպես բուն դեպքը, այնպես էլ արձակված դատավճիռը միանշանակ իրենց քաղաքական հայացքների պատճառով է:

տես նաեւ էջ 4

Հանցագործների «բեսեդկայում»

Երեկ սկսվեց եւ ավարտվեց ապացույցների հետազոտման փուլը: Հրապարակվեցին մի շարք փաստաթղթեր, այդ թվում` ոստիկանության Կենտրոնի բաժնի պրոֆիլակտիկ սենյակի տեղազննության եւ Տերյան փողոցում` միջադեպի ծագման վայրում կատարված տեղազննության արձանագրությունները: Այս փաստաթղթերի ներկայացման ժամանակ Տիգրան Առաքելյանը դատախազին խնդրեց ընթերցել նաեւ ընթերակաների անունները: «Մեկ էլ տեսար` Ֆրանգուլյանը եղած լինի»,- ասաց Տիգրանը, ակնարկելով ոստիկանական բազմաթիվ քրեական գործերում ոմն Աշոտ Ֆրանգուլյանի մշտական ներկայությունը կամ տուժողի, կամ վկայի, կամ ընթերակայի կարգավիճակում: Հրապարակվեց նաեւ շան զննման արձանագրությունը: Խոսքը այն շան մասին է, որից, ըստ ոստիկանության, սկսվել էր օգոստոսի 9-ի միջադեպը: Այս արձանագրությունը ներկաների ծիծաղը հարուցեց: Ըստ այդ արձանագրության, շունը «Պիտբուլ» ցեղատեսակի էր, մարտական, բաց շագանակագույն, 3 տարեկան, կրծքավանդակի մասը սպիտակ, ականջները` կտրված, երկարությունն էլ... 31 կիլոմետր:  Հենց սա էր ծիծաղի առիթը: Այս արձանագրությանն առնչվող հայտարարությամբ հանդես եկավ Տիգրան Առաքելյանը. «Բազմիցս եմ հայտարարել, որ դեպքի օրը, դեպքի ժամանակ շուն ընդհանրապես չի եղել: Դա նաեւ փաստացի ապացուցելի է: Դատարանում հարցաքննված Զաքար Զաքարյանը` շան տերը, ասել էր, որ ոստիկաններն իրեն մոտեցել են Կարապի լճի մայթին: Իսկ ոստիկանները իրենց զեկուցագրում նշել են, որ շան տիրոջը նկատողություն են արել գրադարանի մոտ»:

Փնտրում են (2011-12-24)

Սեպտեմբերի 30-ին Ազատության հրապարակում կայանալիք հանրահավաքի մասին իրազեկման թերթոններ բաժանող Հայ ազգային կոնգրեսի երիտասարդ ակտիվիստներին խոչընդոտելու վերաբերյալ հարուցված քրգործով երեկ տեղաշարժ է եղել: Ակտիվիստներ Սարգիս Գեւորգյանը, Սահակ Մուրադյանը եւ«ՀԺ» լրագրող Անի Գեւորգյանը ճանաչվել են տուժողներ: Սեպտեմբերի 28-ին մարզահագուստներով 7-8 երիտասարդներ Տիգրան Մեծ պողոտայում մոտեցել էին հանրահավաքի մասին իրազեկող, թերթոններ բաժանող երիտասարդներին ու ակցիան լուսաբանող լրագրողներին, քաշքշուկ հրահրել, ծխախոտով այրել «ՀԺ» լրագրողի ձեռքը, հետապնդել նրանց մինչեւ Հանրապետության հրապարակ, հարձակվել եւ հարվածել նրանց, խլել թերթոններն ու դիմել փախուստի: Ըստ գործով քննիչ Գ. Բեգոյանի, հարձակում գործողները դեռ չեն հայտնաբերվել, նրանց հայտնաբերելու ուղղությամբ տարվում են համապատասխան աշխատանքներ: Հիշեցնենք, որ բոլոր հարձակվողների լուսանկարները տպագրվել են մեր թերթում: