Վանաձորում միայն դեկտեմբերի 31-ին կոտրվածքներով հիվանդանոց է տեղափոխվել 10 մարդ

«Մի բուռ ավազն ինչ է, չցանեցին». տոնական օրերին հաճախ կարելի էր այսօրինակ արտահայտություններ լսել Վանաձորի բնակիչներից, որոնք փողոցներում տեղաշարժվում էին կատարյալ զգուշավորությամբ ու կրիայի դանդաղությամբ:

Բայց զգոնության մի փոքր թուլացում, եւ դու արդեն հիվանդանոցում ես` կոտրվածքներ ստացած, որովհետեւ հանրապետության երրորդ քաղաքի փողոցներն ու մայթերը պատված են մի քանի սանտիմետր հաստությամբ սառցաշերտով: Մեր ունեցած տեղեկություններով, միայն դեկտեմբերի 31-ին այս կամ այն կոտրվածքի պատճառով Վանաձորի բժշկական կենտրոն է դիմել տասը մարդ: Հիվանդանոցի փոխտնօրեն Արտակ Եդոյանը երեկ մեզ հետ զրույցում հաստատեց այդ թիվը` հավելելով, որ նախորդ տարվա միեւնույն օրը կոտրվածքներով հիվանդանոց ընդունվածների թիվը եղել է հինգը:

2017 թվականի հունվարի 1-ից 9-ն ընկած ժամանակահատվածում նմանատիպ խնդիրներով բուժհաստատություն է դիմել ընդհանուր առմամբ 52 տուժած: Նախորդ տարվա առաջին օրերին կոտրվածք ստացածների թիվն ավելի մեծ է եղել` 55-ը: Ամեն դեպքում, վանաձորցիներն ասում էին, որ իրենց քաղաքի համար սառույցները նորություն չեն, թեպետ այս տարին աննախադեպ է: Ընդ որում, մինչեւ մուտքի դուռը անանցանելի էր նույնիսկ քաղաքի հիվանդանոցի հարակից տարածքը` այցելուների համար իրական վտանգ ստեղծելով վնասվածք ստանալ հենց բժիշկների քթի տակ:

Արտակ Եդոյանը չպատասխանեց, թե առողջապահական հաստատության շրջակայքը մաքուր պահելու պարտականությունն ումն է` իրե՞նցը, թե՞ քաղաքապետարանինը: «Ճիշտն ասած` ես դա չեմ կարող ասել, չգիտեմ` ում գործառույթն է: Ես բուժգծով փոխտնօրենն եմ, այդ տեխնիկական հարցերը իմ խնդիրների մեջ չեն մտնում: Ես զբաղվում եմ հիվանդների բուժական հարցով»,- ասաց նա: Հետաքրքրվեցինք` իսկ հիվանդանոցի տարածքում ընկնելու եւ կոտրվածք ստանալու դեպքեր եղե՞լ են: Փոխտնօրենն այս հարցը նույնպես շրջանցեց. «Ձեզ թվում է` ես պիտի հետաքրքրվե՞մ` որտեղ է հիվանդն ընկել, ինչ է եղել, ա´յ ժողովուրդ ջան: Մեզ հետաքրքրում են միայն հիվանդների առողջական խնդիրները: Մնացածը` որտեղ է ընկել, ինչպես է ընկել, ինչու է ընկել, խնդրում եմ համապատասխան մարմիններին դիմեք»:

Վանաձորի քաղաքապետարանի կոմունալ տնտեսության եւ բարեկարգման բաժնի առաջատար մասնագետ Միշա Ազարյանը հավաստիացրեց, որ քաղաքի ձյան ու սառույցի դեմ պայքարում արվել է հնարավորն ու դեռ մի բան էլ ավելին:

«Ձյան տեղումները սկսվելուն պես մենք պարբերաբար կատարել ենք ձնամաքրման աշխատանքներ քաղաքի գրեթե բոլոր փողոցներում: Մաքրման աշխատանքներից հետո իրականացվել է աղատրում: Աղատրում կատարվել է օրումեջ` պարբերաբար: Մենք ձեռք ենք բերել նաեւ ավազ: Ավազի եւ աղի խառնուրդով նորից տվել ենք աղատրում, որպեսզի կպչողականությունը ավելի բարձր լինի, քանի որ ավազը ավելի կպչողականություն ունի աղի հետ: Միեւնույն ժամանակ մայթերի մաքրման աշխատանքներին օգնել է նաեւ բնակչությունը, տարբեր իրավաբանական անձինք իրենց սեփականության դիմացի տարածքի մաքրման աշխատանքներն են կատարել, մենք էլ մեր կողմից ինչքան հնարավոր է մաքրման աշխատանքներ ենք իրականացրել, որպեսզի կարողանանք բնակչությանը ապահովել սառույցներից, դժվար անցանելիությունից»:

Հարցրինք, թե եթե այդքան աշխատանք է իրականացվել, ինչո՞ւ են Վանաձոր քաղաքի փողոցները սառցաշատ: «Աղը գործում է մինչեւ -5 աստիճանում: Եթե մենք այդքան աղատրում չկատարեինք, անանցանելի կլիներ ընդհանրապես: ...Եղանակային պայմաններն այսպիսին էին` սկզբից տաքացավ-տաքացավ, ձնախառն անձրեւ եկավ, ու միանգամից ցրտեց, երեք օր անընդհատ տեղումներ եղան: Մենք հնարավորություն չունեինք եղանակային այդ բարդ պայմաններում ամբողջ քաղաքը մաքրելու, որովհետեւ չունենք այդքան նյութատեխնիկական բազա, որպեսզի ամեն փողոց մտցնեինք երկու-երեք հատ մեխանիզմ ու անընդհատ մաքրեին, եւ գոյացավ սառցաշերտ: Դրա համար մենք դիմեցինք ավազի հետ խառնուրդով աղատրման մեթոդին, ու կարողացանք ինչ-որ արդյունքի հասնել: Եթե դուք տեղյակ եք Երեւանի փողոցների եւ մայթերի վերաբերյալ, կզգաք, որ մենք ավելի շատ աշխատանքներ ենք կատարել: Եթե Երեւանը մայրաքաղաք է, ունի այդպիսի մեծ հնարավորություններ, եսիմ քանի տասնյակ տեխնիկա, ու այնտեղ մայթերն ու փողոցները սառցապատ վիճակում են, ինչից բողոքում են հեռուստատեսությամբ, մամուլով եւ այլն, մենք մեր ուժերի ներածին չափով, նույնիսկ առավելագույնս ենք դրանք օգտագործել, որպեսզի կարողանանք այդ աշխատանքներն իրականացնել»,- շարունակեց Վանաձորի քաղաքապետարանի աշխատակիցը:

Ինչ վերաբերում է Վանաձորի բժշկական կենտրոնի շրջակա հատվածի ձնամաքրման աշխատանքներին, նա ասաց, որ դրանց կազմակերպման պարտավորությունը հիվանդանոցի ղեկավարությանն է: «Հիվանդանոցի տարածքը` բակը, աստիճանները եւ այլն, պարտավոր է հիվանդանոցը մաքրել իր ուժերով: Դա բուժհաստատության ղեկավարության խնդիրն է»,- նշեց Միշա Ազարյանը: