Նախընտրական ի՞նչ վերադասավորումների կբերի Ծառուկյանը քաղաքական դաշտում

Երեկ, վերջապես Գագիկ Ծառուկյանը հայտարարեց, որ բացում է քաղաքական գործունեության փակված էջը եւ մասնակցելու է ապրիլյան խորհրդարանական ընտրություններին՝ ձեւավորելով լայն դաշինք: «Մեր դռները բաց են բոլոր այն քաղաքական ուժերի եւ գործիչների առաջ, ովքեր մտահոգ են մեր երկրի ապագայով»,- իր հեռուստաելույթում հայտարարել է նա:

Եւ այսօրվանից սկսած՝ քաղաքական դաշտում նոր վերադասավորումներ են սպասվում, ինչպես դա տեղի ունեցավ 2015թ. փետրվարին ակտիվ քաղաքականությունից Ծառուկյանի հեռանալուց հետո: Այդ ժամանակ Ծառուկյանի ղեկավարած «Բարգավաճ Հայաստան» կուսակցությունից հեռացան մի խումբ անդամներ, որոնք ստեղծեցին 3 կուսակցություն: ԲՀԿ-ից հեռացած մի շարք անդամներ սկսեցին համագործակցել Հանրապետական կուսակցության հետ, որոշներն էլ պարզապես հեռացան, դադարեցրեց իր համագործակցությունը Ծառուկյանի կողմից խրախուսվող ոչիշխանական եռյակը եւ այդպես շարունակ: Բայց քանի որ հիմա նախընտրական շրջան է, Ծառուկյանի վերադարձն էլ ավելի մեծ քաղաքական վերադասավորումների կբերի:

Դեռ հայտնի չէ, թե որ ուժերը նրա հետ կգնան լայն դաշինքի: Ակնհայտ է, որ նա կհենվի իր ԲՀԿ-ի վրա: Իսկ ԲՀԿ-ից պոկված Վարդան Օսկանյանի «Համախմբումը» կամ Տիգրան Ուրիխանյանի «Ալյանսը կմիանա՞ն այդ դաշինքին: Որոշ տեղեկությունների համաձայն, «Համախմբումից» պատգամավոր Վահե Հովհաննիսյանն անընդհատ բանակցությունների մեջ է Ծառուկյանի հետ: Վերջինս, հիշեցնենք, ժամանակին Ծառուկյանի բարեգործական հիմնադրամի ղեկավարն էր: Ծառուկյանի հետ այս ընթացքում որոշակի նախընտրական բանակցությունների մեջ գտնվող ՀՀՇ-ն, «Ժառանգություն» կուսակցության որոշ անդամները նախընտրական համագործակցություն կունենա՞ն նրա հետ:

Մյուս կողմից էլ, Ծառուկյանն ի՞նչ կարգավիճակով է դաշինք կազմելու, արդյոք նա ԲՀԿ-ում իր ղեկավար դիրքը վերականգնելո՞ւ է: Դրա համար կուսակցությունը պետք է ընտրություններից առաջ համագումար անցկացնի, նրան նորից նախագահ կամ ղեկավար այլ պոստի ընտրի: Սրանք հարցեր են, որոնք պարզ կդառնան առաջիկայում: «Առհասարակ Գագիկ Ծառուկյանն իր հայտարարության մեջ ամփոփելով տեղի ունեցածը, երկրում գոյություն ունեցող իրավիճակը՝ շատ հստակ մատնանշել է, որ մեծ կոնսոլիդացիայի կարիք կա, որպեսզի հնարավոր լինի լուծել երկրում առկա խնդիրները: Եվ ընթացքում պարզ կդառնա, թե որ քաղաքական ուժերը, որ հասարակական քաղաքական գործիչները կմիավորվեն ու կսատարեն այդ գաղափարներին: Ամեն ինչ առաջիկայում պարզ կլինի»,- մեզ հետ զրույցում ասաց ԲՀԿ խմբակցության քարտուղար Վահե Էնֆիաջյանը:

Ընդ որում, դրա համար առանձնապես երկար ժամանակ չի էլ մնացել: Կուսակցությունների կամ դաշինքների կողմից ընտրություններին մասնակցելու վերաբերյալ Կենտրոնական ընտրական հանձնաժողով փաստաթղթեր ներկայացնելու վերջնաժամկետը փետրվարի 16-ն է: Այսինքն մեկ ամսից էլ քիչ ժամանակ է մնացել, եւ առաջիկա երկու-երեք շաբաթների ընթացքում այդ հարցերն ու ըստ երեւույթին Ծառուկյանի գլխավորած նախընտրական ցուցակի բովանդակությունը պարզ կդառնան:

Երեկ մենք փորձեցինք իշխանություններից պարզել, թե ինչպես են վերաբերվում Ծառուկյանի վերադարձին: Հանրապետական խորհրդարանական խմբակցության ղեկավար Վահրամ Բաղդասարյանի խոսքերով՝ դա իրենց համար անսպասելի չէր: «Նրա վերադարձը մեզ համար անակնկալ չէր, որովհետեւ վերջին ամիսներին արդեն բավական բուռն կերպով քննարկվում էր այդ հարցը, եւ այսօր մենք շատ նորմալ ընդունում ենք նրա այդ հայտարարությունը: Մեր երկիրը ազատ երկիր է, որտեղ յուրաքանչյուր ոք իրավունք ունի իր դիրքորոշումն ազատորեն արտահայտել քաղաքական դաշտում: Բնականաբար, մենք կհետեւենք ընթացքին, կծանոթանանք նրա ներկայացրած ծրագրերին: Եվ հանրությունն ինքը կորոշի, թե ով իր դերակատարությունը կարող է ունենալ քաղաքական կյանքում»,- ասաց նա:

- Բայց իշխանության մեջ քիչ չէին այն կարծիքները, որ Ծառուկյանը դժվար թե վերադառնա քաղաքականություն: Հատկապես որ, որոշ տեղեկությունների համաձայն, Սերժ Սարգսյանը նրան ներքին քննարկումների ժամանակ ասել է, թե ցանկալի չէ քո վերադարձը:

- Ոչ, Ս. Սարգսյանը նման բան չի ասել, դրանք ընդամենը լրատվական հետաքրքրությունների դաշտից են: Եվ մեզ համար էլ անակնկալ չէր Ծառուկյանի այդ հայտարարությունը:

- Հատկապես իշխանությունների կարծիքով Ծառուկյանն անելիք ունի՞ քաղաքական դաշտում: Չէ՞ որ 2015թ. փետրվարին Ս. Սարգսյանը քաղաքական դաշտում նրա գործունեության մասին էր ասում, թե «մենք կրկեսի վերածելու հայրենիք չունենք»:

- Նա կներկայացնի իր ծրագրերը, մենք կծանոթանանք եւ մեր գնահատականները կտանք ապագայում:

- Ծառուկյանը լայն դաշինք ձեւավորելու մասին է խոսում: Դա ձեզ մոտ մտահոգություն չի՞ առաջացնում:

- Դրանք առայժմ խոսքեր են, որոնք դեռ պետք է իրականություն դառնան: Երբ քաղաքական դաշտում նման հայտ կլինի, նոր դրա մասին կխոսենք:

- Կարծիք կա, որ Ծառուկյանի վերադարձն ու խորհրդարանական ընտրություններին մասնակցելը նորից իշխանական պրոյեկտ է, որ նա համախմբի ընդդիմադիր էլեկտորատին, ստանա նրանց ձայները, որպեսզի իրական ընդդիմությունն ԱԺ-ում լայն ներկայացվածություն չունենա:

- Մենք նման գործերով չենք զբաղվում, հակառակը, մեր նպատակն է, որ ընդդիմադիր դաշտը կայանա: Ընդհանրապես քաղաքական դաշտը կայանա:

- Իսկ ընդդիմադի՞ր գործիչ է Ծառուկյանը:

- Դա թող ինքը որոշի, կներկայացնի իր ծրագրերը, կխոսի իր անելիքների մասին, պարզ կդառնա:

- Դուք համագործակցելո՞ւ եք Ծառուկյանի հետ:

- Մենք բոլորի հետ ենք պատրաստ համագործակցելու: Չկա քաղաքական ուժ, որի հետ չհամագործակցենք: Համագործակցել ասելով՝ մի հասկացեք միայն կոալիցիա կազմելը եւ պաշտոններ բաժանելը: Համագործակցության տարբեր ձեւեր կան, եւ հիմա մենք տարբեր եղանակներով համագործակցում ենք քաղաքական դաշտի բոլոր ուժերի հետ:

- Իսկ ընտրություններից հետո նորից կոալիցիա կկազմե՞ք Ծառուկյանի հետ: Ի վերջո, նա ձեր կոալիցիոն գործընկերն է եղել:

- Այդ մասին մենք կխոսենք ընտրություններից հետո: