Ռուսաստանում հանդես եկող հայազգի երիտասարդ հոկեյիստները իրարանցում են առաջացրել

7 տարի առաջ՝ 2010 թվականի ապրիլին, Երեւանում անցկացվեց տափօղակով հոկեյի աշխարհի առաջնության ամենացածր՝ C դիվիզիոնի մրցաշարը, որին մասնակցում էր նաեւ Հայաստանի ազգային հավաքականը: Մարզասերները հավանաբար հիշում են, որ իր կազմում հանդես եկած խաղացողների մասին սխալ տեղեկատվություն տրամադրելու համար Հայաստանը հետագայում որակազրկվեց հոկեյի միջազգային ֆեդերացիայի կողմից: Ընդ որում, Հայաստանը որակազրկվեց 2-րդ անգամ եւ անորոշ ժամանակով, որից հետո գրեթե չենք լսել հայկական հոկեյի մասին: Այնինչ այս մարզաձեւը սիրված է Հայաստանում եւ մեծ հաշվով էլ բավարար ներուժ կա այն պատշաճ ներկայացնելու:

Ընդ որում, այդ «ներուժը» ամբողջապես դրսում է՝ Հայաստանի սահմաններից դուրս: ԱՄՆ-ում, Կանադայում, Ռուսաստանում ավելանում են հայազգի հոկեյիստները, իսկ Բելառուսում անգամ հայկական թիմ կա՝ «Արարատ», որի կազմում հանդես են գալիս մեծ թվով հայազգի երիտասարդ հոկեյիստներ: Մի փոքր վերափոխելով ՈՒՀԱ - ի «Նոր հայեր» թիմի  կատակներից մեկը՝ «Ծով ունենք, ջուր չկա», կարելի է ստանալ հայկական հոկեյի ներկայիս վիճակը բնութագրող արտահայտություն՝ «հոկեյիստներ ունենք, հոկեյ չկա»: 

Օրեր առաջ Ռուսաստանի Ուֆա քաղաքի մարզադահլիճում կայացել է հոկեյի մայրցամաքային լիգայի (KHL) - ի ամենամյա փառատոնը, որի շրջանակներում կայացած խաղերում գլխավոր հերոս է դարձել հայազգի Անդրեյ Ալթիբարմակյանը: Հոկեյի փառատոնի շրջանակներում նախ կայացել է Ռուսաստանի երիտասարդական լիգայի, ապա՝ KHL-ի բոլոր աստղերի հանդիպումները: Սանկտ Պետերբուրգի «ԲՄԱ-Արծաթե առյուծներ» թիմի հարձակվող 19-ամյա Անդրեյ Ալթիբարմակյանը նախ գոլի հեղինակ է դարձել երիտասարդական լիգայի աստղերի՝ «Մարտահրավերի գավաթ» կոչվող հանդիպման ժամանակ, նաեւ ճանաչվել է այդ հանդիպման լավագույն հոկեյիստ եւ իրավունք ստացել մասնակցելու KHL-ի «Բոլոր աստղերի» խաղին: Այս խաղում արդեն Ալթիբարմակյանը դարձել է իր թիմի հաղթական գոլի հեղինակ եւ արձանագրել ուշագրավ ռեկորդ՝ գոլեր է խփել բոլոր աստղերի 2 հանդիպումներում:

Անդրեյ Ալթիբարմակյանը հայտնվել է ռուսական ԶԼՄ-ների ուշադրության կենտրոնում, տվել բազմաթիվ հարցազրույցներ, նաեւ՝ պատասխանել է իր ազգանվան ծագումնաբանության մասին հարցին: «Բնիկ պետերբուգցի եմ: Այստեղ է ծնվել նաեւ հայրս, իսկ պապս Ադլերից է: Ազգանունս մեծ պապիս մականունն է: Այն նշանակում է 6 մատանի: Վերադառնալով հայրենիք՝ Հայաստան, պապս մականվանը ավելացրել է «յան» վերջածանցը եւ ստացվել է Ալթիբարմակյան ազգանունը: Հասկանում եմ, որ այն դժվար է արտասանել, բայց պետերբուրգցիները, հայերը մշտապես բուռն կերպով աջակցում են ինձ: Նշեմ, որ հիմա շատ են հոկեյով զբաղվող հայերը: Տեսեք Մանուկյանները ինչ իրարանցում են առաջացրել», - ասել է Ալթիբարմակյանը:

Նշեմ, որ, որ Օմսկի «Ավանգարդում» են հանդես գալիս Տիգրան եւ Արտյոմ Մանուկյանները՝ որոնց մասին ակնարկել է Անդրեյ Ալթիբարմակյանը: Ընդ որում, 20-ամյա Տիգրանը երիտասարդական թիմի ավագն է, իսկ 19-ամյա Արտյոմը երիտասարդական լիգայի գլխավոր ռմբարկուն է եւ համարվում է Ռուսաստանի ամենահեռանկարային հոկեյիստներից մեկը: Կայացած 47 հանդիպումներում Արտյոմ Մանուկյանը դարձել է 34 գոլի, 52 գոլային փոխանցման հեղինակ եւ լավագույն ռմբարկուների «գոլ + փոխանցում» հաշվարկում վաստակել է 86 միավոր: Արտյոմ Մանուկյանը վստահորեն գլխավորում է լավագույն ռմբարկուների ցուցակը 2-րդ տեղում ընթացող հոկեյիստին գերազանցելով 7 միավորով: «Պապս եւ տատս բնակվում են Հայաստանում եւ բնականաբար երկրպագում են մեզ»,- մի առիթով հայտարարել է եղբայրներից ավագը՝ Տիգրանը:

Լրագրողները Արտյոմին հարցրել են, թե չի՞ ցանկանում հանդես գալ Հայաստանի հավաքականում: «Մի անգամ Հայաստանի պատանեկան հավաքականի կազմում մասնակցել եմ ցուցադրական հանդիպման: Կազմակերպվել էին նաեւ տարբեր մրցույթներ, որոնցից մեկի ժամանակ պետք էր տափօղակը ուղարկել խաղահրապարակի անկյունում դրված շրջանակի մեջ: Ես նետեցի տափօղակը՝ շրջանակը քանդվեց: Այն վերանորոգեցին եւ մի քանի րոպե անց կրկին տեղադրեցին. ես նորից նետեցի ու շրջանակը կրկին կոտրվեց: Ստիպված էին այդ մրցույթը դադարեցնել,- ծիծաղելով պատմել է Արտյոմ Մանուկյանը եւ ավելացրել. - Իսկ ավելի լուրջ՝ նպատակս Ռուսաստանի հավաքականում հանդես գալն է, քանի որ այն անհամեմատ բարձրակարգ թիմ է»: Հայազգի հոկեյիստների մասին այս շարքը կարելի է շարունակել: Ստացվում է՝ իրոք «հոկեյիստներ ունենք, բայց հոկեյ չունենք»:

Նկարում՝ Անդրեյ Ալթիբարմակյան (ձախից) եւ Արտյոմ Մանուկյան