Հակոբ Հակոբյանը հարցում է արել ու որոշել՝ ընտրություններին մասնակցել Ծառուկյանի դաշինքով

ԱԺ ՀՀԿ խմբակցության նախկին պատգամավոր, գործարար Հակոբ Հակոբյանը (Ճոյտ) որոշում է կայացրել առաջիկա խորհրդարանական ընտրություններին մասնակցել ԲՀԿ հիմնադիր Գագիկ Ծառուկյանի գլխավորած դաշինքով: Նա պատրաստվում է իր թեկնածությունը ռեյտինգային ընտրակարգով առաջադրել Արմավիրի մարզում:

- Պարոն Հակոբյան, ինչո՞ւ որոշեցիք նորից պատգամավոր դառնալ:

- Որովհետեւ ես միշտ քաղաքականության մեջ եմ եղել: Ես մենակ ավելի շատ հարցազրույցներ եմ տվել, քան 10-15 պատգամավոր իրար հետ վերցրած: Հարցազրույցներ, վերլուծություններ, հանդիպումներ ազգաբնակչության հետ... Ես միշտ եղել եմ ակտիվ քաղաքականության մեջ, պարզապես, ուզում եմ այսօր իմ լիազորությունները բարձրանան, որպեսզի կարողանամ այն գիտելիքները, փորձը, որ ձեռք եմ բերել այս տարիների ընթացքում՝ տանեմ Ազգային ժողով:

- Իսկ ինչո՞ւ Գագիկ Ծառուկյանի հետ:

- Ես հոկտեմբերի սկզբին մամուլով հայտարարեցի, որ մասնակցելու եմ ընտրություններին, սակայն նախ անց ենք կացնելու հարցումներ ազգաբնակչության շրջանում: Ասացի, որ դեկտեմբերի վերջին կհայտարարեմ, թե որ դաշինքի հետ եմ մասնակցելու ընտրություններին: Այդ հարցումների արդյունքները ցույց տվեցին, որ Ծառուկյան Գագիկն այսօրվա դրությամբ վայելում է ժողովրդի կողմից հարգանք, վստահություն: Այդ վստահությունն ինձ ստիպեց, պարտավորեցրեց, որ ես գնամ այդ դաշինքի հետ: Դա ոչ թե իմ անձնական ցանկությունն է, այլ մեր ուսումնասիրության արդյունքում ժողովրդի ցանկությունը:

- Այդ հարցումները ե՞րբ են անցկացվել, որտե՞ղ, քանի՞ մարդու շրջանում:

- Արմավիրի մարզում, 1500-1550 մարդու շրջանակներում: Կոնկրետ մարդկանց հետ նստել-խոսել ենք, հարցեր ենք ուղղել՝ ո՞ւմ կտեսնեք, ինչո՞ւ... Այդ հարցերի պատասխանները ստանալուց հետո եկել ենք այն եզրակացության, որ պետք է գնանք «Ծառուկյան դաշինքի» հետ:

- Երկրորդ տեղում ո՞ր ուժն է ձեր հարցման արդյունքներով:

- Ես չէի ուզենա այսօր որեւէ կուսակցությունում կասկածների առիթ դառնար: Չէի ուզենա դա հրապարակել, որպեսզի մարդիկ էլ վատ չզգան դրանից: Պարզապես, ես տեսա, որ Ծառուկյան դաշինքին են վստահում, որոշեցի այդ դաշինքով մասնակցել: Ժողովրդին դեմ ես երբեք չեմ գնա:

- Այսինքն՝ եթե ժողովուրդը նախընտրեր ՀՀԿ-ին՝ ՀՀԿ-ի հետ կգնայիք, եթե ցանկանար Հայկական վերածնունդին՝ Հայկական վերածնունդի հե՞տ:

- Ցանկացած կուսակցության, ինչ ժողովուրդն ինձ ուղղորդեր գնալ, կգնայի, կսկսեինք միասին բանակցությունները, կտեսնեի, գնա՞լ, թե՞ չգնալ: Ցանկացած  կուսակցություն:

- Ձեզ չի՞ անհանգստացնում այն, որ Գագիկ Ծառուկյանը նախորդ անգամ կեսից հետ կանգնեց, նրան ուղղակի թույլ չտրվեց շարունակել պայքարը:

- Քաղաքականության մեջ ամեն ինչ կարելի է՝ ճանապարհից ետ գնալ, խոստումներ տալ, ասել, գաղափարների համար համախոհների հետ վիճել...Եթե քո գաղափարները չեն կիսում, դու կարող ես ընդհուպ քո ընտանիքի անդամների հետ գժտվել, քո հարազատների հետ վիճել. այստեղ գալիս է գաղափարների խնդիրը: Եթե իմ գաղափարները չկիսեցին կողքիս մարդիկ, համոզված եղեք, ես նրանց հետ գժտվելու եմ: Ես իմ գաղափարներին, սկզբունքներին հասնելու համար պատրաստ եմ ամեն ինչի, իսկ եթե քաղաքական գործիչը գաղափարների, սկզբունքների համար պատրաստ չի ամեն ինչի, նա չի կարող քաղաքական գործիչ լինել:

- Արմավիրի ընտրատարածքում առաջադրվելու մտադրության մասին մի շարք անձինք են հայտարարել: Օրինակ, շրջանառվում է Առաքել Մովսիսյանի, Սեյրան Սարոյանի անունը: Սա հաշվի առնելով ինչպե՞ս եք գնահատում ձեր շանսերը:

- Շանսերը տալիս է ժողովուրդը: Հիմա մենք գնում ենք ընտրությունների, բոլորին հաջողություն եմ մաղթում, մաղթում եմ, որ բոլորս օրենքի սահմաններում գնանք ընտրությունների: Շանսերը մեր ձեռքում չեն, ժողովրդի ձեռքում են: Ժողովուրդն ինչպես կգնահատի նախկին կատարած աշխատանքները, ինչքան կհավատա մեր տված խոստումներին՝ այդքան էլ մեզ ձայն կտա: Չ՞է որ մենք բոլորս խոստում ենք տալիս, ծրագիր ենք ներկայացնում: Հիմա ամեն մարդ ունի հնարավորություն գնահատելու՝ մեր ասածը մենք իրականություն կդարձնե՞նք, թե՞ չենք դարձնի: Մի խոսքով, գնահատականը պետք է տա ժողովուրդը:

- Ուղղակի հայտնի է, որ Հայաստանում ավելի շատ դեր է ունենում վարչական լծակների գործադրումը, քան ասելիքը, ծրագիրը, անելիքը:

- Գիտե՞ք ինչ, որպես թեկնածու ես չեմ կարող վերահսկողություն իրականացնել ո՛չ լծակների դեմ, ո՛չ վարչական ռեսուրսների դեմ: Ես պարզապես գնալու եմ ընտրությունների, կարծում եմ, որ ամենաուժեղ օրենքը դա երկրի սահմանադրությունն է, իսկ սահմանադրության երաշխավորը Հանրապետության նախագահն է: Ես չեմ կարծում, որ այսօր մեր երկրի նախագահի, ինչպես նաեւ քաղաքական մեծամասնության համար կարեւոր լինի, թե անձերից ով կգնա ԱԺ: Անձերի շուրջ չի ձեւավորվում, կարեւորը մեր երկրի իմիջն է: Պետք է քննություն հանձնելով ցույց տանք աշխարհին, որ մենք արդեն ժողովրդավար երկիր ենք եւ պատրաստ ենք գնալ ազատ եւ արդար ընտրությունների: Սա մեծ քննություն է՝ հետագայում մեր երկրում ներդրումների առումով, զարգացման առումով: Իսկ ես չեմ կարծում, որ որեւիցե ղեկավար գնա իր երկրին դեմ: