Ո՞վ կփոխարինի Հովիկ Աբրահամյանին ու Սուրիկ Խաչատրյանին

Հայաստանի պետական տնտեսագիտական համալսարանի խորհրդի նախագահի պաշտոնը դե յուրե շարունակում է զբաղեցնել ՀՀ նախկին վարչապետ Հովիկ Աբրահամյանը: Բուհի պաշտոնական կայքէջում նա այժմ էլ ներկայացվում է այդ կարգավիճակով:

Շատ հաճախ բուհերի կառավարման խորհուրդների անդամները, պաշտոնից զրկվելով, նաեւ դուրս են գալիս այդ խորհուրդների կազմից: Իսկ Հովիկ Աբրահամյանի դեպքում պաշտոնանկությանը նախորդել էր հայտարարությունն այն մասին, որ ինքը հրաժարվելու է Տնտեսագիտական համալսարանի խորհրդի նախագահի պաշտոնից:

«Իմ գործընկերներին ուզում եմ հիշեցնել` քանի որ Տնտեսագիտական համալսարանի խորհրդի նախագահը ես եմ, ելնելով աշխատանքային ծանրաբեռնվածությունից, ես հայտարարել եմ, որ հրաժարվելու եմ խորհրդի նախագահի այդ պաշտոնից եւ կառաջարկեմ առաջիկա խորհրդի նիստում կրթության եւ գիտության նախարարության հետ միասին քննարկենք խորհրդի նախագահ ընտրելու հարցը»,- կառավարության 2016 թվականի հուլիսի 29-ի նիստում հայտարարել էր դեռեւս վարչապետ Հովիկ Աբրահամյանը: Ընդ որում, դրանից ավելի քան մեկ տարի առաջ արդեն հայտնի էր նրա այդ մտադրության մասին: Բայց, ինչպես նշեցինք, Հովիկ Աբրահամյանը դեռ համարվում է նշված բուհի խորհրդի նախագահը:

Տնտեսագիական համալսարանի խորհրդում կառավարության կողմից առաջադրված անդամների շարքում է նաեւ ՀՀ ֆինանսների նախկին նախարար Գագիկ Խաչատրյանը: Ռեկտոր Կորյուն Աթոյանից տեղեկացանք, որ նախորդ տարեվերջին կայացած նիստին Հովիկ Աբրահամյանը մասնակցել է, իսկ Գագիկ Խաչատրյանը` ոչ:

«Քանի որ Հովիկ Աբրահամյանին փոխարինելու որոշում դեռ չկար, ուղղակի բուհի ռեկտորի հաշվետվություն էր ներկայացվելու, նա մասնակցել է ու էլի հայտարարել, որ իր վերջին նիստն է, այլեւս չի գալու»,- ասաց Տնտեսագիտական համալսարանի ռեկտորը` հավելելով, որ քանի դեռ չունեն փոփոխությունների մասին համապատասխան որոշում, բուհի կայքում խորհրդի անդամների ցանկը մնում է նույնը:

Նա հաստատեց, որ խորհրդի կազմում փոփոխություններ սպասվում են: Հիշեցնենք, որ բուհի կառավարման խորհուրդը կազմված է հետեւյալ համամասնությամբ` 25-ական տոկոս պրոֆեսորադասախոսական համակազմից, ուսանողներից, կառավարության ու ԿԳ նախարարության ներկայացուցիչներից: Թե´ նախկին վարչապետը եւ թե´ Գագիկ Խաչատրյանն առաջադրվել էին կառավարության կողմից:

«Ինչ փոփոխություններ կլինեն, չեմ կարող ասել, բայց որ կլինեն, դա միանշանակ: Ինձ ասել են, որ փոփոխություններ նախատեսվում են»,- ասաց Կորյուն Աթոյանը:

Սակայն, ո´չ ՀՀ կառավարությունից, ո´չ էլ կրթության եւ գիտության նախարարությունից մեզ չհաջողվեց պարզել, թե Տնտեսագիտական խորհրդի կազմն ինչ փոփոխպությունների է ենթարկվելու եւ մասնավորապես Հովիկ Աբրահամյանին ո՞վ է փոխարինելու: Արդյո՞ք գործող վարչապետ Կարեն Կարապետյանը:

Նշենք, որ Գորիսի պետական համալսարանի խորհուրդը նույնպես էլ նախկինը չի լինի: Այս դեպքում դրա գործունեության ժամկետը լրացել է նախորդ տարվա սեպտեմբերին, իսկ նորը դեռեւս չի ձեւավորվել: Այդ բուհի խորհրդի կազմում, ըստ ամենայնի, Սյունիքի նախկին մարզպետ Սուրիկ Խաչատրյանն այլեւս չի ընդգրկվի, եւ նրան փոխարինելու կգա գործող մարզպետ Վահե Հակոբյանը: Մինչ այժմ Խաչատրյանը նաեւ նշված բուհի կառավարման խորհրդի նախագահն էր:

«Խորհրդի գործունեության ժամկետն ավարտվել է, հիմա սպասում ենք, որ կառավարությունը հաստատի նոր կազմ, որից հետո նիստ կհրավիրվի եւ կընտրվի նախագահ»,- ասաց Գորիսի պետական համալսարանի ռեկտոր Արտուշ Ղուկասյանը: Նա նշեց, որ համալսարանը սահմանված կարգով ներկայացրել է խորհրդի իր անդամների թեկնածությունները:

Ու որքան էլ բուհերում տարեվերջին նիստ է հրավիրվում` քննարկելու կատարված աշխատանքներն ու նախանշելու անելիքները, Գորիսի պետական համալսարանի խորհուրդը վերջին անգամ նիստ է գումարել 2016 թվականի ամռանը` ռեկտոր ընտրելու նպատակով: «Օրենքով` տարվա ընթացքում առնվազն մեկ նիստ է ենթադրվում, մեր բուհի խորհուրդը երկու նիստ ունեցել է»,- նկատեց Արտուշ Ղուկասյանը:

Հ.Գ.-1. Գորիսի պետական համալսարանի ռեկտորը երեկոյան տեղեկացրեց, որ իրեն զանգահարել ու հայտնել են, որ խորհրդի կազմն արդեն հաստատված է եւ երկուշաբթի կամ երեքշաբթի ինքն այն կստանա: