Հայ վարորդը նորից խցում է. ՀՀ օմբուդսմենի գրասենյակից պնդում են՝ ՌԴ ՄԻՊ-ը չի խաբել

Ռուսաստանում դատված հայ վարորդ Հրաչյա Հարությունյանին այդպես էլ քաղաքացիական հիվանդանոց չեն տեղափոխել, ինչպես խոստացել էին ՌԴ մարդու իրավունքների հանձնակատարի ներկայացուցիչները: Ավելին՝ պարզվում է նրան նույնիսկ քրեակատարողական հիմնարկի հիվանդանոցում չեն պահել, որտեղ տեղափոխվել էր հունվարին՝ ՌԴ մարդու իրավունքների հանձնակատարի ներկայացուցիչների այցելությունից առաջ: Այս մասին մեզ հետ զրույցում տեղեկացրեց Հրաչյա Հարությունյանի աները՝ Վիկտոր Մարտիրոսյանը:

Հիշեցնենք, որ ՌԴ-ում դատապարտված հայ վարորդ Հրաչյա Հարությունյանի ընտանիքն ամիսներ շարունակ ահազանգում էր, որ Հարությունյանին առողջական ծանր վիճակում պատժախցում են պահում: Հունվարի վերջին ՀՀ ՄԻՊ գրասենյակից հայտնեցեին, որ ՌԴ մարդու իրավունքների հանձնակատարի ներկայացուցիչները հատուկ այցելություն են կատարել ազատությունից զրկման այն վայր, որտեղ պատիժ է կրում ՀՀ քաղաքացի Հրաչյա Հարությունյանը, ուսումնասիրվել են նրա պատժի կրման պայմաններն ու առողջական վիճակը:

Հաղորդագրությունում նշվում էր, որ ազատությունից զրկման վայրի բժշկական ղեկավարության հետ համաձայնություն է ձեռք բերվել առ այն, որ 2017 թվականի հունվար-փետրվար ամիսներին քաղաքացիական բժշկական հաստատությունում կկազմակերվեն Հրաչյա Հարությունյանին անհրաժեշտ հետազոտությունները եւ համապատասխան բուժումը:

ՌԴ մարդու իրավունքների հանձնակատար Տատյանա Մոսկալկովան ՀՀ օմբուդսմենին տեղեկացրել էր նաեւ, որ Հրաչյա Հարությունյանի իրավունքների պահպանման հարցը վերցված է հատուկ հսկողության:

Այսօր սակայն Վիկտոր Մարտիրոսյանը մեզ հետ զրույցում հայտնեց, որ չնայած հայտարարությանը՝ ՔԿՀ-ի հիվանդանոցում մի քանի օր պահելուց հետո Հրաչյա Հարությունյանին նորից տեղափոխել են խուց:

«Նույն դեղերը սրսկել են, ցավերը թուլացել է, մի քանի օր պահել են բերդի կլինիկայում, հետո նորից տարել բերդ: Ես այդ մասին տեղյակ եմ պահել ՀՀ ՄԻՊ-ին, ասել են կզբաղվենք, մինչեւ հիմա նորություն չկա»,- ասաց Մարտիրոսյանը:

Մեր հարցին, թե արդյոք թեւի տակ հայտնաբերված ուռուցքի հետ կապված վիրահատություն չպետք է կազմակերպեին՝ Մարտիրոսյանը պատասխանեց, որ խաբել են իրենց. «Խաբել են ու չեն տարել: Ասացին կտանեն, բայց ոչ մի տեղ էլ չտարան: Այս պահին շարունակում է բերդում մնալ, վիճակը նույնն է, ողնաշարի ցավերը կան, թեւի տակի ուռուցքը սրտին նեղություն է տալիս, բայց ոչ մի վիրահատություն էլ չեն արել: Նա բերդում է»,- պատասխանեց Հրաչյա Հարությունյանի կնոջ հայրը: 

Նշենք, որ փետրվար ամիսը դեռ չի ավարտվել եւ չի բացառվում, որ Հարությունյանին մինչեւ ամսվա վերջ իրոք քաղաքացիական հիվանդանոց տեղափոխեն: Սակայն փաստ է, որ նա ողնաշարի սարսափելի ցավերով այժմ կրկին խցում է, հնարավոր է նաեւ պատժախցում, ինչպես շատ հաճախ լինում է: 

ՀՀ մարդու իրավունքների պաշտպանի մամուլի խոսնակ Զոհրապ Եգանյանը այս կապակցությամբ մեզ հետ զրույցում հայտնեց. «Մարդու իրավունքների պաշտպանի աշխատակազմը ՌԴ ում պատիժը կրող ՀՀ քաղաքացի Հրաչյա Հարությունյանի մասով կատարած աշխատանքի մասին հաղորդագրություն է տվել 2017 թվականի հունվարի 25 ին, որտեղ ի թիվս այլ հարցերի, նշել ենք, որ ՌԴ մարդու իրավունքների հանձնակատարի ներկայացուցիչները մեր դիմումի համաձայն այցելել են Հրաչյա Հարությունյանին, հանձնակատարի ներկայացուցիչներին վերջինս գանգատ է ներկայացրել մեջքի շրջանում զգացվող ցավերից: Դրա հիման վրա ազատությունից զրկման վայրի բժշկական ղեկավարության հետ համաձայնություն է ձեռք բերվել առ այն, որ 2017 թվականի հունվար-փետրվարին քաղաքացիական բժշկական հաստատությունում կկազմակերվեն Հ. Հարությունյանի անհրաժեշտ հետազոտությունները եւ համապատասխան բուժումը: Այնպես որ՝ որևէ հարցում պայմանավորվածության խախտում չի եղել և մեր ռուս գործընկերների հետ շարունակում ենք ակտիվորեն փոխշահավետ աշխատանք տանել։ Տեղկացնեմ նաև, որ ռուս գործընկերներից սպասում ենք նաև Հրաչյա Հարությունյանի բժշկական հետազոտությոունների արդյունքների մասին տվյալների ստացմանը, որից հետո հնարավոր է նաև, որ մեր կողմից ձենարկվեն լրացուցիչ քայեր։ Այնպես որ՝ մեր պայմանավորվածություններն ուժի մեջ են և խախտումների մասին խոսք լինել չի կարող»:

Հրաչյա Հարությունյանը 2013 թվականի հուլիսի 13-ին իր «Կամազ» մակնիշի մեքենայով ՌԴ Պոդոլսկի շրջանի մերձակայքում բախվել էր մարդատար ավտոբուսին, ինչի հետեւանքով զոհվել էր 18 մարդ: 2014 թվականի օգոստոսի 4-ին Մոսկվայի Տրոիցկի դատարանի վճռով Հարությունյանը դատապարտվել է 6 տարի 9 ամիս ազատազրկման:

Մեկ տարի առաջ Արդարադատության նախարար Արփինե Հովհաննիսյանը վստահեցրել էր, որ Հրաչյա Հարությունյանին Հայաստան տեղափոխելու հարցով 2016 թվականին առաջընթաց կունենանք: 2016-ի տարեվերջյան, սակայն նա հայտարարեց, որ Հրաչյա Հարությունյանի արտահանձնման գործում խոչընդոտներ են ծագել: Խոսքն ավտովթարի զոհերի հարազատների կողմից նրա դեմ ներկայացված քաղաքացիական հայցերի մասին է: