«Արմենիա» հանրապետական բժշկական կենտրոնում աշխատավարձերը վճարելու փող չունեն

 Համացանցում տարածվել է «Արմենիա» հանրապետական բժշկական կենտրոնի (ՀԲԿ) գլխավոր տնօրենին վերագրվող մի հրաման, ըստ որի բուժհաստատությունում աշխատավարձերը չեն վճարվում ու հայտնի էլ չէ, թե երբ են վճարվելու:

«Նկատի ունենալով «Արմենիա» ՀԲԿ ՓԲԸ-ում առկա ծանր ֆինանսական իրավիճակը` հրամայում եմ` 2017 թվականի 26. 01-ից ժամանակավորապես դադարեցնել (անորոշ ժամկետով) «Արմենիա» ՀԲԿ ՓԲԸ բժշկական բոլոր բաժանմունքների բժիշկների, կրտսեր եւ միջին բուժանձնակազմի աշխատողների աշխատավարձի, տարբեր հրամաններով սահմանված հավելավճարների վճարումը»,- գրված է նշված հրամանում, որը ներկայացվում է գլխավոր տնօրեն Գրիգոր Գրիգորյանին վերագրվող ստորագրությամբ ու կնիքով:

Գրիգորյանն, ի դեպ, ընդգրկված է Հայ ազգային կոնգրես կուսակցության համամասնական ցուցակում:  

Մեր այցելության ժամանակ կենտրոնի բուժաշխատողները նախընտրում էին ավելորդ չխոսել` գլխացավանքի մեջ չընկնելու համար, այդուհանդերձ, շատերը հաստատեցին, որ աշխատավարձի խնդիր գոյություն ունի: Ոմանք ասում էին` չեն ստացել փետրվարին վճարվելիքը, ոմանք` թե հունվարինը նույնպես:

«Արմենիա» հանրապետական բժշկական կենտրոնի ֆինանսական գծով տնօրեն Նորայր Քրմոյանը, թեպետ մեծ դժվարությամբ, նույնպես ի վերջո չժխտեց, որ վճարումները ժամանակին չեն կատարվել: Նրա հետ մեր զրույցը ներկայացնում ենք ստորեւ.

- Պարոն Քրմոյան, ըստ տեղեկությունների` աշխատավարձերը չեն վճարվելու անորոշ ժամկետով: Ինչպե՞ս կմեկնաբանեք:

- Մեզ մոտ հետեւյալն է. աշխատավարձերն ամեն ամիս հաշվարկվում եւ վճարվում են աշխատակիցներին, այդպիսի խնդիր չկա: Կարող է խոսքը վերաբերել հավելավճարներին, որոնք նույնպես մենք հաշվարկում ենք:

- Այսինքն` հիմա հնարավոր է հավելավճարնե՞րը չստանան կամ չեն ստանում:

- Չէ, գիտե՞ք ինչպես, հավելավճարներն էլ ենք մենք հաշվարկում, հավելավճարներն էլ ենք տալիս: Իսկ աշխատավարձի վերաբերյալ ընդհանրապես ոչ մի խնդիր չկա: Ամեն ամիս էլ դրանք հաշվարկվում են, եւ աշխատակիցները ստանում են:

- Հիմա, ըստ ձեր պատասխանների, հավելավճարների հետ կապված խնդիր չկա, աշխատավարձերի հետ կապված ընդհանրապես չկա: Ավելի պարզ կխոսե՞ք:

- Խնդիր ընդհանրապես չկա: Ամենաճիշտը հետեւյալն է, որ մեզ մոտ աշխատավարձերն ամեն ամիս հաշվարկվում եւ վճարվում են: Ամենաճիշտ, գրագետ պատասխանը սա է:

- Իսկ հավելավճարնե՞րը:

- Ես կարող եմ պատասխանել ընդհանուր: Այդ հավելավճարներն աշխատավարձի հավելումներ են, այսպես, թե այնպես: Աշխատավարձն ունի համապատասխան հաշվարկի սխեմա, որը կատարվում է ամեն ամիս եւ վճարվում: Ավելի մանրամասն ես չեմ կարող թվեր ներկայացնել, որովհետեւ այդ իրավասությունները չեմ ստացել գլխավոր տնօրենից:

- Բայց փետրվարին մարդիկ չեն ստացել աշխատավարձ: Ասում էին` սովորաբար մինչեւ տվյալ ամսվա 15-ն է վճարվում:

- Փետրվարը դեռ չի ավարտվել: Մենք փետրվարինն էլ հիմա հաշվարկել ենք, սպասում ենք պետպատվերին, հավանաբար այսօր արդեն կլինի: Այո, աշխատավարձերը մինչեւ 15-ն են վճարվում, բայց այս ամիս պետպատվերը հետաձգվել է ու մենք այսօր արդեն ստանալու ենք: Խոստացել են:

- Երբ աշխատավարձի վճարումը ձգձգվում է անորոշ ժամկետով, մտավախություն չունե՞ք, որ ստվերային գումարների շրջանառությունը կարող է մեծանալ, մարդիկ չստացած գումարը հիվանդից պահանջեն:

- Ես կարող եմ պաշտոնապես հայտարարել, որ մեզ մոտ ստվերային գումարներ չկան: Մեզ մոտ բոլոր գումարները վճարվում են դրամարկղ: Մենք բացարձակ այդպիսի հասկացություն, փառք Աստծո, չունենք, նման նպատակ չենք էլ հետապնդում: Կարող եմ հաստատ ասել, որ մեզ մոտ այդ բանը բացակայում է:

ՀՀ առողջապահության նախարարության լրատվական ծառայությունից, մեկնաբանելով «Արմենիա» հանրապետական բժշկական կենտրոնում ստեղծված իրավիճակը, փոխանցեցին. «Հարկ ենք համարում ձեր ուշադրությունը հրավիրել կարեւոր հանգամանքի ուղղությամբ՝ ցանկացած բուժհաստատություն, առավել եւս հանրապետական նշանակության կենտրոնը, պետք է իր ֆինանսական հոսքերը կառավարի այնպես, որ ամենատարբեր օբյեկտիվ իրավիճակները չանդրադառնան աշխատակիցների աշխատավարձի վրա: Տեղեկացնում ենք, որ պետպատվերի համար նախատեսված գումարը 1-2 օրվա ընթացքում կփոխանցվի «Արմենիա» հանրապետական բժշկական կենտրոնին»: Իսկ թե ինչ օբյեկտիվ պատճառ է առաջացել, որ պետպատվերի գումարները չեն տրամադրվում բուժհաստատությանը, նախարարությունից այդ մասին լռում են: