Հ1-ը ուղիղ եթերում հեռուստաբանավեճեր կկազմակերպի. Հարություն Հարությունյան

Հանրային հեռուստաընկերության լրատվական եւ վերլուծական ծրագրերի տնօրեն Հարություն Հարությունյանն armtimes.com-ի հետ զրույցում ասաց, որ «Հ1»-ը պատրաստվում է ապրիլի 2-ին կայանալիք խորհրդարանական ընտրություններին մասնակցող քաղաքական ուժերի ներկայացուցիչների մասնակցությամբ հեռուստաբանավեճեր կազմակերպել:

- Պարոն Հարությունյան, ինչո՞ւ հանրային հեռուստաընկերության եթերում նախընտրական քարոզարշավի ժամանակահատվածում հեռուստաբանավեճեր չեն կազմակերպվում խորհրդարանական ընտրություններին մասնակցող քաղաքական ուժերի միջեւ:

- Եթե դուք նկատել եք, մենք հիմնականում լուսաբանում ենք ոչ թե ռեյտինգային թեկնածուներին, այլ լուսաբանում ենք կուսակցությունների եւ դաշինքների քարոզարշավը: Այս առումով մենք համարում ենք, որ սա խորհրդարանական ընտրություններ են:  Եւ ոչ թե ռեյտինգային թեկնածուներին պետք է ավելի շատ անդրադարձ կատարենք, այլ կուսակցություններին, նրանց ծրագրերին եւ նրանց լիդերներին:

Բանավեճերի մասով, իհարկե, ի սկզբանե ես նախատեսում էի, որ նման մի բան պետք է լիներ եթերում, ուղղակի ֆիզիկապես չհասցրեցինք` ժամանակի առումով: Հիմա, այս պահին մենք մտածում ենք մի ձեւաչափի մասին, ըստ երեւույթին այսօր երեկոյան «Օրակարգ» ծրագրով արդեն ամբողջականացրած կլինենք, թե ինչպես ենք դա պատկերացնում եւ այսօր երեկոյան ամենայն հավանականությամբ հայտարարություն կանենք, որտեղ մանրամասն կբացատրենք եւ կհրավիրենք բանավեճի: Ուղղակի հիմա հստակ օրը եւ ժամը չեմ կարող ասել, որովհետեւ պետք է նայենք, թե ինչ ձեւաչափ ենք ընտրում, որպեսզի կարողանանք հանրությանը ներկայացնենք բոլոր կուսակցություններին հավասարապես եւ բոլոր կուսակցությունների առաջնորդներին կարողանանք հավաքել մի տեղ ու կազմակերպել այդ բանավեճը: Հուսով եմ, որ միչնեւ երեկո արդեն վերջացրած կլինենք եւ կկարողանանք «Օրակարգ» ծրագրով հայտարարել այդ մասին:

- Ես չեմ հիշում մի դեպք, որ օրինակ՝ ՀՀԿ նախագահ Սերժ Սարգսյանը մասնակցի հեռուստաբանավեճի: Իրատեսական համարո՞ւմ եք կուսակցությունների լիդերների մասնակցությամբ բանավեճերի անցկացումը:

- Մենք հիմա ձեւաչափն ենք մշակում: Այստեղ ոչ թե կուսակցությունների նախագահներին պետք է հրավիրենք, այլ պետք է հրավիրենք դաշինքների, կուսակցությունների առաջին, երկրորդ, մի գուցե երրորդ համարներին: Պետք է հասկանանք, թե ում ենք հրավիրում: Եթե դուք ասում եք ՀՀԿ-ի առաջնորդի մասով, ես էլ նույն հաջողությամբ կարող եմ ասել «Ժառանգության» առաջնորդի մասին, որը «Օհանյան-Րաֆֆի-Օսկանյան» դաշինքի համամասնական ցուցակի 11-րդ տեղում է: Կապ չունի, թե ով որ կուսակցության նախագահն է, այլ կապ ունի, թե առաջիկա ընտրություններին, որ կուսակցություններն ու դաշինքներն են գնում ընտրության եւ ժողովուրդը, որ դաշինքին եւ կուսակցությանն է իր ձայնը տալու: Ես չեմ կարծում, որ ՀՀԿ-ի առաջնորդը, եթե նորմալ բանավեճ լինի, չի մասնակցի, բայց կան կուսակցություններ եւ դաշինքներ: Պետք է գտնենք ճիշտ ձեւաչափը, որպեսզի կարողանանք բոլորի պահանջներն ապահովել:

- Ընդդիմադիրները միշտ դժգոհում են, որ հեռուստաընկերություններով նույնիսկ ուղիղ եթերում չեն կազմակերպվում հարցազրույցները: Այդ բանավեճերը լինելո՞ւ են ուղիղ եթերում:

- Մենք ունենք հարցազրույցի ձեւաչափ՝ «Օրակարգից դուրս» անվանումով, որը չեմ կարծում, թե որեւէ ընդդիմադիր, որը մինչեւ այսօր հյուրընկալվել է, դժգոհել է, որ մենք իր խոսքը խեղաթյուրել ենք կամ մոնտաժել ենք: Հարցազրույց ֆորմատը, որը 40 րոպե է, ամենամեծ ձեւաչափն է հեռուստաշուկայում, որ հյուրերը հնարավորություն ունեն իրենց խոսքն ասելու: Չգիտեմ ինչի համար են դժգոհել: Ես խոսում եմ Հանրային հեռուստաընկերության լրատվական եւ վերլուծական ծրագրերի տնօրենի անունից: Մյուս հեռուստաընկերությունների մասով ես որեւէ բան չեմ կարող ասել:

- Մի ճշգրտում՝ ուղիղ եթերում չե՞ն նախատեսվելու այդ բանավեճերը:

- Ուղիղ եթերում: Մենք նախատեսում ենք, որ դա լինի ուղիղ եթերում, բայց ձեւաչափի մասով երեք օր է` քննարկում ենք: Գործ ունենք 9 քաղաքական ուժի հետ: Պետք է կարողանանք բոլորի պահանջները բավարարել: Հավանաբար, դա կլինի հաջորդ շաբաթվա վերջում: Հիմա վերջնական փուլում ենք, եւ հուսով եմ կկարողանանք երեկոյան հայտարարություն տալ այդ մասին: Առայժմ այսքանը կարող եմ ասել: