«Ելք»-ը ձեռնոց է նետում ՀՀԿ-ին եւ ՀՅԴ-ին. Էդմոն Մարուքյանի քաղաքական առաջարկը

Ազգային ժողովի այսօրվա նիստում խորհրդարանը սկսեց քննարկել ԱԺ-ի մշտական հանձնաժողովների ձեւավորման հարցը: «Հանրապետական» խմբակցության առաջարկը խորհրդարանին ներկայացրեց Հրայր Թովմասյանը: ՀՀԿ-ի առաջարկով մինչ օրս գործող հանձնաժողովների թիվը պետք է կրճատել, քանի որ պատգամավորների թիվը 131-ից կրճատվել եւ դարձել է 105, գործող 12 հանձնաժողովից առնվազն 1-ը պետք է կրճատվի, իսկ մյուսների դեպքում վերամիավորում պետք է տեղի ունենա: 

Հրայր Թովմասյանի խոսքով՝ հանձնաժողովները ծանրաբեռնված են եւ պետք է վերանայվի հանձնաժողովների համամասնությունը: 2012-17 թվականներին Աժ-ում ընդունվել է 1020 օրենք, որոնցից 86-ի հեղինակն են եղել պատգամավորները, մյուսները հեղինակել է կառավարությունը: Ամենաքիչ նախագծերը քննարկվել են Մարդու իրավունքների պաշտպանության եւ հանրային հարցերի, Գիտության, կրթության, մշակույթի եւ երիտասարդության հարցերի, Առողջապահության, մայրության եւ մանկության հարցերի հանձնաժողովներում, իսկ Տնտեսական հարցերի եւ պետաիրավական հարցերի մշտական հանձնաժողովները կրել են ընդհանուր քննարկվող հարցերի բեռի մոտ 50 տոկոսը: Հանձնաժողովների քանակը վերանայելու երրորդ գործոնը քաղաքական է:

Մարդու իրավունքների եւ հանրային հարցերի հանձնաժողովը քանի որ մոտ է պետաիրավականի գործառույթներին, ՀՀԿ-ն առարկում է միավորել այդ հանձնաժողովները եւ անվանել Պետաիրավական հարցերի եւ մարդու իրավունքների պաշտպանության հանձնաժողով: Հաջորդ երկու իրար մոտ ոլորտները Առողջապահության, մայրության եւ մանկության եւ սոցիալական հարցերի հանձնաժողովներն են, որոնք առաջարկվում է միավորել, իսկ երրորդը՝ Գյուղատնտեսության, բնապահպանության եւ տարածքային կառավարման եւ տեղական ինքնակառավարման հարցերի հանձնաժողովներն են, որոնք առաջարկվում է միավորել:

«Ելք» խմբակցության պատգամավոր Արտակ Զեյնալյանը հարցրեց՝ հնարավո՞ր է միտումնավոր է մարդու իրավունքների պաշտպանության հանձնաժողովը կրճատվում եւ հանձնաժողովների թիվը դարձվում 9-ը, որպեսզի հանձնաժողովների նախագահների պաշտոների բաշխման ժամանակ «Ելք» խմբակցությանը նման պաշտոն բաժին չհասնի: Հրայր Թովմասյանը նախ ասաց, որ հանձնաժողովների թվի կրճատման հարցը քննարկվել է սահմանադրական փոփոխությունների փուլում եւ դա կապել բարձրացրած խնդրի հետ տեղին չէ, քանի որ այն ժամանակ դեռ որեւէ մեկը չգիտեր, թե 6-րդ գումարման Ազգային ժողովում «Ելք» կամ այլ խմբակցություններ կձեւավորվեին: Բացի այս, Հրայր Թովմասյանը նկատեց, որ յուրաքանչյուր հանձնաժողովի գործունեությունն ապահովելու համար տարեկան 70-ից 80 միլիոն դրամ ծախս է լինելու բյուջեից: «Կրճատելու դեպքում շատ վատ ուղերձ կլինի»,- արձագանքեց Արտակ Զեյնալյանը:

«Ծառուկյան» խմբակցության պատգամավոր Տիգրան Ուրիխանյանը Հրայր Թովմասյանին հարցրեց, թե հնարավորություն կա՞ ընդդիմության հետ կոմպրոմիսի գալ, որին ի պատասխան Հրայր Թովմասյանը նշեց, թե քաղաքական հարցերի մասով ինքն իրավասու չէ խոսել եւ դրա համար կա խմբակցության ղեկավար, ԱԺ նախագահ:

«Ելք» խմբակցության առաջարկը խորհրդարանին ներկայացրեց Էդմոն Մարուքյանը: «Լսեցիք ՀՀԿ-ի առաջարկությունը հանձնաժողովների թվի վերաբերյալ: «Ելք»-ն առաջարկել է այլընտրանքային նախագիծ: Առաջարկում ենք կրճատել մշտական հանձնաժողովները 12-ից դարձնելով 10»,- ասաց Էդմոն Մարուքյանն ու ներկայացրեց ՀՀԿ-ի առաջարկի վերաբերյալ «Ելք»-ի առարկություններն ու իրենց առաջարկի կենսունակությունը հիմնավորող փաստեր:

Մարուքյանի խոսքով՝ եթե ԱԺ նախագահի եւ փոխնախագահների թիվը հանում են 101-ից, ապա ստանում են 97 պատգամավոր, որոնք կարող են ընդգրկվել նշված ձեւավորվող հանձնաժողովներում: Նա կարծում է, որ հանձնաժողով կրճատելու համար օբյեկտիվ հիմք կարող էր լինել այն հանգամանքը, որ ամենաքիչը գլխադասային համարված հանձնաժողովները դիտարկել որպես կրճատվող: «Առաջարկվում է Եվրոպական ինտեգրացիայի մշտական հանձնաժողովը պահպանել, բայց մարդու իրավունքներինը կրճատել: Ողջունում ենք Եվրոպական ինտեգրացիայինը պահելը, բայց գտնում ենք, որ Մարդու իրավունքների պաշտպանության հանձնաժողովն էլ նույնպես պետք է պահպանել»,- ասաց Էդմոն Մարուքյանը:

«Ելք» խմբակցության պատգամավորը կարծում է, որ 5-րդ գումարման խորհրդարանում ամեն ինչ արվել է, որ կրճատման վտանգի տակ հայտնված հանձնաժողովը քիչ դեպքերում համարվի գլխադասային, որն էլ հետագայում հիմք պետք է հանդիսանար դա կրճատելու առաջարկության համար: «Արհեստական կերպով բլոկադայի է ենթարկվել այս երկու հանձնաժողովները: Հիմա փորձել փաստարկ բերել, որ դրանք թերբեռնված են, չի խոսում հիմնավորման մասին»,- ասաց նա:

Էդմոն Մարուքյանը հայտարարեց, որ «Ծառուկյան» խմբակցությունը կողմ է, որ պահպանվի Մարդու իրավունքների պաշտպանության հանձնաժողովը եւ դիմեց ՀՅԴ-ին, որպեսզի անկախ ՀՀԿ-ի հետ համագործակցությունից միանա «Ելք»-ի առաջարկին եւ այդ հանձնաժողովը պահպանվի: Մարուքյանը հիշեցրեց ԱԺ-ում Սերժ Սարգսյանի ելույթն ու առաջարկեց ընդդիմության հետ կիսել մարդու իրավունքների ոլորտում պատասխանատվության հարցը:

Նշենք, որ 9 հանձնաժողովի փոխարեն, եթե 10 հանձնաժողով ձեւավորվի, ապա Դոնթի բանաձեւի համաձայն «Ելք» խմբակցությունը կկարողանա ունենալ հանձնաժողովի նախագահի 1 հաստիք: 9 հանձնաժողովի ձեւավորման պարագայում, նույն մեխանիզմով հաշվարկի արդյունքում, ՀՀԿ-ն ստանում է հանձնաժողովի նախագահի` 6, իսկ Ծառուկյան խմբակցությունը 3 պաշտոն:

ՀՅԴ խմբակցության ղեկավար Արմեն Ռուստամյանը ելույթ ունեցավ եւ ասաց, որ երկու նախագծերում ՀՅԴ-ն համահեղինակ չէ: «Մենք այլ պրոբլեմ ենք տեսնում: ԱԺ-ն ներկայացուցչական մարմին է, հանձնաժողովների դերը մեծանալու է, զրկել փոքրաթիվ խմբակցությանը մասնակցել այդ աշխատանքներին, դա նշանակում է զրկել ԱԺ-ի գործիքներից օգտվելու գործիքներից: Մենք 7 հոգանոց խմբակցություն ունենք, կամ թիվը նվազեցնել եւ հասցնել նրան, որ մենք բոլոր տեղերում լինենք կամ տալ հնարավորություն խմբակցությանը բոլոր հանձնաժողովներում լինելու իրավունք: Մեր շահն ասում է դարձրեք 7»,- հայտարարեց Արմեն Ռուստամյանը:

Խորհրդարանը մեկ ժամ ընդմիջումից հետո կշարունակի նույն հարցի քննարկումը: